ގައްދޫ ރައްޔިތުން އެންމެ ބޮޑަށް އުންމީދު ކުރާ ގައްދޫ ހޮސްޕިޓަލްގެ މަސައްކަތް ހަގީގަތަކަށް ހަދައި ގަމަކީ ގައްދޫ ރައްޔިތުންގެ ތަނެއްގެ ގޮތުގައި ހަދާދެއްވާނެކަމަށް ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި ގދ.ގައްދޫއަށް ޑރ.މުއިއްޒު މިއަދު ހެނދުނު ވަޑައިގެންނެވުމުން އެރަށުން ވަނީ ހޫނު މަރުހަބާއެއް ދަންނަވާފައެވެ. ގައްދޫގައި ބޭއްވި ޖަލްސާގައި މުއިއްޒު ވިދާޅުވީ ގައްދޫ ރައްޔިތުންނަށް ރައީސް ޔާމީން ތަރައްޤީގެ ބޮޑެތި މަސައްކަތްތަކެއް ކުރެއްވި ކަމަށެވެ. ނަމަވެސް އޭގެ ފަހުން ތަރައްޤީގައި ގައްދޫ ދަނީ ފަހަތަށް ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ގައްދޫ ރައްޔިތުން އެދޭ އުންމީދުތައް ހާސިލް ކުރުމަށް ޕީޕީއެމް، ޕީއެންސީގެ ޓީމުން މަސައްކަތް ކުރާނީ ވެރިކަމާއި ހަވާލުވެ ސައުވީސް ގަޑިއިރުގައިކަމަށެވެ. މުއިއްޒު ވިދާޅުވީ ގައްދޫ ރައްޔިތުން އެންމެ ބޭނުންވާ ގޮތަށް ގަމަކީ ގައްދޫ ރައްޔިތުންގެ ތަނެއްގެ ގޮތުގައި ހަދާ މުޅި އަތޮޅަށް ނަފާ ލިބޭނެ ރަށަކަށް އެރަށް ހަދާނެކަމަށެވެ. އަދި އިޤްތިޞާދީ މައި ތަނަކަށް ގަން ހަދައި ބޮޑެތި މަންފާ ލިބޭނެ ތަނަކަށް ގަން ހަދާނެ ކަމަށެވެ.
ރައްޔިތުން އެދޭގޮތަށް ރައްޔިތުންގެ އުންމީދުތައް ހާސިލް ކުރުމަށް ރެއާއި ދުވާލު މަސައްކަތް ކުުރާނަން. މުޅި ޕީޕީއެމް، ޕީއެންސީ ލީޑަރޝިޕް އޮތީ އެރޫހުގައި. ޚިދުމަތް ދިނުމުގައި އަޅުގަނޑުމެން އޮތީ އެއް ރޫހެއްގައި.
– މުއިއްޒު ވިދާޅުވިއެވެ.
މުއިއްޒު ގައްދޫއަށް ވެވަޑައިގެންނެވި ވައުދުތައް:
– ގަމަކީ ގައްދޫ ރައްޔިތުންގެ ތަނަކަށް ހަދާނަން
– ގައްދޫގެ ހޮސްޕިޓަލް ހަގީގަތަކަށް ހަދާދޭނަން
– ބޯހިޔާ ވަހިކަމަށް ބޭނުންވާ ކަންކަން ފަހިކޮށްދޭނަން
– އެއާޕޯޓަކީ ފުރިހަމަ ކުރެވިފައިވާ އެއާޕޯޓަކަށް ހަދާ ދޭނަން
– ސާފިސް ޓޫރިޒަމް ފުޅާކޮށް، އޭގެ ނަފާ ރައްޔިތުންނަށް ކުރާނެ މަގު ފަހިކޮށްދޭނަން
– އިތުރު ރިސޯޓައް ގައްދޫ ކައިރިއަށް ގެނެސް އިޤްތިސާދީ ބާރުވެރިކަން އިތުރު ކުރާނަން
މުއިއްޒު ވިދާޅުވީ ރާއްޖޭގެ ރައްޔިތުން މިދަނޑިވަޅުގައި ވިސްނުންތެރި ކަމާއިއެކު އިސްކުރަންވީ ތަރައްޤީއާއެކު ކުރިއަށް ދާނީތޯ ނޫނީ ތަރައްޤީ މަޑު ޖައްސާލާނީތޯ ކަމަށެވެ. ރައީސް ޔާމީނާއި ޕީޕީއެމް، ޕީއެންސީގެ ފިކުރަކީ ރާއްޖޭގެ އެއްވެސް ރައްޔިތަކު ތަރައްޤީގައި ޝައްކު އުފައްދާނެ ފިކުރެއް ނޫންކަމަށެވެ. ގައްދޫ ރައްޔިތުންނަށްވެސް ބޭނުންވާ ތަރައްޤީ ހާސިލްކޮށްދޭނީ ރައީސް ޔާމީންގެ ފިކުރުންކަމަށް މުއިއްޒު ވިދާޅުވިއެވެ.
PPM PNC ge Riyaasy Candidate Dr. Mohamed Muizzu Gdh Gadhdhoo ah vadaigathun @MMuizzu#Vote4Muizzu#DrMuizzuSembe2023#DhiveheengeRaajje#FreePresidentYameen pic.twitter.com/bRiOo339cC
— Progressive Party of Maldives (@ProgressPartyMV) August 27, 2023
މުއިއްޒު ވިދާޅުވީ ގައްދޫގެ ޒުވާނުންނާއި، ގައްދޫގެ މުޅި ރައްޔިތުންނަށް އުފާވެރި ދުވަސްތަކެއް ހޯއްދަވައި ދެއްވާނެކަމަށެވެ. އަދި ރައީސް ޔާމީން މިނިވަން ކުރުމަށް ކުރެވޭ މަސައްކަތުގައި މިއިންތިޚާބަކީ ކުރެވޭ އެންމެ ބޮޑު މަސައްކަތް ކަމަށް މުއިއްޒު ވިދާޅުވިއެވެ. އިންތިޚާބު ޕީޕީއެމް، ޕީއެންސީއަށް ކާމިޔާބުކޮށް ރައީސް ޔާމީން މިނިވަން ކުރާނެ ކަމުގެ އުފާވެރި ޚަބަރު މުއިއްޒު ވަނީ ދެއްވާފައެވެ.
