ރާއްޖޭގެ މިއަދުގެ ހާލަތަށް ބަލާއިރު، ސިޔާސީ މިނިވަންކަން އޮތީ ހޯދާ ދެވިފައިކަމަށާއި، އެއްވެސް މީހަކަށް ނުހައްގުން ޖަލަށްލައި އަނިޔާ ދީފައި ނުވާނެކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ ބަހުސްގައި ވާހަކަ ދައްކަވަމުން ރައީސް ޞާލިހު ވިދާޅުވީ ރާއްޖޭގައި މީގެ ކުރިން މާޒީގައި ފެނުނު އަނިޔާވެރިކަން ނިމުމަކަށް ގެނެސް އަމާން ސުލްހަވެރި ޤައުމަށް ރާއްޖެ ބަދަލު ކުރެވިފައިވާކަމަށެވެ. ރާއްޖޭގެ ރައްޔިތުން އެއަނިޔާއާއި ސިޔާސީ ހަލަބޮލިކަމަށް ދާން ދެން ބޭނުން ނުވާނެކަމަށް ރައީސް ވިދާޅުވިއެވެ.
އަޅުގަނޑު އެއްވެސް މީހަކަށް ސިޔާސީ ގޮތުން އަނިޔާދީ ނުހައްގުން ޖަލަށްލައި އަދަބު ދީފައި ނުވާނެ. މީގެ ކުރިން އެހެންތޯ 2018 ވަނަ އަހަރު ރިޔާސީ އިންތިޚާބުގައިވެސް އަޅުގަނޑުމެންގެ ތެރެއިން ވާދަކުރަން އުޅުނު ކޮންމެ މީހަކު އޮތީ ޖަލުގަ. މިހާރު އެހެންތޯ. އަޅުގަނޑުމެން މިވަނީ އެކަން ބަދަލުކޮށްފަ.
– ރައީސް ޞާލިހު ވިދާޅުވިއެވެ.
ރައީސް ވިދާޅުވީ ރައީސް ޔާމީނަށްވެސް ނުހައްގުން އަނިޔާވެރި ނުވާކަމަށެވެ. އެމަނިކުފާނަށް ކޮށްފައިވާ ހުކުމަކީ ޝައުރީ މަރުހަލާގެ ތެރެއިން ކޮށްފައިވާ ހުކުމެއްކަމަށް ރައީސް ވިދާޅުވިއެވެ.
މިސުވާލުގެ ޖަވާބުގައި ޕީއެންސީގެ ރިޔާސީ ކެންޑިޑޭޓް ޑރ.މުއިއްޒު ވިދާޅުވީ އަނިޔާވެރިކަމުގެ ސަޤާފަތް ނައްތާލާނެކަމަށެވެ. މިސަރުކާރުން ވަނީ ޝަރުއީ ދާއިރާގެ މިނިވަންކަން ނަގާލައި ނުހައްގުން އަނިޔާދީ އެތައް ބަޔަކު ހައްޔަރު ކުރަމުންކަމަށް މުއިއްޒު ވިދާޅުވިއެވެ. މުއިއްޒު ވިދާޅުވީ މިކަންކަން ބަދަލުކޮށް ވެރިކަން ކުރައްވާނީ އަދުލުވެރި ކަމާއިއެކުގައި ކަމަށެވެ. މުއިއްޒު ވިދާޅުވީ ރައީސް ޔާމީން އެއްވެސް މީހަކަށް ނުހައްގުން އަނިޔާ ދީފައި ނުވާނެކަމަށެވެ.
މިސުވާލަށް ޖަވާބު ދެއްވަމުން ޤާސިމް ވިދާޅުވީ ކޮންމެ މިހަކަށްވެސް ޤާނޫނާއި ޚިލާފަށް ކަމެއް ކޮށްފިނަމަ ހައްގު އަދަބު ދޭންޖެހޭނެ ކަމަށެވެ. އެގޮތުން ރައީސް ޔާމީން ވަނީ ނުހައްގުން އެތައް ބަޔަކަށް އަނިޔާ ދީފައި ވާކަމަށެވެ. އެމަނިކުފާނު މިއަދު ތަންފީޒު ކުރަމުންދާ ހުކުމަކީ ކުރި ކުށުގެ އަދަބެއް ކަމަށް ގަބޫލު ކުރައްވާ ކަމަށް ޤާސިމް ވިދާޅުވިއެވެ.
