ރައީސް ޔާމީންގެ ވެރިކަމުގައި މާލެ ސަރަހައްދުގެ ބޯހިޔާވަހިކަމަށް ކަށަވަރު ކުރުމަށް ރައީސް ޔާމީން ގެންގުޅުއްވި ކޮތަރުކޮށީގެ ކޮށި ވިސްނުން ބަދަލު ކުރެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުކަމަށް ޓޫރިޒަމް މިނިސްޓަރ ޑރ.މައުސޫމް ވިދާޅުވެއްޖެއެވެ.

ހިޔާ މަޝްރޫއަކީ ކުރީގެ ރައީސް ޔާމީންގެ ސަރުކާރުގައި ހުޅުމާލޭ ދެވަނަ ފިޔަވަހީގައި ފެށި އެންމެ ފުރަތަމަ އެެއް މަޝްރޫއެވެ. މިމަޝްރޫއަށް 430 މިލިއަން ޑޮލަރު ހޭދަކޮށްފައިވެއެވެ. ހިޔާ މަޝްރޫއުގެ ދަށުން އަޅާފައިވާ 16 ޓަވަރުގައި ހިމެނެނީ ދެ ކޮޓަރީގެ އެޕާޓްމެންޓެވެ. ރައީސް ޔާމީންގެ ސަރުކާރުގައި މިފްލެޓްތަކުގެ ބޮޑު ބައި ނިންމައި ރައްޔިތުންނާއި ހަވާލު ކުރުމުގެ މަސައްކަތް ފެށި ނަމަވެސް ވެރިކަން ލިބުމުން އެމަސައްކަތް ކުރީ މިސަރުކާރުންނެވެ.

ނަމަވެސް މިސަރުކާރުގެ ބޮޑެތި ފާޑުކިޔުންތަކާއިއެކު އެތަނުގައި މީހުންނަށް ދިރިއުޅެވޭ ވަރުވީ ވެރިކަން ނިމިގެން ދެ އަހަރަށް ވެފައި ވަނިކޮށެވެ. ޑރ.މައުސޫމް ވިދާޅުވީ ރައީސް ޞާލިހު ވަނީ ކޮތަރުކޮށީގެ ކޮށި ވިސްނުން ގޯތީގެ ތަނަވަސް ވިސްނުމަށް ބަދަލު ކުރައްވާފައެވެ.

ކޮތަރުކޮށީގެ ކޮށިވިސްނުމުން ތަނަވަސް ގޯތީގެ ތަނަވަސް ވިސްނުމަށް! ފަޚުރުވެރި އުފާވެރި ބިންވެރިޔާ! މާލެއާއި ރާއްޖޭގެ ކަންކޮޅުތަކުން! ރައީސް އިބޫގެ ސިޔާސަތުތަކަކީ ރައްޔިތުންނަށް އުފާވެރިަކަން ގެނެސްދޭ، ކޭލިހަމަވާ، ސިޔާސަތުތަކެއް!

– ޑރ.މައުސޫމް ވިދާޅުވިއެވެ.

ބިންވެރިޔާ ސްކީމަށް ހުޅުވާލީ މިދިޔަ އަހަރުގެ ޖޫން މަހުއެވެ. މި ފުރުޞަތުގައި 23000 އަށްވުރެ ގިނަ މީހުން ފޯމު ހުށައެޅިއިރު، ޝަރުތު ހަމަވާ ދާއިމީ ލިސްޓްގައި 19639 މީހުން ގޯއްޗަށް ޝަރުތު ހަމަވާވާކަމަށް ވަނީ ކަނޑައަޅަފައެވެ. މީގެތެރިން މި ދައުރުގަައި 18955 މީހުންނަށް ގޯތި ދޭނެއެވެ.

ފުރަތަމަ ގުރުއަތުލުން ކުރިއަށްގެންދަނީ މި 18955 މީހުންގެއެވެ. ގުރުއަތު ނަގަން މިހާރު ފަށާފައިވާއިރު، ފުރަތަމަ ދެ ދުވަހު ގުރުއަތު ނެގުމުގެ ކަންކަން ކުރިއަށްގެންދަނީ ގަލޮޅު ދަނޑުގައެވެ. އަދި އެއަށްފަހު ގުރު ނެގުން ކުރިއަށްގެންދާނީ ހެންވޭރު ދަނޑުގައެވެ. ގޯތި ލިބުނު މީހުންގެ ތެރެއިން، މިދައުރުގައި ގޯތި ނުދެވޭ 684 މީހުންނަށް ބިން އިތުރަށް ހަމަޖެހުމުން ގޯތި ދެއްވާނެ ކަމަށް ޕްލޭނިން މިނިސްޓްރީން ވިދާޅުވެއެވެ. މި 684 މީހުންނަކީ ކައިވެނިނުކުރާ، އަދި ދަރިންވެސް ނެތް އުމުރުން 18 އަހަރާ 25 އަހަރާ ދެމެދުގެ މީހުންނެވެ.