ރާއްޖޭގެ ރައީސުލްޖުމްހޫރިއްޔާކަމުގެ މަޤާމަށް އިބްރާހީމް މުޙައްމަދު ޞާލިޙް އިތުރު ދައުރަކަށް ގެނައުމަށް އިންޑިއާއިން ކޮންމެހެންވެސް ބޭނުންވާކަމަށާއި، ހަމައެގޮތަށް ދެވަނަ ދައުރަކަށް ވަޑައިގަތުމަށް ރައީސް ޞާލިޙްވެސް ބޭނުންފުޅުވާކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހީމް ވިދާޅުވެއްޖެއެވެ.
ކެމްޕެއިންގައި އދ.އޮމަދޫގައި ވާހަކަފުޅު ދައްކަވަމުން ޤާސިމް ވަނީ ކުރީގެ ސަރުކާރުތަކަށް ވަރަށް ބޮޑަށް ފާޑުވިދާޅުވެ ވާހަކަފުޅު ދައްކަވާފައެވެ. ޤާސިމް ވިދާޅުވީ ރައީސް މުޙައްމަދު ވަޙީދުގެ ސަރުކާރުގެ 2 އަހަރު ފިޔަވައި ހުރިހާ ވެރިކަމެއްގައިވެސް އެމަނިކުފާނާމެދު ޢަމަލުކުރެއްވީ ވަރަށް ނިކަމެތިކޮށްކަމަށެވެ. ޤާސިމް ވިދާޅުވީ ވެރިކަމުގެ ދެވަނަ ދައުރަކަށް ރައީސް ޞާލިޙް ވަޑައިގަތުމަށް ވަރަށް ވިޔާނުދާ "ހަޑިހުތުރު" ކަންކަން ކުރައްވަމުން ގެންދަވާކަމަށެވެ. އެގޮތުން ދައުލަތުގެ މުދާ ބޭނުންކުރައްވައިގެން އަމިއްލަފުޅު ކެމްޕެއިންގައި ބޭނުންކުރައްވަމުން ގެންދަވާކަމަށް ތުހުމަތުކުރައްވާ ޤާސިމް ވިދާޅުވީ، އިންތިޚާބާއި ދިމާކޮށް ރަށްރަށުން ދައުލަތަށް ނުކަތާވަރަށް ވަޒީފާ ދެމުން އަންނަކަމަށެވެ. އެކަމުގެ ސަބަބުން އެރަށްރަށުން މަހަށް ދާނެ މީހަކުވެސް ނުވާކަމަށް ޤާސިމް ވިދާޅުވިއެވެ. ޤާސިމް ވަނީ ވަގުތީ އުފަލަށްޓަކައި އެކަންކަން ނުކުރުމަށް ޒުވާނުންނަށް ގޮވާލައްވާފައެވެ.
ދައުލަތުގެ މުދާ މީހުންލައްވާ އަމިއްލަ ކަންކަންކުރުމަކީ ކަނޑައެޅިގެން މަނާކަމެއް. ގިނަ ރަށްރަށުގައި ފެނަަކައާއި، ސްޓެލްކޯއާއި ރޯޑް ކުންފުނީގެ މުދަލާ މީހުން ބޭނުންކޮށް ކެމްޕެއިން ފުޅާކުރުމަށް ކުރާކަންކަން އެބަފެނޭ. ބޭނުމެއް ނެތް މީހުނަށް ވަޒީފާދީ މަހަށްނުފުރޭ ވަރަށް ވަޒީފާ ދެމުން އެދަނީ. މިކަން ނުދަންނަ މީހަކު ނުހުންނާނެ.
– ޤާސިމް ވިދާޅުވިއެވެ.
ޤާސިމް ވިދާޅުވީ 8 ހާސް ނުވަތަ 12 ހާސް ރުފިޔާގެ މުސާރައެއް އިންތިޚާބާއި ދިމާކޮށް ދެމުން ދިޔަނަމަވެސް، އިންތިޚާބު ވުމަށްފަހު އެ ހުރިހާ ކުދިންގެ ވަޒީފާތައް ގެއްލޭނެކަމަށެވެ. އެކަން ކުރާނީ ދައުލަތުގެ ޚަރަދުކުޑަކުރަން މަޖުބޫރުވެގެންކަމަށް ވިދާޅުވެ ޤާސިމް ސަރުކާރަށް ފާޑުވިދާޅުވިއެވެ. ޤާސިމް ވިދާޅުވީ މިހާރުވެސް ސަރުކާރުން މުސާރަ ދެމުން އަންނަނީ ދަރަންޏަށް ނަގައިފާ ފައިސާއިންކަމަށެވެ.
ޤާސިމް ވިދާޅުވީ ސިޔާސީ ވިސްނުމާ ފިކުރަށް ނުބައްލަވާނެކަމަށް ރައީސް ޞާލިޙް ވިދާޅުވިނަމަވެސް، އެހެން ފިކުރެއްގެ ކެންޑިޑޭޓަކު ރަށަކަށް ވަޑައިގަތުމުން، ސަރުކާރުގެ ނުފޫޒާއި ގުޅިގެން ސަލާމް ކޮށްލަންވެސް ދާން ނުކެރޭކަމަށެވެ.
އަމިއްލައަށްވީ ވައުދާ އަހުދު ކޮބާ؟ ރައްޔިތުންނަށް ވާ ބޮޑު ޚިޔާނާތެއް އެއީ. ވަރަށް ބޮޑު އޮޅުވާލުމާ މަކަރުވެރިކަމެއް.
– ޤާސިމް ވިދާޅުވިއެވެ.
ޤާސިމް ވިދާޅުވީ ރާއްޖޭގެ 4 ދިމާލެއްގައި އިންޑިއާ ސިފައިން އެބަތިބިކަމަށެވެ. އަދި ރައީސް ޞާލިޙް ވެރިކަމަށް ގެނައުމަށް އިންޑިއާއިން ކޮންމެހެންވެސް ބޭނުންވާކަމަށާއި، ރައީސް ޞާލިޙްވެސް ކޮންމެ ހާލެއްގައި ވެރިކަމަށް ވަޑައިގަތުމަށް މަސައްކަތްކުރައްވާކަމަށް ޤާސިމް ތުހުމަތުކުރެއްވިއެވެ.
ޤާސިމް ވިދާޅުވީ ރާއްޖޭގެ ސްޓޭންޑް ބަދަލުކޮށް މޮރީޝަސް ސަރުކާރަށް ސިޓީ ފޮނުވައި، ރާއްޖޭގެ ކަނޑު 500 މިލިއަން ޑޮލަރަށް ވިއްކާލިކަމަށް ބައެއް ފަރާތްތަކުން ތުހުމަތުކުރާކަމަށެވެ. ރާއްޖޭގެ ކަނޑުގެ ސަރަހައްދަކީ އެއަށްވުރެ މާ އަގުބޮޑު ތަނެއްކަމަށް ވިދާޅުވެ ރައީސް ޞާލިޙަށް ޤާސިމް ފާޑުވިދާޅުވިއެވެ.
މީގެ އިތުރުން ދައުލަތުގެ ދަރަނި ބޮޑުވެފައިވާކަމަށާއި، ދަރަންޏަށް ނެގި ފައިސާ ރަނގަޅު ގޮތުގައި ހޭދަކުރެއްވިނަމަ ގިނަ މަޝްރޫޢުތައް ނިމުނީސްކަމަށް ޤާސިމް ވިދާޅުވިއެވެ.
ޤާސިމް ވިދާޅުވީ ސަރުކާރުގެ މެޖޯރިޓީ އޮވެ މަޖިލިސް ހުއްޓުވާފައިވަނީ ގަސްތުގައިކަމަށެވެ. މި ހުރިހާކަމަކަށް ބަލައި ސެޕްޓެމްބަރު 9 ގައި ވޯޓުލާންވީ އެމީހެއްގެ މާޒީއަށްބަލައި އެންމެ ރަނގަޅު ކެންޑިޑޭޓަށްކަމަށް ޤާސިމް ވިދާޅުވިއެވެ.
