މިއަހަރުގެ މޭ މަހު އައްޑޫ ސިޓީގެ މަރަދޫފޭދޫގައި މަރާލި އެ ރަށު ބްލޫސްޓާ، އަހުމަދު ޝުއައިބުގެ މަރުގެ މައްސަލާގައި ދައުވާ އުފުލާފައިވާ އަހަރުގެ ހުސެއިން މަވާޒް ކުށަށް އިއުތިރާފްވުމުން މައްސަލަ ސާބިތުވާ ކަމަށް ކްރިމިނަލް ކޯޓުން މިއަދު ކަނޑައަޅައިފިއެވެ.
ދެ ބެއިންގެ ދެމެދު ހިނގި ހަމަނުޖެހުމެއްގައި ބޭބެ މަރާލި މި މައްސަލައިގައި މަވާޒްގެ މައްޗަށް ދައުލަތުން ކުރަނީ އެނގިހުރެ މީހަކު މެރުމުގެ ކުށުގެ ދައުވާއެވެ. މަވާޒް ވަނީ ތަހުގީގު މަރުހަލާގައި ވެސް އަދި މިއަދު ދައުލަތުން ޝަރީއަތުގައި ދައުވާ އިއްވުމުން ވެސް ކުށަށް އިއުތިރާފްވާ ކަމަށް ބުނެފައެވެ.
މި މައްސަލައިގައި ދައުލަތުން ވަނީ ދައުވާ އިއްވައި ދައުވާ ސާފު ކޮށްދީފައެވެ. މިއަދު ކުރިއަށް ގެންގޮސްފައިވަނީ ދައުވާއަށް ޖަވާބުދާރީވުމެވެ. މި އަޑުއެހުމުގައި ވާހަަކަ ދައްކަމުން އޭނާ ބުނީ، އޭނާ ދައުވާއަށް އިއުތިރާފުވާ ކަމަށާއި، އެދެނީ ވީހާވެސް ލުއި އަދަބެއް ދިނުމަށް ކަމަށެވެ. އޭނާ ކުރިއަށްދާން ބޭނުންވަނީ ތަހުގީގުގައި ދީފައިވާ އިއުތިރާފު ބަޔާނާ އެއްގޮތަށް ކަމަށާއި، އެ ވާހަކަތައް މިހާރު ދައްކަން އުނދަގޫކަމަށްވެސް އޭނާ ބުންޏެވެ.
ގާޒީ ވަނީ އޭނާގެ އިއުތިރާފަކީ ސައްޚަ އިއުތިރާފެއްތޯ ކަށަވަރު ކުރުމަށް ކުރައްވަންޖެހޭ ސުވާލުތައް ކުރައްވާފައެވެ. އެ ސުވާލުތަކުގެ ޖަވާބުގައި އޭނާ ވަނީ ކަން ހިނގާދިޔަ ގޮތް ރޮމުން ޝަރީއަތުގައި ކިޔާދީފައެވެ. އޭނާ ބުނީ، މި ޙާދިސާއަކީ 31 މެއި 2023 ވަނަ ދުވަހުގެރޭ ހިނގާ ދިޔަ ޙާދިސާއެއް ކަމަށެވެ. އެރޭ ބޭބެއާ ރެސްޓޯރަންޓަކުން ދިމާވި ކަމަށާއި، އެތަނުން ބޭބެގެ ފޯނު ނަގައިގެން އޭނާ ދިޔައީކަމަށް ބުންޏެވެ.
އޭނާ ބުނީ، ގެއަށް ދިޔައީ މަސްތުވާއެއްޗެއް (ބޮގަރު) ބަލައި ކަމަށާއި، ގެއަށް އައުމުން ބޭބެ ސުވާލު ކުރި ކަމަށެވެ. ސުވާލު ކުރުމުން، ސިމާއެކު ބޭބެގެ ފޯނު ވިއްކާލިކަމަށް ބުނި ކަމަށާއި، އެހިސާބުން ހަމަނުޖެހުން އުފެދި މާރާމާރީ ހިނގަން މެދުވެރިވީކަމަށް އޭނާ ބުންޏެވެ.
އޭރު އޭނާ ހުރީ ރާބޮއިގެންކަމަށް އޭނާ ޝަރީއަތުގައި ބުންޏެވެ. އޭނާ ބޭބެއަށް ޙަަމަލާދިނީ 3 އިންޗި ބައިގެ ތިލައެއް ހުރި ކަތުރަކުންކަމަށާއި، ޙަމަލާ އަމާޒުވީ ބޭބެގެ ވާއަތު ކަރާއި ދިމާލުން ތިރިއަށް މެއަށްކަމަށް އޭނާ ބުންޏެވެ. އެކަންކަން އޭނާގެ ހަނދާނުގައި އެބަހުރިކަމަށް އޭނާ ޝަރީއަތުގައި ބުންޏެވެ.
މަވާޒް ވަނީ ދައުލަތާއެކު އިއުތުރާފްގެ އެއްބަސްވުމެއް ހަދާފައެވެ. އިއުތިރާފްގެ އެއްބަސްވުމާއެކު ކުށުގެ އަދަބު ލުއިވެގެން ދާނެއެވެ. އެކަމަކު ދައު؛ލަތުން މިއަދު ބުނެފައި ވަނީ 2019 ވަނަ އަހަރު މަވާޒްގެ މައްޗަށް ރޭޕްގެ ދައުވާއެއް އުފުލައި، މިމަހުގެ 11 ވަނަ ދުވަހު ދައުވާ ސާބިތުވެފައިވާ ކަމަށެވެ.
އެހެންވެ، އޭނާގެ މައްޗަށް މިހާރު އުފުލާފައިވާ ދައުވާގެ އެއް ދަރަޖަ ވަނީ މަތިކޮށްފައެވެ. ދައުލަތުން ބުނެފައި ވަނީ މަވާޒް އިއުތިރާފްގެ އެއްބަސްވުން ބަލައިގަނެއްޖެނަމަ އޭނާގެ މައްޗަށް އަންނާނީ 12 އަހަރާއި ހަމަހުގެ ޖަލު ހުކުމެއް ކަމަށެވެ. އިސް ގާޒީ ވިދާޅުވެފައި ވަނީ ދައުލަތުން ހުށަހެޅި އިއުތިރާފްގެ އެއްބަސްވުން ބަލައިގަތުމާމެދު ދެން އޮންނަ އަޑުއެހުމެއްގައި ގޮތެއް ނިންމާނެ ކަމަށެވެ. ދައުލަތުން ހުށަހެޅި އިއުތިރާފްގެ އެއްބަސްވުން ބަލައިގަންނަ ނަމަ އަންނާނީ ދައުލަތުން ހުށަހެޅި އަދަބު ކަމަށް ވެސް އިސް ގާޒީ ވިދާޅުވިއެވެ.
