ރައީސް އިބްރާހިމް މުހައްމަދު ސޯލިހް ނ. ހެނބަދު އަށް ވަޑައިގަންނަވަން މިއަދު އޮތީ މެންދުރު ފަހު 14:15 ހާއިރެވެ. އެކަމަކު، އެމަނިކުފާނަށް ރަށަށް ވަޑައިގެންނެވުނީ އޭގެ ގަޑިއިރެއްހާ ހާއިރު ފަހުންނެވެ. އެކަމަކު ވެސް އެ ރަށުން މުޅިން ފެނުނީ އާދަޔާ ހިލާފު މަންޒަރެކެވެ. ވަރުބަލިކަމެއް ނެތި އަދި ގަދަ އަތްވަށް ބެލުމެއް ނެތި، ކުދިބޮޑު ގިނަ ބަޔަކު އެ ރަށު ބަނދަރު ސަރަހައްދަށް ޖަމާވެ، ރައީސަށް މަރުހަބާ ދަންނަވަން އޮތީ ވަރަށް ބޮޑަށް ކެތް މަދުވެފައެވެ.
ކިތަންމެ ލަހުން ރައީސް ރަށަށް ވަޑައިގެންނެވި ނަމަވެސް އެމީހުން ތިބީ ރައީސަށް މަރުހަބާ ނުދަންނަވައި ގެއަށް ނުދާން ނިންމައިގެންނެވެ.
ސަބަބެއް ނެތިއެއް ނޫނެވެ!
މި ސަރުކާރުން ވަނީ ހެނބަދޫގެ ތަރައްގީ އަށް ގިނަ މަސައްކަތްތަކެއް ކޮށްފައެވެ. އެގޮތުން އެންމެ 14 ހެކްޓަރުގެ ހެނބަދޫ ބަނދަރު ހެދުމާއި ގޮނޑުދޮށް ހިމާޔަތް ކުރުމުގެ މަޝްރޫއު ނިންމައި ރަށް ގިރުން ހައްލު ކުރީ މި ސަރުކާރުންނެވެ. ހެނބަދޫ ފުޓްސަލް ދަނޑާއި އިންޖީނުގެ އާއި ފެނަކަ އާ އޮފީސް ވެސް އެޅީ މި ސަރުކާރުންނެވެ. ރައީސް ސޯލިހް ވަނީ އެ ހުރިހާ މަޝްރޫއެއްގެ ނިމުން ފާހަގަ ކުރެއްވުމަށް ނިންމަވައިފައެވެ.
ނ. އަތޮޅަކީ އެމްޑީއޭގެ ރައީސް އަދި ރައްޔިތުންގެ މަޖިލިހުގެ ދ. މީދޫ ދާއިރާގެ މެމްބަރު އަހުމަދު ސިޔާމަށް ވަރަށް ބޮޑު ތާއީދެއް އޮންނަ އަތޮޅެކެވެ. ސިޔާމަކީ ނ. ކުޑަފަރީ އަށް އުފަން ބޭފުޅެކެވެ. ރައީސް ސޯލިހް، އެންމެ 14 ހެކްޓަރުގެ ހެނބަދު އަށް ވަޑައިގަތީ ކުޑަފަރީގައި ތިބި އެމަނިކުފާނުގެ ސަޕޯޓަރުންނާ ބައްދަލު ކުރައްވައިފައެވެ.
ނ.ހެނބަދޫ ކުދި ބޮޑު އެންމެން ނިކުމެ ރައީސް އިބޫ އަށް ހޫނު މަރުހަބާ.
ނ.ހެނބަދޫ އިން މިކަން ނިމިއްޖެ 💛💪#IbuAslam2023#UfaaveriAmaanRaajje pic.twitter.com/afS20rufl4
— Hussain Shafiu #Ibu2023 (@charly_thuthu) August 12, 2023
އާބާދީގައި 700 މީހުން ހެނބަދޫގައި ތިބި ރައީސް ސޯލިހްގެ ސަޕޯޓަރުންނާ ބައްދަލު ކުރައްވައި އެމަނިކުފާނު ފުރަތަމަ ވެސް އެދިވަޑައިގަތީ މާފަށެވެ. އެއީ އެ ރަށަށް އަންނަން ކަނޑައެޅި ވަގުތަށް ވުރެ މާ ލަހުން ރަށަށް އާދެވުމާ ގުޅިގެންނެވެ. ނަމަވެސް ރައީސް ވިދާޅުވީ ހެނބަދޫ ރައްޔިތުން ބަނދަރު މައްޗަށް ވަޑައިގެން އެ ހުރިހާ ވަގުތަކު ތައްޔާރުވީ އެމަނިކުފާނާއި ޓީމަށް މަރުހަބާ ދަންނަވަން ކަމަށެވެ.
"ވަރަށް، ވަރަށް ބޮޑަށް ތިޔަ ބޭފުޅުންނަށް ޝުކުރު ދަންނަވަން،"
"މިއަދު ހެނބަދޫން ފެނިގެން މިދިޔައީ ކުދިބޮޑު އަންހެން ފިރިހެން، ހުރިހާ އެންމެން ނުކުމެ، މުޅި ބަނދަރު ފުރާލާފައި އޮތް ތަން."
ރައީސް ވަނީ ހެނބަދޫގައި އިންސާނުން އުޅޭ ކަން މީގެކުރީގެ ސަރުކާރުތަކަށް ނުފެންނަނީތޯ ސުވާލު ކުރައްވައިފައެވެ. އަދި މި ސަރުކާރު ވެރިކަމަށް އައިސް ހެނބަދޫގައި އަސާސީ ގިނަ ހިދުމަތްތަކެއް ނިންމާފައިވާ ކަމަށް ވެސް ރައީސް ވިދާޅުވިއެވެ. ހެނބަދޫގައި މީގެކުރިން ފެނާއި ކަރަންޓާއި ނަރުދަމާ ނެތް އިރު، ނަރުދަމާ ވެސް އަޅާފައި ވަނީ އަމިއްލަ ބަޔަކު ކަމަށާއި މީގެކުރީ ސަރުކާރުތަކުން ކުރި އެއްވެސް ކަމެއް ނެތް ކަމަށް އެމަނިކުފާނު ވިދާޅުވިއެވެ.
ހެނބަދޫ އަށް ރައީސް ވެވަޑައިގެންނެވި ވައުދުތައް:
– ހެނބަދޫ ބިން ހިއްކައި ބޯހިޔާވަހިކަން ހޯދައި ދިނުން
– ހުކުރު މިސްކިތެއް އެޅުން
– ހެނބަދޫގެ ބޮޑެތި މަގުތަކުގައި ތާރު އަޅައި ޒަމާނީ ފެންވަރަކަށް ހަދަން
– ސިއްހީ މަރުކަޒު 24 ގަޑިއިރަށް ބަދަލުކޮށް ހިދުމަތް ދިނުން.
– ކައުންސިލް އިދާރާ އާއި ކޯޓު އެއް އިމާރާތަކަށް ބަދަލު ކުރުން.
ރައީސް ވިދާޅުވި ގޮތުގައި 2018 ގެ ރިޔާސީ އިންތިހާބުގައި އެމްޑީޕީ އަށް ހެނބަދޫން ލިބުނީ %48 ވޯޓެވެ. އެކަމަކު، މިފަހަރު %70 އާ ހަމައަށް ވޯޓު ލިބޭނެ ކަމުގެ އުންމީދު އެބައޮތް ކަމަށް ވެސް ރައީސް ވިދާޅުވިއެވެ.
