މިއަހަރުގެ އޮކްޓޫބަރު މަސް ނިމުމުގެ ކުރިން ގިރާވަރުފަޅު ހިއްކާ ނިންމުމަށްފަހު މާލެ ރައްޔިތުންނަށް ދޫކުރަން ނިންމާފައިވާ ހުރިހާ ގޯތިތަކެއް އެހާ ތަަނަށް ހަވާލުކުރެވޭނެ ކަމަށް ޕްލޭނިން މިނިސްޓްރީން ބުނެފިއެވެ.
ބިންވެރިޔާ ސްކީމްގެ ދަށުން ޝަރުތު ހަމަވާ 19639 މީހުންނަށް 9000އަށްވުރެ ގިނަ ގޯތި ދޫކުރުމަށް ވަނީ ނިންމާފައެވެ. ގޯތި ލިބޭ މީހުންނަށް ގޯތި ިބޭ ސަރޙައްދު ކަނޑައެޅުމަށް ގުރުއަތު ނެގުން މިހާރު ދަނީ ކުރިއަށެވެ. މި ސްކީމްގެ ދަށުން އެންމެ ގިނަ ގޯތި ދިނުމަށް ނިންމާފައިވަނީ ގިރާވަރު ފަޅުންނެވެ. ގޮތުން އެސަރަޙައްދުން 5000 ގޯތި ދިނުމަށް ކަނޑައަޅާފައިވެއެވެ. މީގެއިތުރުން ގުޅިފަޅުން 2200އަށްވުރެ ގިނަ ގޯތި އަދި ހުޅުމާލެ ދެވަނަ ފިޔަވަހިން 1300އަށްވުރެ ގިނަ ގޯތި ދިނުމަށް ނިންމާފައިވެއެވެ.
ޕްލޭނިން މިނިސްޓްރީން އިއްޔެ ބައެއް ނޫސްތައް ގިރާވަރުފަޅަށް ގެންގޮސް މައުލޫމާތު ދެއްވަމުން ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ މިހާރު މަސައްކަތްތައް ކުރިއަށްދާ ގޮތަށް ބަލާއިރު ގިރާވަރުފަޅު އޮކްޓޫބަރުގެ ނިޔަލަށް ހިއްކާ ނިންމާލެވޭނެ ކަމަށެވެ. އަދި ބިން ހިއްކޭ ވަރަކުން ގޯތި ކަނޑަމުން ދާނެ ކަމުގައިވެސް ވިދާޅުވިއެވެ.
އޭނާ އިތުރަށް ވިދާޅުވީ ރައީސް އިބްރާހީމް މުހައްމަދު ސޯލިހް ވައުދުވެވަޑައިގަތީ މިދައުރު ނިމުމުގެ ކުރިން ގޯތި ހަވާލުކުރުމަށް ކަމަށެވެ. ސަރުކާރުގެ މިހާރުގެ އަމާޒަކީ މިއަހަރުގެ ނޮވެމްބަރު ފަސްވަނަ ދުވަހުގެ ކުރިން ގޯތި ދޫކޮށް ނިންމުން ކަަމަށްވެސް ވިދާޅުވިއެވެ.
އޮކްޓޯބަރގެ ނިޔަލަށް އެއްކޮށް ހިއްކާ ނިމޭނެ. އެކަމަކު އޭގެ ކުރިންވެސް ހިކެމުންދާ ވަރަކަށް އަޅުގަނޑުމެން ގޯތި ކަނޑަމުންދާނީ. ގުޅިފަޅުވެސް ހަމަ އެގޮތައް ދާނީ. މިހާރުވެސް 400 ގޯތި ނެގެން އެބައޮތް. އަދި ހިއްކަން އެބައޮތް. އެހެންވީމަ ހިއްކެމުންދާ ވަރަކަށް ގޯތި ކަނޑަމުންދާނެ.
– އަކްރަމް ކަމާލުއްދީން ވިދާޅުވިއެވެ.
މާލޭގެ ރައްޔިތުންނަށް ޚާއްޞަކޮށްގެން ގޯތި ދިނުމަށް ޚާއްޞަ ޕްރޮގްރާމެއް ސަރުކާރުން ހިންގަމުންދާއިރު، މާލޭގެ ރައްޔިތުންނަށް ގޯތި ދޫނުކުރަތާ މިހާރު ވަނީ އެތައް އަހަރެއް ވެފައެވެ. އެހެންކަމުން މާލެ ސަރަޙާއްދުން ގޯތި ލިބުމަކީ މާލޭގެ ރައްޔިތުންގެ ވަރަށް ދިގު އިންތިޒާރެއްގެ ނިމުމެވެ.
