މިވަގުތު ބްރޭކެއް ނައިގެން ހުރި ބޮލީވުޑްގެ ސްޕަސްޓާރު އާމިރު ހާން ގެ އައު ފިލްމް އެއް އަންނަ އަހަރުގެ ޑިސެމްބަރުގައި ގެނެސްދޭން ނިންމައިފިއެވެ.
ބޮލީވުޑް އިން އޭނާ ބްރޭކް އެއް ނަގައިފައިވަނީ ގިން ދުވަސްތަކަކށް ފަހު އެނބުރި އައުން ފާހަގަ ކުރި ފިލްމް "ލާލް ސިންގް ޗައްޑާ" އަށް ލިބުނު ބޮޑު ނާކާމިޔާބީއެވެ. މި ނާކާމިޔާބީގައި ހިތް ކުދިކުދި ވެފައިވާ އާމިރު ބޮލީވުޑްއިން ދޮޅު އަހަރުގެ ބްރޭކް އެއް ނެގީ އާއިލާ އާއި އެކުގައި ވަގުތު ހޭދަކުރުމަށް ކަމަށް ބުނެއެވެ.
ރިޕޯޓްތައް ބުނި ގޮތުގައި، އާމިރުގެ އަމިއްލަ ޕްރޮޑަކްޝަން ހައުސް އިން ގެނެސްދޭ އެ ފިލްމުގައި ލީޑު ރޯލު ވެސް ކުޅޭނީ އޭނާ ކަމަށް ރިޕޯޓްގައި ވެއެވެ. ނަމަވެސް ފިލްމްގެ ނަމެއްވެސް އަދި ކާސްޓެއްވެސް މިހާތަނަށް ހާމަކޮށްފައިއެއް ނުވެއެވެ. އަދި ފިލްމް އާއި ގުޅޭ އިތުރު ތަފްސީލެއްވެސް ހާމަ ކޮށްފައިއެއް ނުވެއެވެ.
އޭނާ އަނެއްކައިވެސް އެނބުރި އަންނަށް ތައްޔާރު ވަމުން އަންނަ އިރުގައި، އޭނާ އަންނަން ބޭނުން ވަނީ ވަރަށް ވަރުގަދަ ފިލްމް އަކުން ކަމަށް ވަނީ ބުނެފައިއެވެ. އެއާއި އެކުގައި އޭނާ ކުޅުމަށް ނިންމައިފައިވާ އެތަށް ފިލްމް އެއް ވަނީ ދޫކޮށްލައިފައިއެވެ.
އެ ފިލްމު ޑައިރެކްޓް ކުރަނީ މީގެ 30 އަހަރު ކުރިން ނުކުތް އާމިރުގެ ފިލްމު "އަންދާޒް އަޕްނާ އަޕްނާ" ޑައިރެކްޓް ކުރި ރާޖުކުމާރު ސަންތޯޝީ ކަމަށް ވެސް ރިޕޯޓްތައް ބުނެއެވެ.
