މިއަދު ހަވީރު 5:00 ހާއިރު ޅ. ނައިފަރު ބަނދަރު މަތީ އޮތީ މުޅީން ތަފާތު ސިޔާސީ ޖޯޝަކާއި ފޯރިއެކެވެ. އިދިކޮޅު ޕީއެންސީ/ޕީޕީއެމްގެ ކެންޑިޑޭޓް ޑރ. މުހައްމަދު މުއިއްޒަށް މަރުހަބާ ކިޔުމަށް ދިގު ސަފެއްގައި މީހުން އެތުރި ތިއްބެވެ. ސަފުގެ ކޮޅު ފެންނާކަށް ނެތެވެ.

މުއިއްޒު ވަޑައިގެންނެވި ވަގުތު އެމްޑީޕީގެ ރިޔާސީ ކެންޑިޑޭޓްގެ ޖަލްސާ ދިޔައީ ނައިފަރުގައި ކުރިއަށެވެ. މުއިއްޒުއަށް މަރުހަބާ ކިޔަން ނައިފަރު މީހުން ފެށީ ފަޅު ބޭރުން ކުރުފަލީގައެވެ.

މުއިއްޒު ނައިފަރަށް ފައިބާވަޑައިގަތުމާ އެކު، އެއް އަޑަކުން ގޮވަން ފެށީ "ޑރ. މުއިއްޒު އެއްބުރުން" ކަމަށެވެ. ފޯރި އާއި ޖޯޝުގައި ތިބި އެތައް ސަތޭކަ ނައިފަރު މީހުންނާ މުއިއްޒު ސަލާމް ކުރައްވަމުން ގެންދެވިއިރު، އެ ނޫން ކަމަކަށް ރަށުގައި ސަމާލުކަމެއް ނެތެވެ.

މިއީ ހުސް މި ރަށު މީހުން. ހަމަ ހުސް މި ރަށު މީހުން. އެހެން ރަށަކުން މީހުން ނުގެނޭ.

– ސަފުގައި ހުރި މީހަކު ފަހުރުވެރިކަމާ އެކު ބުންޏެވެ.

ވަރަށް ފޯރީގައި ތިބި ސަޕޯޓަރުންނާ ސަލާން ކުރައްވަން ގާތްގަނޑަކަށް 45 މިނިޓް މުއިއްޒު ހޭދަކުރެއްވިއެވެ. އެ މީހުންނާ ބައްދަލުކުރައްވަން މިރޭ ބޮޑު ޖަލްސާއެއް އޮންނާނެއެވެ. އެ ޖަލްސާގައި ނައިފަރާއި، ޅ.އަތޮޅާއި ގުޅޭ ގޮތުން މުއިއްޒު ގެންގުޅުއްވާ ތަސައްވަރު ހާމަކުރައްވާނެއެވެ.