ދައުލަތުގެ މީޑިއާ ޕީއެސްއެމްގެ މުވައްޒިފުންނަށް އަޅާދޭން ވައުދުވި ފްލެޓް އަޅާދީ، ކުރީގެ ރައީސް ޔާމީންގެ ވެރިކަމުގައި ހިޔާ ފްލެޓުން ފްލެޓް ލިބުނު މުވައްޒިފުންނަށް އެފުލެޓްތައް އިޔާދަ ކޮށްދެއްވާނެކަމަށް ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭންގައި މިރޭ ފުވައްމުލަކުގައި ބޭއްވި ޖަލްސާގައި ވާހަކަ ދައްކަވަމުން މުއިއްޒު ވަނީ ރާއްޖޭގެ ބޯހިޔާވަހިކަން ކަށަވަރު ކޮށްދެއްވުމަށް ވެވަޑައިގެންނެވި ވައުދުތަކާއި ގުޅިގެން ސަރުކާރުގެ ކުންފުނިތަކާއި މުވައްސަސާތަކުން އެކަންކަމުގެ ހުރި ކަންބޮޑުވުންތައް ހިއްސާ ކުރަމުންދާކަމަށެވެ. އެގޮތުން އެންމެ ބޮޑަށް ޝަކުވާ ލިބުނު އެއް ކުންފުންޏަކީ ދައުލަތުގެ މީޑިއާ ޕީއެސްއެމް ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ރައީސް ޔާމީންގެ ވެރިކަމުގައި ހިންގި ހިޔާ މަޝްރޫޢުގެ ދަށުން ފްލެޓް ލިބުނު ލިޔުންދިން ޕީއެސްއެމްގެ މުވައްޒިފުންގެ ފްލެޓްތައް މިސަރުކަރުން އަތުލިކަމަށެވެ. އަދި ޕީއެސްއެމްއާއި ހަވާލުކުރި ހިޔާ ފްލެޓް މަޝްރޫޢަށް އަދާހަމައަށްވެސް ވީގޮތެއް ނޭގޭކަމަށެވެ. މިއީ މިސަރުކާރުން ޕީއެސްއެމްގެ މުވައްޒިފުންނަށް ވެފައިވާ ބޮޑު އިހުމާލެއްކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ދައުލަތުގެ މީޑިއާގެ މުވައްޒިފުންގެ ތެރެއިން އަތުލި ފުލެޓްތައް ދެއްވާނެކަމަށެވެ. އަދި ގެއްލުނު ފްލެޓް އަޅައި ދެއްވައި މުވައްޒިފުންގެ ބޯހިޔާވަހިކަން ކަށަވަރު ކޮށްދެއްވާނެކަމަށެވެ. އަދި މުވައްޒިފުންނާއިމެދު ޢަމަލުކުރަމުންދާ ގޮތްތައް އިންސާފުގެ މަގަށް ބަދަލުކޮށް، ވަޒީފާގެ ކުރިއެރުމާއި އިނާޔަތާއި އެނޫން ކަންބޮޑުވުންތަކަށްވެސް ހައްލު ގެނެސްދެއްވާނެ ކަމުގެ ޔަގީންކަން މުއިއްޒު ވަނީ ދެއްވާފައެވެ.
މީގެ އިތުރުން މުއިއްޒު ވަނީ ސިފައިންނާއި ފުލުހުންގެ ފްލެޓްތައް މިސަރުކާރުގެ ފަސް އަހަރު ނިމުނުއިރު ނިންމަނީ ނިންމަނީއެއްގައި ހުރިކަން ފާހަގަކޮށްފައެވެ. މުއިއްޒު ވިދާޅުވީ ވެރިކަމައި ހަވާލުވެ ކުޑަ ދުވަސްކޮޅެއްގެ ތެރޭގައި އެފްލެޓްތައް ނިންމައި އިތުރު ފްލެޓްތައް ސަލާމަތީ ބާރުތަކުގެ މުވައްޒިފުންނަށް ކަށަވަރު ކޮށްދެއްވާނެކަމަށެވެ.
