ރައީސް އިބްރާހިމް މުހައްމަދު ސޯލިހަކީ ޓެސްޓް ކުރެވި ކޮލިފައިވެފައިވާ ބޭފުޅެއް ކަމަށް ރައްޔިތުންގެ މަޖިލިހުގެ ދ. މީދޫ ދާއިރާގެ މެމްބަރު އަދި އެމްޑީއޭގެ ލީޑަރު އަހުމަދު ސިޔާމް މުހައްމަދު ރޭ ދ. ކުޑަހުވަދޫގައި ވިދާޅުވެއްޖެއެވެ.
ރައީސް ސޯލިހް ދ. އަތޮޅަށް ކުރައްވަމުން ގެންދަވާ ދަތުރުފުޅުގައި ކުޑަހުވަދޫގައި ބޭއްވި ޖަލްސާގައި ސިޔާމް ވިދާޅުވީ ރާއްޖެ އަށް ލިބިފައި ވަނީ ވިސްނުންތެރި، އޯގާތެރި، ކުލުނުވެރި، ހިކުމަތްތެރި ރައީސެއް ކަމަށެވެ.
އަންނަ ސެޕްޓެމްބަރު 9 ގައި އޮންނަ ރިޔާސީ އިންތިހާބުގައި އަށް ކެންޑިޑޭޓުން ކުރިމަތިލައްވާފައިވާ އިރު، ދިވެހިން ތަޖުރިބާ ކުރި ބޭފުޅަކަށް ހުންނެވީ ރައީސް ސޯލިހް އެކަނި ކަމަށް ވެސް ސިޔާމް ވިދާޅުވިއެވެ.
"ރައީސް އިބޫއަކީ އަޅުގަނޑުމެން ޓެސްޓްކޮށްފައި، ޓެސްޓުން ބަރާބަރަށް ކޮލިފައިވެ، ފާސްވެފައި ހުރި ޕްރޮޑަކްޓެއް. އަޅުގަނޑުމެން އެ ޕްރޮޑަކްޓް ރަނގަޅު ގޮތުގައި އިއްޒަތްތެރި ރައީސުލްޖުމްހޫރިއްޔާ ވިއްކަން މި ކުރާ މަސައްކަތަކީ ރާއްޖޭގެ ރައްޔިތުންގެ ހައްގުގައި ކުރާ މަސައްކަތެއް،" ސިޔާމް ވިދާޅުވިއެވެ.
ސިޔާމް ވިދާޅުވީ އެމްޑީޕީގެ މި ވެރިކަން ފިޔަވައި ކޮންމެ ވެރިކަމެއްގައި ވެސް އެމްޑީއޭ އިން ދ. އަތޮޅަށް ބޭނުންވާ ކަންކަން ކިޔައިދޭން ރައީސުން ގާތަށް ވަޑައިގަތުމުން ދެ ކަމެއް ފިޔަވައި އިތުރު ކަމެއް ވިދާޅު ނުވާން ބުނާ ކަމަށެވެ. އަދި އިތުރު ކަމެއްގެ ވާހަކަ ދައްކާ އިރަށް ކޯފާ އިސް ކުރައްވާ ކަމަށް ވިދާޅުވިއެވެ.
"އަޅުގަނޑުމެންގެ ރައީސުލްޖުމްހޫރިއްޔާގެ ކަންތައް ހުރީ ދިމާ އިދިކޮޅަށް. ތަފާތުކޮށް. އަޅުގަނޑު އެމަނިކުފާނާ އެއްކޮށް ވަރަށް ގިނަ ރަށްރަށަށް ހިނގައްޖެއިން. އެމަނިކުފާނު މުޅި ފޮތް ހުޅުވާލައްވަނީ. މުޅި ފޮތް ހުޅުއްވާލައްވާފައި ވިދާޅުވަނީ ދަންނަވާށޭ." ސިޔާމް ވިދާޅުވިއެވެ.
