މާލޭ ސަރަހައްދު ގޯތި ލިބޭ މީހުންގެ ދާއިމީ ލިސްޓު އިއުލާން ކޮށްފިއެވެ.
ޕްލޭނިން ހައުސިން އެންޑް އިންފްރާސްޓްރަކްޗަރ މިނިސްޓްރީން ކުރި އިއުލާނުގައި ބުނެފައިވަނީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަހައްދުން ގޯއްޗަށް އެދި ހުށަހަޅާފައިވާ ފަރާތްތަކުގެ ދާއިމީ ލިސްޓުގައި "ފުރަތަމަ ބުރުގައި ގޯތި ލިބޭ" ސްޓޭޓަސްގައި ހިމެނޭ ފަރާތްތަކަކީ ހުޅުމާލެ، ގުޅީފަޅު، އަދި ގިރާވަރުފަޅުން މިވަގުތު ގޯތި ދޫކުރުމަށް ކަނޑައެޅިފައިވާ ބިމުން ގޯތި ލިބޭ ފަރާތްތައް ކަމުގައެވެ.
އަދި ދާއިމީ ލިސްޓުގައި "ދެވަނަބުރުގެ ލިސްޓުގައި ހިމެނޭ" ސްޓޭޓަސްގައި ހިމެނޭ ފަރާތްތަކަކީ ގޯތި ދޫކުރުމަށް އިތުރަށް ލިބޭ ބިމުން ގޯތި ދިނުމަށް ހަމަޖެހިފައިވާ ފަރާތްތައް ކަމުގައެވެ.
ޕްލޭނިން ހައުސިން އެންޑް އިންފްރާސްޓްރަކްޗަރ މިނިސްޓްރީގެ ބަޔާނުގައި ވާގޮތުން، ދާއިމީ ލިސްޓުގެ "ފުރަތަމަ ބުރުގައި ގޯތި ލިބޭ" ސްޓޭޓަސްގައި ހިމެނޭ ފަރާތްތަކުން އެމިނިސްޓްރީގެ އިރުޝާދާ އެއްގޮތަށް ގޯތީގެ ގުރުއަތު ލުމާއި ގޯތި ކެނޑުމުގެ ކަންކަން ކުރިޔަށް ގެންދެވުމަށް ދަންނަވާ ކަމުގައެވެ.
މިގޮތުން ގުރުއަތު ލުމަށް ހާޒިރުވާނެ ތަނާއި ވަގުތު އޮންލައިން ޕޯޓަލް މެދުވެރިކޮށާއި އެސްއެމްއެސް އަދި އީމެއިލްގެ ޒަރީއާއިން އަންގަމުންދާނެ ކަމަށްވެސް ބުނެފައި ވެއެވެ.
މިމަހުގެ 12 ވަނަ ދުވަހު ނ. ކުޑަފަރީގައި ވާހަކަ ދައްކަވަމުން ރައީސް ސާލިހު ވިދާޅުވެފައިވަނީ، މާލެ ސަރަހައްދުން ދޫކުރާ ގޯތިތައް މި އަންގާރަ ދުވަހު ހަވާލުކުރަން ފަށާނެ ކަމަށެވެ.
ކުރިއަށް އޮތް ރިޔާސީ އިންތިހާބުގެ ކެމްޕޭނަށް ނ. އަތޮޅަށް ފާއިތުވެދިޔަ ހަފްތާގައި ކުރެއްވި ކުޑަފަރީއަށް ވަޑައިގެން އެ ރަށުގައި ބޭއްވެވި ޖަލްސާގައި ރައީސް ވިދާޅުވީ ބޯހިޔާވަހިކަމެއް ލިބުމަކީ ރާއްޖޭގެ ރައްޔިތުން އެންމެ ބޮޑަށް އެދޭ އެއް ކަންތައް ކަމަށެވެ.
ހާއްސަކޮށް މާލޭގެ ބޯހިޔާވަހިކަމަށް އޮތް ދަތިކަން ފާހަގަ ކުރައްވައި ރައީސް ވިދާޅުވީ ސަރުކާރުން ހެދި ދިރާސާ އިން ދެއްކި ގޮތުގައި 18،000 އާއި 20،000 އާ ދެމެދުގެ އަދަދެއްގެ ބަޔަކު ބޯހިޔާވަހިކަން ބޭނުންވާ އިރު، ފްލެޓަށް އެކަނި ވެސް 19،000 މީހުން ކުރިމަތިލާފައިވާ ކަމަށެވެ. ފްލެޓަށް ކުރިމަތިލައިގެން ޝަރުތު ހަމަވާ ކޮންމެ މީހަކަށް ކުރިއަށް އޮތް ދައުރު ނިމުމުގެ ކުރިން ފްލެޓު ދީ ނިންމާނެ ކަމަށް ވެސް ރައީސް ވިދާޅުވިއެވެ.
މީގެއިތުރުން އިތުރުން މާލެ އިން ދޫކުރަން ނިންމި ގޯތިތަކުގެ އެންމެ ފަހު މަރުހަލާގައި އޮތް އިރު، ޕްލޭނަކީ މި މަހުގެ 15 ވަނަ ދުވަހުން ފެށިގެން ގޯތިތައް ހަވާލު ކުރުމުގެ މަސައްކަތް ފެށުން ކަމަށް ވެސް ރައީސް ސޯލިހް ވިދާޅުވިއެވެ.
"ކޮންމެ ދުވަހަކު، ކޮންމެވެސް ބަޔަކަށް އާއިލާއަކަށް ގޯތި ލިބެމުންދާ ތަން ތިޔަބޭފުޅުންނަށް ފެންނާނެ،" ރައީސް ވިދާޅުވިއެވެ.
ހުޅުމާލޭގައި މިހާރު ހިއްކާފައި އޮތް ބިމުން 2،200 ގޯތި، ގުޅިފަޅުން މަދުވެގެން 2،000 ގޯތި އަދި ގިރާވަރު ފަޅު ހިއްކައިގެން ވެސް 2،000 ގޯތި ދިނުމަށް ސަރުކާރުން ވަނީ ނިންމައިފައެވެ. ސަރުކާރުން މިހާރު ވަނީ ގޯތި ލިބޭ މީހުންގެ ވަގުތީ ލިސްޓު އިއުލާންކޮށްފައެވެ. ލިސްޓުގައި ގޯތި ލިބޭ މީހުންގެ އަދަދު 10،000 އަށް ވުރެ ގިނަ އިރު، ސަރުކާރުން ވަނީ ގޯއްޗަށް ޝަރުތު ހަމަވާ އެންމެންނަށް ގޯތި ދިނުމަށް ނިންމައިފައެވެ.
ސަރުކާރުން ފުރަތަމަ އިއުލާންކުރީ 5،000 ގޯތި ދޫކުރުމަށެވެ. ނަމަވެސް، ފަހުން ރައީސް ވިދާޅުވެފައި ވަނީ ޝަރުތު ހަމަވާ އެންމެނަށް ގޯތި ދޭނެ ކަމަށެވެ.
