ކުރިއަށް އޮތް ރިޔާސީ އިންތިހާބު ކާމިޔާބު ކުރެވިއްޖެ ނަމަ، ބޭންކުތަކުން މަސްވެރިންނަށް ލޯން ލިބޭ ގޮތް ފަހިކޮށް ރާއްޖޭގައި މަސް ކާރުހާނާއެއް އަޅަން ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ރޭ ވައުދުވެވަޑައިގެންފިއެވެ.
ރިޔާސީ ކެމްޕެއިނަށް ފ. އަތޮޅަށް ކުރައްވާ ދަތުރުގައި ނިލަންދޫގައި ބޭއްވި ޖަލްސާގައި މުއިއްޒު ވަނީ މަސްވެރިކަމުގެ ސިނާއަތް ކުރިއެރުވުމަށް ވެވަޑައިގެންނެވި ބައެއް ވައުދުތައް އިއުލާން ކުރައްވައިފައެވެ. މަސްވެރި އުޅަނދުތައް ބަނުމަށް ގެންނަ މެޓީރިއަލް އިން ޑިއުޓީ ނަގާތީ އެކަމުގެ ޝަކުވާ ލިބިފައިވާ ކަމަށާއި ވެރިކަމަށް ވަޑައިގެންފި ނަމަ، މަސްވެރިކަމަށް އުޅަނދު ބަނުމަށް ގެންނަ މެޓީރިއަލް އިން ޑިއުޓީ ކަނޑާލާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ މަސްވެރިކަމުގެ ސިނާއަތުގައި މަސައްކަތް ކުރާ މީހުންނަކީ ބޭންކުތަކަށް ގޮސްފި ނަމަ، ލޯން ލިބޭ ބައެއް ނޫން ކަމަށެވެ. ލޯން ނުލިބެނީ އެމީހުންނަކީ މުވައްޒަފުންގެ ގޮތުގައި ބޭންކުތަކުން ބަލައިނުގަންނާތީ ކަމަށް މުއިއްޒު ވިދާޅުވިއެވެ.
މިސާލަކަށް ސިވިލް ސާވިސް މުވައްޒަފުން، އެހެން ސެކްޓަގެ މުވައްޒަފުން ދިޔައީމަ ލިބޭ ލޯންތައް ހުރޭ. ނަމަވެސް މަސްވެރިއަކު ލޯނެއް ހޯދަން ދިޔައީމަ ވަރަށް ދަތިތަކެއް ހުރޭ.
– މުއިއްޒު ވިދާޅުވިއެވެ.
މީގެއިތުރުން ދ. އަތޮޅުގެ މާދެލިއަކީ މަސް ކިރުވައި އަދި މަސް ބަންދު ކުރާ ކާރުހާނާއަކަށް ބަދަލުކޮށްލާނެ ކަމަށް އޭނާ ވިދާޅުވިއެވެ.
މަސްވެރިންގެ ކޯޕަރޭޓިވް ސޮސައިޓީއެއް ގާއިމުކޮށ،ް އެ ސޮސައިޓީއަކީ މިފްކޯގެ ހިއްސާދާރަކަށް ހަދައި އެ ސޮސައިޓީގެ ފަރާތުން މިފްކޯގެ ބޯޑްގައި މެމްބަރަކު ހުރެވޭނެ ގޮތް ހަމަޖައްސަވާނެ ކަމަށް ވެސް މުއިއްޒު ވިދާޅުވިއެވެ.
