ކުރިޔަށް އޮތް ރިޔާސީ އިންތިޚާބުގައި އަމިއްލަ ގޮތުން ވާދަ ކުރައްވާ، އެމްއާރުއެމްގެ ރައީސް ފާރިސް މައުމޫން މާފުށީ ޖަލަށް ވަޑައިގެން ރައީސް ޔާމިންއާއި ކުއްލި ގޮތަކަށް ބައްދަލު ކުރައްވައިފިއެވެ.

ފާރިސް ރައީސް ޔާމިންއާއި ބައްދަލު ކުރައްވާފައިވަނީ މާފުށީ ޖަލަށް ވަޑައިގެން ދާދި ދެންމެއަކުއެވެ. އެހެންނަމަވެސް މި ބައްދަލުވުމުގައި ފާރިސްއާއި ރައީސް ޔާމިންއާއި ދެބޭފުޅުން މަޝްވަރާ ކުރެއްވި ކަންކަމުގެ ތަފްސީލީ މައުލޫމާތު އަދި ލިބިފައެއް ނުވެއެވެ.

ޔާމިން އާއި ފާރިސް މާފުށީ ޖަލުގައި ބައްދަލު ކުރައްވާފައިވާއިރު، ފާރިސް ގެންދަވަނީ އަމިއްލަގޮތުން ރިޔާސީ އިންތިޚާބަށް ކުރިމަތިލައްވާ، ކެމްޕޭންވެސް ކުރައްވަމުންނެވެ. އަދި ރައީސް ޔާމިންގެ އެންޑޯސް ކުރެއްވި ކެނޑިޑޭޓެއްގެ ގޮތުގައި، ޕީއެންސީގެ ޓިކެޓްގައި ޑރ. މުއިއްޒުވެސް ގެންދަވަނީ ރިޔާސީ އިންތިޚާބަށް ކެމްޕޭން ކުރައްވަމުންނެވެ.

އެހެންނަމަވެސް، ރިޔާސީ އިންތިޚާބުގައި އިދިކޮޅު ޕީޕީއެމްގެ ފަރާތުން ވާދަ ނުކުރާކަން ފާހަގަ ކޮށްލެވެއެވެ. އަދި ފުރަތަމަ ބުރުން އެއްވެސް ޕާޓީއަކަށް މެޖޯރިޓީ ނުލިބި، އިންތިޚާބުގެ ދެވަނަބުރަކަށް ދާންޖެހިއްޖެ ހާލަތެއްގައި، ފާރިސް ތާއީދު ކުރާނޭ ކެނޑިޑޭޓެއްވެސް މިހާތަނަށް ހާމަ ކޮށްފައެއް ނުވެއެވެ.

ފާރިސްއާއި ރައީސް ޔާމިންއަކީ ސިޔާސީ ގޮތުން ވަރަށް ބޮޑަށް ޚިޔާާލު ތަފާތު އަދި ވާދަވެރި ދެ ބޭފުޅުންނެވެ. އެގޮތުން ރައީސް ޔާމިންގެ ވެރިކަމުގައި އުފެދުނު ސިޔާސީ ޚިޔާލު ތަފާތުވުންތަކުގައި ރައީސް ޔާމިންވަނީ ފާރިސްގެ އިތުރުން، ފާރިސްގެ ބައްޕާފުޅު، ކުރީގެ ރައީސް މައުމޫންވެސް ޖަލަށް ލައްވާފައެވެ.

އަދި އެއަށްފަހު ރައީސް މައުމޫނު ވިދާޅުވެފައިވަނީ ރައީސް ޔާމިންއާއެކު އެއްވެސް ސިޔާސީ މަސައްކަތެއް ނުކުރައްވާނެ ކަމުގައެވެ.