މިފަސް އަހަރު ހިންނަވަރުވީ ބާކީ ކަމަށާއި، ރަށުގައި އިތުރުވީ މަސްތުވާތަޖެއްޗާއި އަޅުވެތިކަން ކަމަށް ކުރީގެ ހެލްތު މިނިސްޓަރ ނާޒިމް ވިދާޅުވެއްޖެއެވެ.
ރިޔާސީ ކެމްޕޭންގައި ހިންނަވަރުގައި ބޭއްވި ޖަލްސާގައިވާ ވާހަކަ ދައްކަވަމުން ނާޒިމް ވިދާޅުވީ ހިންނަވަރުގެ ރައްޔިތަކު ޤައުމުގެ ވެރިކަމާއި ހަވާލުވުމުން ހިންނަވަރަށް ބޮޑެތި ބަދަލުތަކެއް އަންނާނެކަމަށް ރައްޔިތުން އުންމީދު ކުރިކަމަށެވެ. ނަމަވެސް ފެނިގެން ދިޔައީ މިފަސް އަހަރަކީ ހިންނަވަރުގެ ތާރީހުގައިވެސް އެންމެ އަނދިރި ފަސް އަހަރުގެ ގޮތުގައިކަމަށްނ ނާޒިމް ވިދާޅުވިއެވެ.
ނާޒިމް ވިދާޅުވީ ހިންނަވަރުގެ ރައްޔިތުން ވީ މިފަސް އަހަރުގައި އަޅުވެތި ކަމަށެވެ. ވަކި ބަޔަކާއި ގުޅިގެން ވަކި މީހަކު ދެއްވުމުން ނޫނީ ރަށުން ވަޒީފާއެއްވެސް ނުލިބޭކަމަށެވެ. އަދި އިންތިހާއަށް މަސްތުވާތަކެތި އިތުރުވެ މުޅި އިޖުތިމާއީ ފޭރާން ހަލާކު ކޮށްލާފައިވާކަމަށެވެ.
މަސްތުވާތަކެތި އެންމެ ގިނައިން ހިންނަވަރުގައި ޢާންމު ފަސް އަހަރަށް މިފަސް އަހަރު ވެއްޖެ. ހިންނަވަރު ރައްޔިތުން ސަލާންޖަހަން ޖެހުނު ފަސް އަހަރަށް މި ފަސް އަހަރު ވެއްޖެ. ބަޔަކަށް އަޅުދާސްތުވެގެން ނޫނީ ވަޒީފާއެއް ނުލިބޭނެ ފަސް އަހަރަށް މިފަސްއަހަރު ވެއްޖެ.
– ނާޒިމް ވިދާޅުވިއެވެ.
ނާޒިމް ވިދާޅުވީ ހިންނަވަރުގެ ހާލަތު ބަދަލުކޮށް ރައްޔިތުންނަށް އުފާފާގަތިކަން ހޯދައި ދިނުމަކީ މިއަދު ކުރަންޖެހޭ ކަމެއްކަމަށެވެ. އެކަން ކުރެވޭނީ ޑރ.މުއިއްޒު އިންތިޚާބު ކޮށްގެން ކަމަށް ނާޒިމް ވިދާޅުވިއެވެ.
