މާލޭ ރައްޔިތުންނަށް ދޫކުރާ ގޯތިތަކުގެ ގުރުއަތުލުން މިއަދު ފަށައިފިއެެވެ.
ގަލޮޅު ދަނޑުގައި ގުރުއަތުލުން މިއަދު 11:00 ހާއިރު ކުރިއަށް ގެންދަން ތާވަލްކޮށްފައިވީ ނަމަވެސް ގުރުއަތުލުން ފެށުނީ މިއަދު މެންދުރު 12:15 ހާއިރުއެވެ. ޕްލޭނިން މިނިސްޓްރީން ވަނީ ގޯތި ލިބޭ މީހުން ގުރުއަތު ނެގުމަށް އަންނަންވީ ގަޑިތައް ޕޯޓަލް މެދުވެރިކޮށް އަންގާފައެވެ.
ހައުސިން މިނިސްޓްރީން ގުރު ނެގުން ކުރިއަށް ގެންދަނީ ގަލޮޅު ރަސްމީ ބޯޅަ ދަނޑުގައެވެ. އެޕްލިކޭޝަން ހުށަހެޅި ތަރުތީބުން ގޯތިލުމުގެ ކަންކަން ކުރިއަށްދާ އިރު، ގޯތި ލިބޭ ތަނާއި ޕްލޮޓް ނަމްބަރު ކަނޑައެޅޭނީ ގުރު ނަގައިގެންނެވެ. ސަރުކާރުން ގޯތި ދިނުމަށް ހަމަޖެހިފައި ވަނީ ތިން ތަނަކުންނެވެ.
ބިންވެރިޔާ ސްކީމުން މާލެ ސަރަހައްދުން ގޯތި ލިބޭފަރާތްތަކަށް ލިބޭ ގޯތީގެ ގުރުއަތު ނެގުން މިއަދުން ފެށިގެން ކުރިއަށްދާނެއެވެ. pic.twitter.com/Duuuil2wa2
— Min.of National Planning, Housing & Infrastructure (@MoNPHImv) August 15, 2023
އެއީ ހުޅުމާލެ އާއި ގުޅީފަޅާއި ގިރާވަރުންނެވެ. ހުޅުމާލެ އިން ގޯތި ލިބޭ މީހުން މިއަދު ހަވީރު އިން ކަނޑައަޅައި ދިނުމުގެ މަސައްކަތް ފަށާނެ ކަމަށް ހައުސިން މިނިސްޓްރީން ރޭ ވަނީ ބުނެފައެވެ.
ބިންވެރިޔާ ސްކީމަށް ހުޅުވާލީ މިދިޔަ އަހަރުގެ ޖޫން މަހުއެވެ. މި ފުރުޞަތުގައި 23000 އަށްވުރެ ގިނަ މީހުން ފޯމު ހުށައެޅިއިރު، ޝަރުތު ހަމަވާ ދާއިމީ ލިސްޓްގައި 19639 މީހުން ގޯއްޗަށް ޝަރުތު ހަމަވާވާކަމަށް ވަނީ ކަނޑައަޅަފައެވެ. މީގެތެރިން މި ދައުރުގަައި 18955 މީހުންނަށް ގޯތި ދޭނެއެވެ.
ފުރަތަމަ ގުރުއަތުލުން ކުރިއަށްގެންދަނީ މި 18955 މީހުންގެއެވެ. ގުރުއަތު ނަގަން މިހާރު ފަށާފައިވާއިރު، ފުރަތަމަ ދެ ދުވަހު ގުރުއަތު ނެގުމުގެ ކަންކަން ކުރިއަށްގެންދަނީ ގަލޮޅު ދަނޑުގައެވެ. އަދި އެއަށްފަހު ގުރު ނެގުން ކުރިއަށްގެންދާނީ ހެންވޭރު ދަނޑުގައެވެ.
ގޯތި ލިބޭ މީހުންގެ ތެރެއިން ހުޅުމާލެއިން ގޯތި ލިބުނު މީހުންގެ، ގޯތި ކަނޑާ، ޕްލޮޓް ބެލޭނެ އިންތިޒާމް މިއަދު ހަވީރުން ފެށިގެން ކުރިއަށްދާނެކަމަށް ހައުސިން މިނިސްޓްރީން ވިދާޅުވެއެއެވެ.
