ސިޔާސީ ވާދަވެރި ފަރާތްތަކުން ޑރ.މުއިއްޒު ރައީސް ޔާމީނަށް ދެރަގޮތެއް ހައްދަވަފާނެކަމަށް ވިދާޅުވެ ދައްކަވާ ވާހަކަތަކަކީ ދޭތެރެ ޖައްސަވަން ދައްކަވާ ވާހަކަތަކެއް ކަމުގައި އިދިކޮޅު ކޯލިޝަން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.

ރިޔާސީ ކެމްޕޭންގައި ދ.ކުޑަހުވަދޫގައި މިރޭ ބޭއްވި ޖަލްސާގައި ވާހަކަ ދައްކަވަމުން އަދުރޭ ވިދާޅުވީ ރިޔާސީ އިންތިޚާބުގައި ޕީޕީއެމް، ޕީއެންސީން ކެންޑިޑޭޓަކު ނެރުނީ ރައީސް ޔާމީންގެ ހައްގުގައި ކަމަށެވެ. ޑރ.މުއިއްޒު އިންތިޚާބު ކާމިޔާބު ކުރެއްވުމަށްފަހު ޤާނޫނީ ހަމަތަކުގެ މަތީން އެންމެ ފުރަތަމަ ކުރައްވާނެ ކަމަކީވެސް ރައީސް ޔާމީން މިނިވަން ކުރެއްވުން ކަމަށް އަދުރޭ ވިދާޅުވިއެވެ. ރައީސް ޔާމީނަށް މިސަރުކާރުން ނުހައްގުން ދެމުންދާ ލާއިނންސާނީ އަނިޔާތަކަކީ އެކަންކަމާއި އިންސާފު އަރާ ހަމަކުރާނެ ކަންތައްތަކެއް ކަމަށް އަދުރޭ ވިދާޅުވިއެވެ.

އޭނާ ވިދާޅުވީ ރައީސް އިބްރާހިމް މުހައްމަދު ޞާލިހު ރައީސް ނަޝީދަށް ހެއްދެވި ގޮތަށް ހައްދަވަފާނެ ކަމަށްބުނެ ރައީސް ނަޝީދު ޑރ.މުއިއްޒަށް ކުރައްވާ ތުހުމަތު ތަކަކީ އެއްވެސް އަސާސެއް ނެތް ފިތުނަ ވެރިކަން އުފެއްދުމަށް ދައްކަވާ ވާހަކަތަކެއް ކަމަށެވެ. އެވާހަކަތަކީ ޕީޕީއެމްގެ ލީޑަރޝިޕާއި އާންމު މެމްބަރުންވެސް ބަލައި ގަންނާނެ ވާހަކަތަކެއް ނޫންކަމަށް އަދުރޭ ވިދާޅުވިއެވެ.

އެއްވެސް ގޮތަކަށް ދޭތެރެ ޖައްސާކަށް އަންނި ބުނާނެ ކަމެއް ނެތް އިބޫ ތިމަންނައަށް ހެދި ގޮތް، މުއިއްޒު ޔާމީނަށް ހަދާނެއޭ. ނަހައްދަވާނެ. އެ ޔަގީންކަން އެބައޮތް.

– އަދުރޭ ވިދާޅުވިއެވެ.

މުއިއްޒު މިރޭ ވެސް ފާހަގަ ކުރެއްވި ގޮތުގައި ވެރިކަމަށް ވަޑައިގެން އެންމެ އިސްކަމެއް ދެއްވައިގެން ގާނޫނީ ހަމަތަކުގެ މަތިން ކުރައްވާނެ އެއް ކަމަކީ ރައީސް ޔާމީން މިނިވަން ކުރުމެވެ. ރައީސް ޔާމީނަކީ ރާއްޖޭގެ ރައްޔިތުންނަށް ތަރައްގީ ގެނެސް ދެއްވި ރައީސް ކަމަށް ވެސް މުއިއްޒު ވިދާޅުވިއެވެ.

މުއިއްޒަށް މިރޭ ކުޑަހުވަދޫން ވަނީ ހޫނު މަރުހަބާއެއް ދަންނަވައިފައެވެ. އޭނާ އަށް މަރުހަބާ ދެންނެވުމަށް ގިނަ އަދަދެއްގެ ބަޔަކު ވަނީ ބަނދަރު ކައިރީގައި ހުންނަ ޕީޕީއެމް ޖަގަހަ ކައިރި އަށް ގޮސްފައެވެ.