ގދ. ހޯނޑެއްދޫގައި ލޯކަލް ޓޫރިޒަމް ފަށަން އެހީތެރިވެދެއްވާނެ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެއެވެ.

ގދ. އަތޮޅުތަކަށް ރައީސް ފެއްޓެވި ދަތުރުފުޅުގައި ހޯނޑެއްދޫ އަށް ވަޑައިގެން ރައީސް ސޯލިހް ވިދާޅުވީ ހޯނޑެއްދޫއަކީ ރީތި، ވެށީގެ ގޮތުން ނުހަނު ހިތްފަސޭހަ ރަށެއް ކަމަށެވެ. އެހެންވެ، އެ ސިނާއަތް ކުރިއެރުވުމަށް ސަރުކާރުން ކޮށްދޭން ޖެހޭ ކަންކަން ކުރައްވާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ ހޯނޑެއްދޫގައި ވައުދުތައް ފުއްދަމުން އަންނަ ތަން އެ ރަށުގެ ރައްޔިތުންނަށް ފެންނާނެ ކަމަށެވެ. މި ދައުރުގައި އަޅާ އެންމެ ބޮޑު އެއް ބަނދަރު ހޯނޑެއްދޫގައި އަޅައި ނިމޭއިރު، ފެނާއި ނަރުދަމާގެ ނިޒާމު ފުރިހަމަވަމުންދާ ކަމަށް ވެސް އެމަނިކުފާނު ވިދާޅުވިއެވެ.

ރައީސް ވިދާޅުވީ ކޮވިޑްގެ އާލަމީ ވަބާ އާއި ޔޫކްރެއިން އާއި ރަޝިއާއާ ދެމެދު ކުރިއަށް ދިޔަ ހަނގުރާމައާ އެކުގައި ދުނިޔޭގެ އިގްތިސާދަށް ބޮޑެތި ގޮންޖެހުންތަކެއް ކުރިމަތިވި ކަމަށެވެ. އެ ދައްޗާއެކު ސަރުކާރު ހިންގަމުން ދިޔައިރު ރައްޔިތުންނަށް އޭގެ ތަކްލީފެއް ނުޖައްސަން ވަރަށް މަސައްކަތް ކުރެއްވި ކަމަށް ވިދާޅުވިއެވެ.

އެމަނިކުފާނު ވިދާޅުވީ ކޮވިޑްގެ ތެރޭގައި ހަމައެކަނި އިންކަމް ސަޕޯޓް އެލަވަންސްގެ ގޮތުގައި 16 މިލިއަން ރުފިޔާގެ މި ރަށުގެ ރައްޔިތުންނަށް ދީފައިވާނެ ކަމަށެވެ. އަދި އެސްޑީއެފް ލޯންގެ ގޮތުގައި 16 މިލިއަން ރުފިޔާ ދިނުމަށް އެޕްރޫވްކޮށް 15 މިލިއަން ރުފިޔާ ވާނީ ރަށުގެ އެކި ރައްޔިތުންނަށް ފޯރުކޮށްދީފައި ކަމަށް ވިދާޅުވިއެވެ.

ކުރިއަށް އޮތް ދައުރަށް ހޮވިވަޑައިގެންފި ނަމަ، ހޯނޑެއްދޫގައި ވޮލީ ކޯޓަކާއި ފުޓްސަލް ދަނޑެއް އަޅުއްވައި ދެއްވުމަށް ރައީސް ވައުދުވެވަޑައިގެންނެވިއެވެ. އަދި ފުޓްބޯޅަ ދަނޑެއް އަޅައި ރަށް ގިރުމުގެ މައްސަލަ ވެސް ހައްލުކޮށް ދެއްވާނެ ކަމަށް ރައީސް ވިދާޅުވިއެވެ.

ރައީސްގެ ވާހަކަފުޅުގައި ވަނީ އަންނަ މަހުގެ 9 ގައި އޮންނަ ރިޔާސީ އިންތިހާބުގައި އެމްޑީޕީ އަށް ވޯޓު ދެއްވުމަށް އެދިވަޑައިގެންފައެވެ.