ކުރިއަށް އޮތް ރިޔާސީ އިންތިހާބު ކާމިޔާބުކޮށް، ވެރިކަމަށް ވަޑައިގެންފި ނަމަ، ށ. ފުނަދޫގެ އެއާޕޯޓު ތަރައްގީކޮށް ދެއްވާޏެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
އަންނަ ސެޕްޓެމްބަރު 9 ގައި އޮންނަ ރިޔާސީ އިންތިހާބުގެ ކެމްޕެއިނަށް ށ. އަތޮޅަށް ކުރައްވާ ދަތުރުގައި ފުނަދޫގައި ބޭއްވި ޖަލްސާގައި މުއިއްޒު ވިދާޅުވީ އެމްޑީޕީގެ ސަަރުކާރުން ފަސް އަހަރު ފުނަދޫ އަށްވީ ބޮޑު އިހުމާލެއް ކަމަށެވެ. ކުރީގެ ރައީސް ޔާމީން އަބްދުލްގައްޔޫމްގެ ޒައާމަތުގައި އެއާޕޯޓް މަޝްރޫއު ނިމުމުން މި ވެރިކަމުގައި ފުނަދޫއަށް އެއްވެސް އަމަލީ މަސައްކަތެއް ކޮށްދެއްވާފައި ނުވާކަމަށާއި އެއާޕޯޓް އިތުރަށް ތަރައްގީ ނުކޮށް ހުރުމަކީ ދެރަކަމެއް ކަމަށް ވެސް ޑރ.މުއިއްޒު ވިދާޅުވެެފައިވެއެވެ.
ފުނަދޫގެ އެއާޕޯޓަށް އަންނަ ފަތުރުވެރިންނަށް ހިދުމަތްތައް ރަނގަޅު ކޮށްދެއްވަން ޖޭހޭނެ ކަމަށާއި ރޭގަނޑު ޙިދުމަތް ދޭ އެއާޕޯޓަކަށް ފުނަދޫގެ އެއާޕޯޓް ވާންޖެހޭނެ ކަމަށް މުއިއްޒު ވަނީ ވިދާޅުވެފައެވެ.
ފުނަދޫގެ އެއާޕޯޓަކީ ރޭގަނޑު ހިދުމަތް ދޭނެ އެއާޕޯޓަކަށް ވާން ޖެހޭ .ފަސިންޖަރުންނަށް ފަސޭހަތަކެއް ކޮށްދޭން ޖެހޭ.
– މުއިއްޒު ވިދާޅުވިއެވެ.
ށ.އަތޮޅަށް ގިނަ އެއާޕޯޓް ބޭނުންވާ ކަމަށާއި ސަބަބަކީ މި އަތޮޅަކީ ބޮޑު އަތޮޅެއް ކަމުން އާބާދީ ގިނަވެފައި ފަތުރުވެރިން ޒިޔާރަތް ކުރާ އަދަދު ގިނަ ކަމުން ކަމަށް މުއިއްޒު ވަނީ ވިދާޅުވެފައެވެ. ޓޫރިޒަމް އިތުރަށް އުޖާލާވެ ފުޅާވާން ޖެހޭ ކަމަށާއި މި އަތޮޅުގައި ގިނަ ގުނަ މިފަދަ މަޝްރޫއުތައް ހިންގޭނީ އެއާޕޯޓްތައް މި އަތޮޅުގައި ގިނަވި ވަރަކުން ކަމަށް މުއިއްޒު ވަނީ ވިދާޅުވެފައެވެ.
ރިޔާސީ އިންތިޚާބުގައި ށ.އަތޮޅަށް މުއިއްޒު ކުރައްވަމުން ގެންދަވާ ކެމްޕެއިން ދަތުރުތަކުގައި މިއަދު ށ.އަތޮޅު ކޮމަންޑޫ އަދި މިލަންދޫ އަށް ވެސް ވަޑައިގެން ރަށްތަކުގެ ރައްޔިތުންނާ ވާހަކަ ދައްކަވަމުން ވިދާޅުވީ އެއާޕޯޓް ގާއިމް ކޮށްދެއްވާނެ ކަމަށެވެ. އޭގެއިތުރުން ވެސް ފުނަދޫގެ ރައްޔިތުންނަށް މުއިއްޒު ވަނީ ވައުދު ފުއްދާ ދެއްވާނެ ކަމުގެ ފުރިހަމަ ޔަގީން ކަމެއް ދެއްވާފައެވެ.
