އިންޑިއާ އާއި ގާތްގުޅުން ކެނޑިގެން ދާން އެއްވެސް ރައްޔިތަކު ބޭނުމެއް ނުވާނެކަމަށާއި ނަމަވެސް އިންޑިއާގެ އަޅުވެތިކަމަށް ދިއުމަކީ އެއަށްވުރެ ނުރައްކާތެރި ނިކަމެތިކަމެއްކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހީމް ވިދާޅުވެއްޖެއެވެ.
ޤާސިމް މިހެން ވިދާޅުވީ އެމަނިކުފާނުގެ އުފަންރަށް އ ދިއްދުއަށް ވަޑައިގެން ދެއްކެވި ވާހަކަފުޅުގައެވެ. އއ ދިއްދުއަކީ ގާސިމް އިބްރާހިމް އުފަންވި ރަށެވެ. ދިއްދުއަށް ވަޑައިގަތުމަށްފަހު ގާސިމް އިބްރާހިމް އެންމެ ފުރަތަމަ ޒިޔާރަތްކުރެއްވީ އެމަނިކުފާނުގެ މަންމާފުޅު ފަސްތާނުލެވިފައިވާ ތަނަށެވެ. މަންމާފުޅުގެ މަހާނައަށް ޒިޔާރަތްކުރައްވާ މަންމާފުޅަށް ހެޔޮ ދުއާކުރެއްވިއެވެ.
އުފަންރަށުގެ ރައްޔިތުންނާއި މުހާތަބްކުރައްވާ ގާސިމް ވިދާޅުވީ އުފަންވި ރަށަށް އަދި މަންމާފުޅުގެ ރަށަށް އައުމުން އުފާވެރި އިޚުސާސްތަކެއް ކުރެވޭ ކަމަށެވެ. ގާސިމް ވިދާޅުވީ އެމަނިކުފާނު އުފަންވެ މަންމާފުޅު ނިޔާވުމާއި ހަމައަށް ދިއްދޫގައި ދިރިއުޅުއްވި ކަމަށާއި މަންމާފުޅު ނިޔާވުމުން މާމާފުޅު އައިސް އެމަނިކުފާނު މާމިގިއްޔަށް ގެންދެވީ ކަމަށެވެ. ގާސިމް ވިދާއަޅުވީ ކުޑައިރުގެ އެދުވަސްވަރުގެ ވާހަކަ ތައް އެމަނިކުފާނުގެ މާމާފުޅުގެ ފަރާތުންނާއި އެހެންގާތްތިމާގެ ބޭފުޅުންގެ ފަރާތުން އަޑުއިވިލެއްވުމުން އެދަތި ނިކަމެތި ދިރިއުޅުއްވުމުގެ އަސަރާއިއެކުއެމަނިކުފާނަށް ވަރަށް ފުންއަސަރުތަކަކާއި އިހުސާސްތަކެއް ކުރުވާ ކަމަށެވެ.
ގާސިމް ވިދާޅުވީ މިނިވަންކަމާއި ޤައުމުގެ އިސްތިގްލާލް ހިމާޔަތްކުރުމަކީ ހުރިހާ ރައްޔިތުންގެ ކޮނޑުގައި އެޅިފައިވާ ޒިންމާއެއްކަމަށެވެ. ގާސިމް ވިދާޅުވީ އިންޑިއާ އާއި ގާތްގުޅުން ކެނޑިގެން ދާން އެއްވެސް ރައްޔިތަކު ބޭނުމެއް ނުވާނެކަމަށާއި، ނަމަވެސް އިންޑިއާގެ އަޅުވެތިކަމަށް ދިއުމަކީ އެއަށްވުރެ ނުރައްކާތެރި ނިކަމެތި ހާލަތެއްކަމަށްވުމާއެކު އެހާލަތަށް ގައުމު ގެންދިޔައީ ގައުމުގެ ވެރިންގެ ގައްދާރުވުމާއެކު ކަމަށެވެ.
ގާސިމް ވިދާޅުވީ މިހާލަތުން އަރާގަތުމުން ހުރިހާ ރައްޔިތުން އެކީ މަސައްކަތް ކުރަންޖެހޭ ކަމަށެވެ.
ދިއްދޫގެ ރައްޔިތުންނާއި މުހާތަބްކުރައްވާ ޖުމްހޫރީ ޕާޓީގެ ޕީޖީ ލީޑަރ އަލީ ހުސައިން ވިދާއަޅުވީ ބޭރުގެ ނުފޫޒުން ސަލާމަތްވުމަށް މަސައްކަތް ކުރުމަކީ އަބަދުވެސް ކުރަންޖެހޭ ކަމެއްކަމަށާއި އެއީ ގައުމުގެ ކޮންމެ ދަރިއެއްގެވެސް ޒިންމާއެއް ކަމަށެވެ. އަލީ ހުސައިން ވިދާޅުވީ މިވަގުތު ކުރަންޖެހޭ އެންމެ މުހިންމު ކަމަކީ ގައުމުގެ މިނިވަންކަން ދިފާއުކޮށްދޭ ގާބިލް ވެރިޔަކު ހޮވުންކަމަށާއި އެކަމަށް އެންމެ ގާބިލް ކެންޑިޑޭޓަކީ ގާސިމް އިބްރާހިމް ކަމެވެ.
ދިއްދޫގެ ރައްޔިތުންނާއި ބައްދަލުކުރުމަށް ބޭއްވި ބައްދަލުވުމުގައި ޤާސިމްގެ ސްޕެސަލް އެޑްވައިޒަރ އަހްމަދު ނިހާން ވިދާޅުވީ ގާސިމްއަކީ ރާއްޖޭގެ ހުރިހާ ރަށެއްގެ ދަރިއެއްކަމަށާއި ރާއްޖޭގެ ހުރިހާ ރަށަކަށް އެމަނިކުފާނުގެ ދީލަތިއެހީތެރިކަން ފޯރުކޮށްދީފައިވާކަމަށާއި ރާއްޖޭގެ ހުރިހާ ރަށެއްގެ ރައްޔިތުންނާއިވެސް ގާތްގުޅުމެއް ބާއްވަވާ ބޭފުޅެއްކަމަށެވެ.
