ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒަކީ ރައްޔިތުން ޓެސްޓް ކުރައްވާފައިވާ ޤާބިލް ބޭފުޅެއްކަން ދިވެހި ރައްޔިތުންވެސް ގަބޫލު ކުރައްވާ އިތުބާރު ކުރެވޭ ކެންޑިޑޭޓެއް ކަމުގައި ޕީޕީއެމްގެ ނައިބް ރައީސް އަހުމަދު ޝިޔާމް މުހައްމަދު ވިދާޅުވެއްޖެއެވެ.

ރިޔާސީ ކެމްޕޭންގައި ޝިޔާމްގެ އުފަން ރަށް ނައިފަރުގައި މިރޭ ބޭއްވި ފޯރިގަދަ ޖަލްސާގައި ވާހަކަ ދައްކަވަމުން އޭނާ ވިދާޅުވީ ނައިފަރުގެ ރައްޔިތުން ހުށަހެޅި ކަންކަން ޑރ. މުއިއްޒުކޮށްދެއްވާނެ ކަމީ ޔަގީން ކަމެއްކަމަށެވެ. މުއިއްޒަކީ މިހާރު ވާދަ ކުރައްވާ ކެންޑިޑޭޓުންގެ ތެރެއިން އެންމެ ބޮޑަށް ރައްޔިތުންގެ މަގުބޫލުކަން އޮތް އަދި ރައްޔިތުންނަށް ފެންނަން ހުރި އެތައް މަޝްރޫއުއެއްގެ ހިއްސާ ބޮޑު ބޭފުޅެއްކަމަށެވެ.

މުއިއްޒު ވަނީ މިހާތަނަށްވެސް ރާއްޖޭގައި ހުރި މައްސަލައްތައް ހައްލު ކޮށްދެއްވުމުގައި ރައީސް ޔާމީންގެ އަރިހުގައި ވަރަށް ބުރަ މަސައްކަތްތަކެއް ކުރައްވާފައިކަން ޝިޔާމް ފާހަގަ ކުރެއްވިއެވެ. އެގޮތުން ރާއްޖޭގެ އެކި ކަންކޮޅުތަކާއި މާލެ ސަރައްހައްދުން ފެންނަން ހުރި ތަރައްޤީގެ އެންމެ ހިއްސާ ބޮޑު އެކަކީ ރައީީސް ޔާމީން ފިޔަވައި ޑރ. މުއިއްޒުކަމަށް ޝިޔާމް ވިދާޅުވިއެވެ.

ރާއްޖޭގައި ހުރި މައްސަކަތައް ޑރ.މުއިއްޒަށް އެނގިވަޑައި ގަންނަވާނެ. އެކަންކަން ހައްލު ކޮށްދެއްވުމުގައި މިހާތަނަށްވެސް އެމަނިކުފާނު މަސައްކަތް ކުރެއްވި. ނަތީޖޖާތަކެއް ނެރެދެއްވި. މިއީ ރައްޔިތުންގެ އިތުބާރު އެމަނިކުފާނަށް އޮތް އެންމެ ބޮޑު އެއްސަބަބު. އެއީ ޓެސްޓްކޮށް ނަތީޖާ ނަރެދެއްވާފައިވާ ބޭފުޅެއް.

– ޝިޔާމް ވިދާޅުވިއެވެ.

ޝިޔާމް ވިދާޅުވީ ރާއްޖޭގެ ކޮންމެ ރަށެއްގައިހުރީ މުޅިންވެސް މައްސަލަ ކަމަށެވެ. ހައްލު ނުކުރެވި ފުނި ޖެހިފައިވާ މައްސަލަތައް ކަމަށެވެ. މީގެ ތެރެއިންވެސް ޝިޔާމް ވަނީ އޭނާ ނިސްބަތްވާ ދާއިރާގެ ރައްޔިތުންގެ ތެރެއިން މަސްވެރިކަމުން އާމްދަނީ ހޯދާ މީހުންގެ ކަންބޮޑުވުންތައް ފުނިޖެހިފައިވާކަން ފާހަގަ ކުރައްވާފައެވެ. ޝިޔާމް ވިދާޅުވީ މިކަންކަން ޑރ.މުއިއްޒު ހައްލު ކޮށްދެއްވާނެ ގޮތް ހުށަހަޅުއްވާފައިވާކަމަށެވެ.

މިއިންތިޚާބުގައި މުއިއްޒު ވާދަ ކުރައްވަނީ މައްސަލަތައް ހައްލުކޮށް ޤައުމުގެ ތަރައްޤީއަށް އިންގިލާބީ ހެޔޮ ބަދަލު ގެނައުމަށް ޝިޔާމް ވިދާޅުވިއެވެ.