ޢަރަބި އިސްލާމީ ޤައުމުތަކުގެ ރައްޔިތުން ކައިގެން ތިބިހާ ހިނދަކު ދިވެހި ރައްޔިތުން ބަނޑަށް ނުޖެހޭނެ ކަމަގެ ޔަގީންކަން އެބައޮތް ކަމުގައި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ރިޔާސީ ކެމްޕޭންގައި ރޭ ފުވައްމުލަކުގައި ބޭއްވި ޖަލްސާގައި ވާހަކަ ދައްކަވަމުން ޑރ.ޝަހީމް ވަނީ ރާއްޖެއާއި ޢަރަބި އިސްލާމީ ޤައުމުތަކާއި ދެމެދު އޮތް ގުޅުމުގެ މައްޗަށް އަލި އަޅުވާލައި ވާހަކަ ދައްކަވާފައެވެ. އިސްލާމިކް މިނިސްޓަރު ކަމުގައި ހުންނެވި އިރުގައާއި، މިހާރުވެސް ޝަހީމަކީ ޢަރަބި އިސްލާމީ ޤައުމުތަކައި ގާތް ގުޅުމެއް ބާއްވާ އިސްލާމީ ލީޑަރެކެވެ.

އަރަބި ގައުމުތަކުގެ ތެޔޮ ހޮޅިތައް ކާށިދޫ ކަނޑުން ނެރެން ޖެހުނަސް އަޅުގަނޑުމެން އެކަން ކުރާނަން އިރާދަކުރެއްވިއްޔާ. މި ދެންނެވީ ތެޔޮ ހޮޅިތައް ގެންނަ ވާހަކައެއް ނޫން. އަރަބި އިސްލާމީ ގައުމުތަކުގެ ރައްޔިތުން ކައިގެން ތިބިއްޔާ އަޅުގަނޑުމެން ތިބޭނީ ކައިގެން.

– ޑރ. ޝަހީމް ވިދާޅުވިއެވެ.

ޝަހީމް ވިދާޅުވީ މުއިއްޒުގެ ވެރިކަމެއްގައި ދިވެހި ގައުމުގެ މިނިވަންކަމާއި ސިޔާދަތު ކޮމްޕްރޮމައިޒް ވާ ފަދަ ކަންކަން ނުކުރައްވާނެ ކަމަށާއި ގައުމުގެ މިނިވަންކަން ދަމަހައްޓާނެ ކަމަށެވެ. މި ސަރުކާރުން އިންޑިއާއާ އެކު އޮންނަ ގުޅުމަށް ނުސީދާކޮށް ފާޑުވިދާޅުވަމުން އޭނާ ވިދާޅުވީ ބޭރު ގައުމެއްގެ ސްޓޭޓެއްގެ ގޮތުގައި ދިވެހި ގައުމު އޮޕަރޭޓު ކުރުމަކީ ދިވެހި ބަލައިގަންނާނެ ކަމެއް ނޫން ކަމަށެވެ.

އެފްރިކާގެ ގައުމުތަކާއި ދިވެހިން ދުވަހަކު ވެސް ނުދާ ގައުމަކަށް ވިސާއާ ނުލާ ދެވޭ ގޮތް ނުދޭ ގޮތް ހެދުމަކީ ހާރިޖީ ސިޔާސަތު ވަރުގަދަ ވުން ނޫން ކަމަށާއި އެކަން ވަރުގަދަ ވީ ކަމަށް ވާނީ ދިވެހި ޒުވާން ތައުލީމީ މީހުން ބޭރުގެ މުވައްސަސާތަކުގައި ތިބެގެން ކަމަށް ޝަހީމް ވިދާޅުވި އެވެ.

ޝަހީމް ވިދާޅުވީ މިއީ ތައުލީމީ ޤާބިލް ބޭފުޅަކަށް ބަލައި ޤައުމުގެ މިނިވަންކަން ދިފާއު ކުރުމަށް ޑރ. މުއިއްޒު ހޮވަންވީ ފަހަރު ކަމުގައެވެ.