މި މަހުގެ އެއް ވަނަ ދުވަހު ކައިވެނި ކުރި ބޮލީވުޑްގެ މަޝްހޫރު ހޮސްޓް އަދި ލަވަކިއުންތެރިޔާ އަދިތިޔާ ނަރާޔަނަށް ހަނީމޫނަށް ގައުމުން ބޭރަށް އަދި ދެވެން ނެތްކަމަށް އޭނާ ބުނެފިއެވެ.
ބޮލީވުޑް ހަންގާމާއިން ކުރި ސުވާލަކަށް ޖަވާބުދެމުން އަދިތިޔާ ބުނީ "އިންޑިއަން އައިޑޮލް" ސީޒަން 12ގެ ޝޫޓިންގތައް އޮތްގޮތުން މި ދަނޑިވަޅުގައި އަދި އިންޑިއާއިން ބޭރަށް ދެވެން ނެތް ނަމަވެސް އަންހެނުން ޝްވޭތާ އަގަރްވާލާ އެކު އިންޑިއާގެ ޝިއްލިމް އާއި ސުލާ ވައިން ޔާޑްގެ އިތުރުން ގުލްމަރްގްގައި ފުރަތަމަ ހަނީމޫން ހަދަން ނިންމާފައި ވާކަމަށެވެ.
މީގެ އިތުރުން މިދުވަސްވަރު އިންޑިއާގެ ގިނަ ތަރިން ރާއްޖެއަށް ޗުއްޓީ އާއި ހަނީމޫންގެ އިތުރުން އުފަން ދުވަސް ފާހަގަކުރަން ޒިޔާރަތްކުރާތީ، ހަނީމޫނަށް ދިވެހިރާއްޖެ އަށް ދާން ރާވާފައި ނެތްތޯ ސުވާލުކުރުމުން، އަދިއްތިޔާ ބުނީ އެކަން އަދި އެބައޮތް ކަމަށާއި ރާއްޖޭން އަހަރަކު ތިން ހަތަރު ދަތުރު އޭނާއަށް ހިލޭ ލިބޭ ކަމަށެވެ. އަދި ސަމާސާ ގޮތަކަށް ލަވަކިޔުންތެރިޔާ އަދިތިޔާ ބުނީ "އަހަރެންމީ ރާއްޖޭގެ ނުރަސްމީ އެމްބެސެޑަރު" ކަމަށެވެ.
އަދިތިޔާގެ ދެ މިއުޒިކް ވީޑިއޯއެއް ރާއްޖޭގައި ޝޫޓްކޮށްފައިވާ އިރު، ބޮޑު އީދުގައި ފުވައްމުލަކުގައި ޝޯވ އެއް ދޭންވެސް އޭނާ ވަނީ ރާއްޖެ އައިސްފައެވެ.
މަޝްހޫރު ލަވަކިތުންތެރިޔާ އުދިތު ނަރާޔަންގެ ދަރިފުޅު އަދިއްތިޔާ އާއި ޝްވެތާ ރައްޓެހިވެގެން އުޅޭތާ 12 އަހަރު ވެފައިވާއިރު، މި ދެމީހުން ފުރަތަމަ ބައްދަލުވީ ފިލްމް "ޝާޕިތު"ގެ ސެޓުންނެވެ. އަދި މިފަހުން އަދިއްތިޔާގެ ބައްޕަ އުދިތު ވަނީ އެދެމީހުން 10 އަހަރު ލިވިން ރިލޭޝަންޝިޕްގައި އުޅުނުކަން ހާމަކޮށްފައެވެ.
