އަންނަ މަހުގެ 9 ގައި އޮންނަ ރިޔާސީ އިންތިހާބުގައި އަށް ކެންޑިޑޭޓުން ވާދަކުރެއްވުމަކީ އިންތިހާބު ކާމިޔާބު ކުރައްވަން ލިބިވަޑައިގަތް ފަސޭހައެއް ކަމަށް ރައީސް އިބްރާހިމް މުހައްމަދު ސޯލިހް ދ. ކުޑަހުވަދޫގައި މިރޭ ވިދާޅުވެއްޖެއެވެ.

ރައީސް ސޯލިހް ދ. އަތޮޅަށް ފެއްޓެވި ދަތުރުފުޅުގައި މިއަދު ވަނީ އެ އަތޮޅުގެ ހުރިހާ ރަށަކަށް ވަޑައިގެންފައެވެ. އެގޮތުން ދ. މީދޫ، ދ. ރިނބިދޫ، ދ. ބަނޑިދޫ، ދ. ހުޅުދެލި، ދ. މާއެނބޫދޫ އަދި ފަހު މަންޒިލެއްގެ ގޮތުގައި ދ. ކުޑަހުވަދޫ އަށް އެމަނިކުފާނު ވަޑައިގަތެވެ.

ކުޑަހުވަދޫގައި ބޭއްވި ކެމްޕެއިން ޖަލްސާގައި ރައީސް ސޯލިހް ވިދާޅުވީ ރިޔާސީ އިންތިހާބުގައި އަށް ކެންޑިޑޭޓުން ކުރިމަތިލެއްވި އިރު، މިއީ ރިކޯޑު އަދަދެއް ކަމަށެވެ. އަދި މިއީ އިންތިހާބު އެއް ބުރުން ކާމިޔާބު ކުރައްވަން ލިބޭ ބާރެއް ކަމަށް ވެސް އެމަނިކުފާނު ވިދާޅުވިއެވެ.

"އަށް ކެންޑިޑޭޓުން ކުރިމަތިލީ ފުރަތަމަ ފަހަރު. 2008 ގައި ހަ ކެންޑިޑޭޓުން، އޭގެ ފަހުން މިހާ ގިނަ ކެންޑިޑޭޓުން ކުރިމައްޗެއް ނުލާ، ކުރިއަށް ވުރެ މާ ބޮޑު ތަނުން ފަސޭހަވެއްޖެ، އިރާދަކުރެއްވިއްޔާ ކުރިއަށް މި އޮތް އިންތިހާބު ކާމިޔާބު ކުރާނީ އެއް ބުރުން،" ރައީސް ސޯލިހު ވިދާޅުވިއެވެ.

ރިޔާސީ އިންތިހާބުގައި ވާދަކުރުމަށް ހުޅުވާލި ފުރުސަތުގެ ވަގުތު މިއަދު ދޭއް ޖެހިއިރު ހަމަވިއިރު ސިޔާސީ ޕާޓީތަކުން ފަސް ކެންޑިޑޭޓަކު ވާދަކުރައްވައެވެ. އަދި އަމިއްލަ ގޮތުން ރިޔާސީ އިންތިހާބުގައި ތިން ކެންޑިޑޭޓަކު ވާދަކުރައްވައެވެ. އިލެކްޝަންސް ކޮމިޝަން (އީސީ) އިން ބައެއް ކެންޑިޑޭޓުންގެ ފޯމްތައް ބަލައިގެންފައިވާ އިރު، އެހެން ބައެއް ކެންޑިޑޭޓުންގެ ފޯމްތައް ދަނީ ޕްރޮސެސް ކުރަމުންނެވެ.

ރިޔާސީ އިންތިހާބުގައި މިފަހަރު ނުކުންނަވާ ކެންޑިޑޭޓުން:

1- އެމްޑީޕީގެ ރިޔާސީ ކެންޑިޑޭޓު، ރައީސް ސޯލިހް
2- ޕީއެންސީގެ ކެންޑިޑޭޓު، މާލޭގެ މޭޔަރު ޑރ. މުހައްމަދު މުއިއްޒު
3- ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމް
4- އެމްއެންޕީގެ ރިޔާސީ ކެންޑިޑޭޓު މުހައްމަދު ނާޒިމް
5- ދަ ޑިމޮކްރެޓްސްގެ ރިޔާސީ ކެންޑިޑޭޓު އިލްޔާސް ލަބީބް
6- ކުރީގެ ހޯމް މިނިސްޓަރު އުމަރު ނަސީރު
7- އެމްއާރުއެމްގެ ރައީސް އަހުމަދު ފާރިސް މައުމޫން
8- ޑިފެންސް މިނިސްޓްރީގެ ނައިބަކަށް ކުރިން ހުންނެވި ހަސަން ޒަމީލް

ރައީސް ސޯލިހް ވިދާޅުވީ އެމަނިކުފާނު ދަތުރުފުޅު ކުރެއްވި ހއ. އަތޮޅާއި ށ. އަތޮޅާއި މ. އަތޮޅާއި ވ. އަތޮޅު އަދި ދ. އަތޮޅުން ފެނުނު މަންޒަރަކީ ރާއްޖޭގެ ރައްޔިތުން ބޭނުންވާ އުފާވެރި އަމާން ރާއްޖެއެއް ހޯދުމަށް ތައްޔާރަށް ތިބި ތަން ކަމަށެވެ.

ރައީސް ވިދާޅުވީ 2018 ވަނަ އަހަރު ރަށްރަށަށް ވަޑައިގެންނެވިއިރު، ރަށްރަށުން އެދެމުން އައި ކަންކަން ފުރިހަމަކޮށްދެއްވާފައިވާ ކަމަށެވެ. އެކަމަކު، މަދު ކަންތައްތަކެއް އަދިވެސް ފުރިހަމަ ނުވާ ކަން އެމަނިކުފާނު ފާހަގަ ކުރެއްވިއެވެ. އަދި އެކަންކަމާ އެކު އިތުރު ކަންކަން ކުރިއަށް އޮތް ފަސް އަހަރު ދުވަހުގެ ތެރޭގައި ފުރިހަމަކޮށް ދެއްވާނެ ކަމުގެ ޔަގީން ކަން ވެސް އެމަނިކުފާނު ދެއްވިއެވެ.

ރައީސް ވިދާޅުވި ގޮތުގައި އޭރު ކެމްޕެއިނަށް ރަށްތަކަށް ވަޑައިގެންނެވި އިރު، އިވިވަޑައިގެންނެވި އެންމެ ބޮޑު ޝަކުވާއަކީ އަސާސީ ހިދުމަތްތައް ނުލިބުމުގެ ޝަކުވާއެވެ. އެގޮތުން ލަފާ ފުރުން ދަތިވެ، ކްލާސް ރޫމް ނެތުމާއި ބަނދަރު ނުހެދުމާއި ކަރަންޓު ކެނޑުމުގެ މައްސަލަތައް ދިމާވި ކަމަށް ރައީސް ވިދާޅުވިއެވެ. ނަމަވެސް މިހާރު ގިނަ ރަށްރަށުގައި އެ މައްސަލަތައް ހައްލުވެފައިވާ ކަމަށް ވެސް އެމަނިކުފާނު ވިދާޅުވިއެވެ.