ކިންގް ފޮރެކްސް ކުންފުނީގެ ނަމުގައި، ރައްޔިތުންގެ މަޖިލިހުގެ ކުރީގެ މެމްބަރު އަލްހާން ފަހުމީ ހިންގަމުންދާ ކުންފުނިން ގަނޫނާއި ޚިލާފަށް އިންވެސްޓްމަންޓް ސްކީމެއް އުފައްދާ ގިނަބައެއްގެ އަތުން ފައިސާ ނަގާފައިވާކަމަށް ތުހުމަތުކުރެވޭ އްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީ ޕާސްޕޯތް ހިފަހައްޓައިފިއެވެ.
ފުލުހުން ބުނީ ބަލަމުން އަންނަ މައްސަލައަކާއި ގުޅިގެން އަލްހާން ފުރުން މަނާކޮށް ކޯޓުން ޢަމުރެއް ނެރެފައިވާކަމަށެވެ. ނަމަވެސް ކޮން މައްސަލައެއްކަމަށް ނުބުނެއެވެ.
ކިންގް ފޮރެކްސް ކުންފުނިން ގިނަބައެއްގެ އަތުން ފައިސާ ނަގައިގެން، ގާނޫނާއި ޚިލާފަށް އިންވެސްޓްމަންޓް ސްކީމެއް ހިންގާ މަނީ ލޯންޑަރ ކުރުމުގެ ތުހުމަތުގައި ފުލުހުންދަނީ ޖިނާއީ ތަހުގީގެއް ކުރަމުންނެވެ. އެ މައްސަލާގެ ތަހުގީގަށް ފާއިތުވެދިޔަ އަހަރުގެ މޭމަހުވެސް އަލްހާންވަނީ ފުލުހަށް ހާޒިރު ކޮށްފައެވެ. އަދި މައްސަލައިގެ ތަހުގީގު ނިންމާ ފަހުން ވަނީ ޕީޖީއަށްވެސް ފޮނުވާފައެވެ.
އަލްހާން އިސްވެ ހުންނަވާ ހިންގި ކިންގްސް ކެޕިޓަލް ހޯލްޑިންސްއިން ވަނީ އިންވެސްޓްކުރުމުގެ ނަމުގައި އެތައް ބައެއްގެ އަތުން މިލިއަނުން ފައިސާ ނަގާފާއެވެ. މިކަން މާލީ އިދާރާތަކުގެ ސަމާލުކަމަށް އައުމުން އެ އިދާރާތަކުން ވަނީ މިފަދަ ފަންޑުތަކީ ދެމެހެއްޓެނެވި ގޮތެއްގައި ހިންގޭނެ ފަންޑުތަކަށް ނުވާތީ އެ ފަންޑަށް ފައިސާ ނުދިނުމަށް މާލީ އިދާރާތަކުން އިލްތިމާސްކޮށްފައި ވެއެވެ.
އެހެންނަމަވެސް އަލްހާނާ އޭނާގެ ޓީމުން ދިޔައީ މާލީ އިދާރާތަކަށް ގޮންޖަހާ އެ ފަންޑު ނުހުއްޓުވޭނެކަމަށް ބުނަމުންނެވެ. އަދި އިންވެސްޓްކުރި މީހުންނަށް ފައިސާ ދޭނެކަމަށް ބުނަމުންދިޔައެވެ.
ފައިސާ ނުދެވި ލަސްވުމުން ގެއްލުމުގެ ބަދަލުގެ ގޮތުގައި އިންވެސްޓްކުރި ފައިސާގެ 25 ޕަސެންޓް އިތުރަށް ދޭނެކަމަށްވެސް އަލްހާންގެ ޓީމުން ކުރިން ބުނެފައިވެއެވެ. އެހެންނަމަވެސް މިހާތަނަށްވެސް އިންވެސްޓްކުރި ގިނަ ބަޔަކަށް ފައިސާ ލިބިފައެއް ނުވެއެވެ.
އިންވެސްޓަރުން އެމީހުންގެ ފައިސާ އަނބުރާ ދިނުމަށް އެދުމުންވެސް ފައިސާ ނުދީ އަލްހާނާ އޭނާގެ ޓީމުން މިހާތަނަށްވެސް ވަނީ ތަކުރާރުކޮށް ތަފާތު އެކި ބަހަނާތައް ދައްކާފައެވެ.
އަދި އެކަމާއި ދެކޮޅަށް ވާހަކަދައްކާ މީހުން ކިންގްސް އިންވެސްޓަރުންގެ ނަމުގައި އުފައްދާފައިވާ ގްރޫޕުން ކުރިން ވަނީ ބްލޮކްވެސް ކޮށްފައެވެ. އެއަށްފަހުވެސް، ފޭސް 2 ގެ ނަމުގައި އަލުން ޕެކޭޖްތަކެއް އިއުލާންކޮށް މީހުން އަތުން ދެވަނަ ފަހަރަށް ފައިސާ ނެގުމުގެ މަސައްކަތްވެސް އަލްހާނާއި އޭނާގެ ޓީމުން ވަނީ ކޮށްފައެވެ.
