ރާއްޖެ މިއަދު އޮތް އަޅުވެތި ހާލަތުންނާއި، ދަރަނީގެ ދަންތުރައިން ސަލާމަތް ކުރުމަށް އެންމެ ބޮޑަށް ވިސްނައި ފިކުރު ކުރަންޖެހޭ ބަޔަކީ އެމްޑީޕީގެ ޢާންމު މެމްބަރުން ކަމުގައި ޕީއެންސީގެ ރިޔާސީ ކެންޑިޑޭޓްގެ ރަނިންމޭޓް ހުސެއިން މުހައްމަދު ލަތީފް (ސެމްބެ) ވިދާޅުވެއްޖެއެވެ.
މިއަދު ހެނދުނު ތ.މަޑިފުއްޓަށް ވަޑައިގެން މަޑިފުށީގައި ބޭއްވި ކެމްޕޭން ޖަލްސާގައި ވާހަކަ ދައްކަވަމުން ސެމްބެ ވިދާޅުވީ ބޭރު ޤައުމެއްގެ އަސްކަރީ ސިފައިން ރާއްޖޭގައި، ތިބުމާއި، ރާއްޖޭގެ ކަނޑުގެ ބައެއް ވިއްކާލުމާއި ބޮލަކަށްޖެހޭ ދަރަނި އޮތް ހާލަތައިމެދު ޤައުމުގެ ކޮންމެ ދަރިޔަކުވެސް ކަންބޮޑުވާނެކަމަށެވެ.
ރާއްޖޭގެ އިސްލާމް ދީނާއި، ދިވެހިންގެ މިނިވަންކަން ދެމެހެއްޓުމަކީ ކޮންމެ ދިވެހި ރައްޔިތެއްގެވެސް ޤައުމީ އަދި ދީނީ ވާޖިބަކަށްވާއިރު އެމނިވަންކަން ހޯދުމަށް ކުރަންޖެހިފައިވާ މަސައްކަތާއިމެދު ވަކި ފިކުރަކަށްވީތީ ނުވިސްނައި ފިކުރުނުކޮށް ކިޔާހާ އެއްޗަކަށް އާބަސް ބުނަން ނުތިބުމަށް ސެމްބެ ވަނީ ގޮވާލާފައެވެ. ޤައުމު މިހާރު އޮތް ހާލަތުން އެހެން ހަލަތަކަށް ގެންވޭނީ އެމަގުން އެމްޑީޕީގެ އާންމު މެމްބަރުންވެސް ވިސްނައި ޤައުމުގެ ހާލަތު ބަދަލުކުރުމަށް މަސައްކަތް ކޮށްގެންކަމަށް ސެމްބެ ވިދާޅުވިއެވެ.
އަޅުގަނޑުމެންގެ އެކުވެރިން އެމްޑީޕީގައި ތިބީ. މިޤައުމު އޮތް ހާލަތައިމެދު އެމްޑީޕީ މެމްބަރުން ވިސްނަންޖެހޭ. ޤައުމުގެ ދަރަނި އޮތް ހާލަތާއި، މިނިވަންކަމަށް ބުރޫ އަރާފައިވާ މިންވަރާއިމެދު ޤައުމީ ނަޒަރަކުން ވިސްނަންޖެހޭ.
– ސެމްބެ ވިދާޅުވިއެވެ.
އޭނާ ވިދާޅުވީ ރައީސް ޔާމީން އަކީ ރާއްޖޭގެ މިނިވަންކަމައި ސިޔާސަތަށް ކުޑަވެސް ބުރުލެއް އަރާފަދަ ކަމެއް ވުމަށް ޖާގަ ނުދެއްވައި މިނިވަންކަން ހިފެހެއްޓެވި ބަތަލެއް ކަމަށެވެ. ހަމަ އެއާއިއެކު ޤައުމު އިގުތިސާދު ދުވަހަކުވެސް ނުދާ މިންވަރަށް މައްޗަށް ޖައްސައި ބޮޑު ރިޒާވްއެއް ހިފެހެއްޓެވި ރައީސެއް ކަމަށެވެ.
ރައީސް ޔާމީން ދިވެހި ގައުމަށްކޮށްދެއްވި އަގުނު ކުރެވޭ ޚިދުމަތަށްޓަކައި އެމަނިކުފާނު މިނިވަން ކުރުމަށް ކުރެވޭ އެންމެ ބޮޑު މަސައްކަތަކީ ސެޕްޓެމްބަރު މަހުގެ 9 ވަނަ ދުވަހު ލާ ވޯޓުކަމަށް ސެމްބެ ވިދާޅުވިއެވެ. އޭނާ ވިދާޅުވީ މިއިންތިޚާބު ފަސޭހަ އެއްބުރުން ކާމިޔާބު ކުރެވޭނެ ކަމާއިމެދު މިހާރު ޝައްކު ނުކުރައްވާކަމަށެވެ. ނަމަވެސް ރައްޔިތުން މިއީ ޤައުމީ ކަމއްގެ ގޮތުގައި ދެކި މަސައްކަތް ކުރުމަށް ސެމްބެ ވަނީ އެދިވަޑައިގެންފައެވެ.
