ރާއްޖޭގެ ޓެސްޓް ސިސްޓަމް ރިވިއުކޮށް ޖީއެސްޓީ %3 އަށް ތިރި ކުރަން މި އަހަރުގެ ރިޔާސީ އިންތިހާބުގައި އަމިއްލަ ގޮތުން ވާދަކުރައްވާ ފާރިސް މައުމޫން ވައުދުވެއްޖެއެވެ.

ސަލްޓަންޕާކުގެ ރޭ ބޭއްވި ބައްދަލުވުމެއްގައި ލޯންޗުކުރި ފާރިސްގެ މެނިފެސްޓޯގައި ރިސޯޓްތަކާއި ގެސްޓްހައުސްތައް ވަކި ގިންތި އެއްގެ ގޮތުގައި ތަފާތުކޮށް ކަނޑައެޅުމާއި ގެސްޓްހައުސްތަކުން ނަގާ ޓެކްސް ފައިސާ ކުޑަކުރުން ހިމެނެއެވެ. އަދި ރާއްޖޭގެ ޓެކްސް ސިސްޓަމް ރިވިއުކޮށް ޖީއެސްޓީ ތިން ޕަސެންޓަށް ކުޑަކުރުމާއި އެތެރެކުރާ ބާވަތްތަކުން ނަގާ ޑިއުޓީ ކުޑަކުރުން ވެސް ހިމެނެއެވެ.

އަދި ރަށު ކައުންސިލަށް ސީދާ އާމްދަނީ ލިބޭނެ ގޮތް ފުޅާކުރުމާއި ހެދުމާއި ތައުލީމީ ނިޒާމު އިސްލާހު ކުރުމުގެ ސިޔާސަތު ވެސް ހިމެނެއެވެ. އަދި ރައްޔިތުންގެ މަޖިލީސް އިސްލާހު ކުރުމުގެ ގޮތުން މެމްބަރެއްގެ ހިދުމަތް ރައްޔިތުން އެދޭ ފެންވަރެއްގައި ނުކުރެވޭނަމަ، އެ މެމްބަރެއްގެ އިތުބާރު ނެތްކަމުގެ ވޯޓު ނަގަން ޕެޓިޝަނެއް ހުށަހަޅައި، އޭނާ މަގާމުން ދުރުކުރެވޭނެ އިންތިޒާމު ހަމަޖައްސާނެ ކަމަށް ބުނެފައިވެއެވެ.

ފާރިސްގެ މެނިފެސްޓޯ ވައުދުތައް:

1- ޑިޖިޓަލް އިކޮނޮމީ:

– އެމްއެމްއޭ މެދުވެރިކޮށް ޑިޖިޓަލް ބޭންކިންގ އަށާއި ޑިޖިޓަލް ވޮލެޓަށް ހާއްސަށް ލައިސެންސްއެއް ދޫކުރުމުގެ އިންތިޒާމް ގާއިމް ކުރުން
– ރާއްޖެ ޑިޖިޓަލް ފައިނޭންޝިއަލް ހަބަކަށް ހެދުން
– ޑިޖިޓަލް އެސެޓް އެކްސްޗޭންްޖަތަކެއް ރާއްޖޭގެ އިގްތިސޯދަށް ހުޅުވާލުން
– ޑިޖިޓަލް ކްރިއޭޓިވް ސިނާއަތެއް އުފެއްދުނ

2- އާންމު ދިރިއުޅުމުގެ ހަރަދުތަކަށް ހައްލު ހޯދުން:

– ފެނާއި ކަރަންޓް އަދި ކާޑުގެ ބާވަތްތަކުގެ އަގު ހެޔޮ ކުރުން
– މިހާރު ހުރި ހައުސިންގ ނީޑްސް އަދި ހައުސިންގ ސްޓޮކް ދެނެގަނެވޭ ގޮތަށް ގެދޮރުވެރިކަމަށް ބޭނުން ޖެހިފައިވާ މިންވަރާއި، އަގުތައް ހިފެހެއްޓުމަށްޓަކައި އެފޯޑަބަލް ހައުސިންގގެ އަދަދު އިތުރު ކުރުން

3- އުފެއްދުންތެރިކަން އިތުރުކޮށް ވަރުގަދަ ކުރުން:

– ސްޓާޓް-އަޕް މޯލްޑިވްސް ބްރޭންޑެއް ހެދުން
– ލޯކަލް ބްރޭންޑްތައް އުފައްދައި އެ ފުޅާ ކުރުމަށް އެހީވުން
– ޒަމާނަށް ފެތޭ ވިޔަފާރިތައް ރާއްޖެއަށް ތައާރަފްކޮށް ކުރިއަށް ގެންދިއުން

4- ކުށް ކުރާ މީހުން އިސްލާހް ކޮށް އަނބުރާ ގެއުން:

– މަސްތުވާތަކެތީގެ ރިހެބް، ނަފްސާނީ، ސިއްހީ ފަރުވާ އަދި ޖަލުގައި ހުކުމް ތަންފީޒުކޮށް ބޭރަށް ބަދަލުވާ މީހުންނަށް ރަނގަޅުވުމަށް އެހީތެރިވެދޭ ދިރިއުޅުމުގެ މަހައުލެއް ހެދުމަށް ހާފްވޭ ހައުސްތައް އެޅުން
– އަންހެނުންނަށް ހާއްސަ ރިހެބިލިޓޭޝަން ސެންޓަރުތައް އެޅުން

5- ޖަލަކީ އެންމެ ފަހު ފިޔަވަޅަކަށް ހެދުން:

– ކޮމިއުނިޓީ ސާވިސް އަދި ކޮންމެހެން ހިންގަންޖެހޭ ރިހެބިލިޓޭޝަން ޕްރޮގްރާމްތައް ފަދަ ނޮން ކަސްޓޯޑިއަލް ފިޔަވަޅުތައް ހަރުދަނާ ކުރުން

6- ރިސޯޓްތަކާއި ގެސްޓްހައުސްތައް ވަކި ގިންތިއެއްގެ ގޮތުގައި ތަަފާތުކޮށް ކަނޑައެޅުން:

– ގެސްޓް ހައުސްތަކުން ނަގާ ޓެކްސް ފައިސާ ކުޑަ ކުރުން

7- އާއްމު ރައްޔިތުންގެ އަތުން ނަގާ ޓެކްސްގެ އަދަދު ލުއި ފަސޭހަ ކުރުން:

– ރާއްޖޭގެ ޓެސްޓް ސިސްޓަމް ރިވިއުކޮށް ޖީއެސްޓީ %3 އަށް ތިރި ކުރުން
– އެތެެރެ ކުރާ ބާވަތްތަކުން ނަގާ ޑިއުޓީ ކުޑަ ކުރުން

މީގެއިތުރުން މަޖިލީހުގެ މެމްބަރުންގެ މުސާރައަކީ މަޖިލީހުގެ މެމްބަރުން ކަނޑައަޅާ އެއްޗަކަށް ނުވާނެ ގޮތަކަށް އެކަން އިސްލާހު ކުރުމާއި މަޖިލީހުގައި އަންހެނުންނަށް ހާއްސަ ގޮނޑިތަކެއް ތައާރަފް ކުރުން ވެސް ހިމެނެއެވެ. ފާރިސްގެ މެނިފެސްޓޯގައި ވަނީ ސްޕާގެ ނަމުގައި ހިންގާ ނުރަނގަޅު ތަންތަން ބަންދުކުރުމާއި ބަރަހަނާ ސައިޓްތައް ބްލޮކް ކުރުމަށް ވެސް ސިޔާސަތެއް ހިމަނައިފައެވެ.