ވެރިކަމަށް ވަޑައިގަންނަވަނީ ރައްޔިތުންގެ އެދުންތައް ހާސިލްކޮށް ދިނުމަށް ކަމަށާއި އަމިއްލަ އެދުމެއް ހާސިލް ކުރަން ބޭނުން ނުވާ ކަމަށް ޖުމްހޫރީ ޕާޓީ (ޖޭޕީ) ގެ ރިޔާސީ ކެންޑިޑޭޓު އަދި ލީޑަރު ގާސިމް އިބްރާހިމް މިއަދު ވިދާޅުވެއްޖެއެވެ.
އަންނަ މަހުގެ 9 ގައި އޮންނަ ރިޔާސީ އިންތިހާބުގެ ކެމްޕެއިނަށް ބޮޑުތިލަދުންމަތީގެ ރަށްތަކަށް ގާސިމް ކުރައްވަމުން ގެންދަވާ ދަތުރުގައި ހދ. ކުރިނބީ އަށް ވަޑައިގެން އެ ރަށުގައި ތިބި ސަޕޯޓަރުންނާ ބައްދަލު ކުރައްވައި ގާސިމް ވިދާޅުވީ ވެރިކަމަށް ކުރިމަތިލެއްވީ އަމިއްލަ އެދުމެއް އޮވެގެން ނޫން ކަމަށާއި ބޭނުން ވަނީ ރައްޔިތުންގެ އުންމީދުތައް ހާސިލް ކުރަން ކަމަށެވެ.
"އަޅުގަނޑުމެންގެ ވެސް މިއޮތީ ހަމަ ދިވެހި ލޮބުވެތި ރައްޔިތުންގެ ހިތްޕުޅުގައި އޮތް އެދުންތަކަކާއި އުންމީދުތަކެއް އާލާ ކުރަން. ރޯޝަނީ ކުރަން. ތާޒާ ކުރަން،" ގާސިމް ވިދާޅުވިއެވެ.
ސަރުކާރެއް ވެއްޖެ ނަމަ، ކޮށްދެވުނު ކަންކަމާއި ކޮށްނުދެވޭ ކަންކަން ހުންނަ އިރު، އިތުރަށް ބޭނުންވާ ކަންކަން ވެސް ހުންނާނެ ކަމަށް ގާސިމް ވިދާޅުވިއެވެ. މި ހުރިހާ ކަމަކަށް ވުރެ ބޮޑަށް ދިވެހިން އިސްކަން ދޭން ޖެހޭނީ އަޅުގަނޑުމެންގެ ކާބަފައިން ގެނެސް ދިން ރާއްޖެ އަމާން، އޮމާން ގައުމެއްގެ ގޮތުގައި ދެމިގެން ދިއުން ކަމަށް ވެސް ގާސިމް ވިދާޅުވިއެވެ.
ގާސިމް ވިދާޅުވި ގޮތުގައި އަޅުވެތިކަމުގެ ތެރޭގައި އޮވެގެން އެއްވެސް ގައުމަކަށް އިގްތިސާދީ އަދި އިޖުތިމާއީ ގޮތުން އެއްވެސް ކުރިއެރުމެއް ނުލިބޭނެއެވެ.
ރައްޔިތުންނަށް ކުރިއެރުމެއް ހޯދޭނީ އަބަދުވެސް މިނިވަންކަން އޮވެގެން ކަމަށް ގާސިމް ވިދާޅުވިއެވެ.
