ކުރިއަށް އޮތް ރިޔާސީ އިންތިޚާބު އިދިކޮޅު ޕްރޮގްރެސިވް ކޮންގްރެސް ކޯލިޝަނަށް ކާމިޔާބުވެ ވެރިކަމާއި ހަވާލުވާ ފުރަތަމަ ދުވަހު ރައީސް ޔާމީން ގެއަށް ބަދަލު ކުރާނެކަމަށް އެކޯލިޝަންގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޔާމީނަށް އިއްވާފައިވާ 11 އަހަރުގެ ޖަލުގެ ހުކުމާއި ގުޅިގެން އެމަނިކުފާނާއި، ރިޔާސީ އިންތިޚާބުގައި ވާދަކުރުމުގެ ފުރުސަތު ނެތްކަމަށް ސްޕްރީމް ކޯޓުން ވަނީ ކަނޑައަޅާފައެވެ. ރައީސް ޔާމީނަށް ވާދަނުކުރެވޭ ހާލަތުގައި ޕީއެންސީގެ ކެންޑިޑޭޓެއްގެ ގޮތުގައި އިންތިޚާބުގައި ވާދަކުރައްވާނެ ކެންޑިޑޭޓަކަށް އިންތިޚާބުވީ ޑރ.މުއިއްޒުއެވެ.

ރިޔާސީ ރޭހަށް ޕީޕީއެމް، ޕީއެންސީން ނިކުތުމާއިމެދު އޮތް ޚިޔާލް ތަފާތުވުންތަށް އެއްކުރެވި، އިންތިޚާބުގައި ވާދަކުރަން ނިންމައި، ރައީސް ޔާމީންގެ ތާއީދުވެސް ވަނީ ޑރ.މުއިއްޒަށް އޮތްކަން ހާމަކުރައްވާފައެވެ. މުއިއްޒު ވަނީ މިއަދު ދެޕާޓީގެ ކެމްޕޭންގައި ހަރަކާތްތެރިވާ ބައެއް ބޭފުޅުންނާއި ބައްދަލު ކުރައްވާފައެވެ. މިބައްދަލުވުމުގައި ރައީސް ޔާމީންގެ ކެމްޕޭން މެނޭޖަރުންނާއި، ދެޕާޓީގެ އިސްބައެއް ބޭފުޅުން ވަަނީ ބައިވެރިވެފައެވެ.

މިބައްދަލުވުމުގައި ޑރ.މުއިއްޒު ވިދާޅުވީ ރިޔާސީ އިންތިޚާބު ކާމިޔާބު ވެއްޖެނަމަ، ފުރަތަމަ ދުވަހުވެސް މިހާރު ވެރިކަމުގައި ހުރި ރައީސަށް ރައީސް ޔާމީން ގެއަށް ބަދަލުކޮށް މިނިވަން ކޮށްދެއްވުމަށް ގޮވާލާނެކަމަށެވެ. އަދި އެކަން އެމަނިކުފާނު ނުކޮށްފިނަމަ، ވެރިކަމާއި ޕީޕީއެމް، ޕީއެންސީ ކޯލިޝަނުން ހަވާލުވެ ފުރަތަމަ ދުވަހު ރައީސް ޔާމީން ގެއަށް ބަދަލު ކުރައްވާނެކަމަށެވެ.

ރައީސް ޔާމީނަކީ ރާއްޖޭގެ އެންމެ ތާއީދު ބޮޑު އެއްސިޔާސީ ލީޑަރަށް ވެފައި އަދި ރައީސް ޔާމީން މިނިވަން ކުރުމަށް ކެނޑިނޭޅި ޕީޕީއެމްގެ އާންމު މެމްބަރުން ކުރަމުންދާ މަސައްކަތާއި ގުޅޭގޮތުން ޑރ.މުއިއްޒު ވިދާޅުވީ ރައީސް ޔާމީންގެ ހައްގުގައި ކުރަންޖެހޭ މަސައްކަތް ނުކޮށް ކުރާނެ އިތުރު މަސައްކަތެއް ނޯންނާނެކަމަށެވެ. އަދި ރައީސް ޔާމީން މިނިވަން ކުރުމަށް މިހާރުވެސް ކުރާ މަސައްކަތް ހުއްޓާނުލައި އިންތިޚާބުގެ ކެމްޕޭންގައިވެސް އަދި އިންތިޚާބު ކާމިޔާބުކޮށްގެންވެސް ކުރާނެކަމަށް މުއިއްޒު ވިދާޅުވިއެވެ.

ޕްރޮޤުރެސިވް ކޯލިޝަންގެ ރިޔާސީ ކެނޑިޑޭޓް
ޑރ މުހައްމަދު މުއިއްޒު މައި ކެމްޕެއިން ޓީމާއެކުގައި ބޭއްވި ފުރަތަމަ ބައްދަލުވުން!#FreePresidentYameen #DhiveheengeRaajje #muizzusembe2023 pic.twitter.com/cxTWkqPGGB

— Ahmed Waheed (@RasAmmaday) August 7, 2023

ރައީސް ޔާމީނަށް ކޮށްފައިވަނީ ނުހައްގު ޖަލު ހުކުމެއްކަމަށް ތަކުރާރުކޮށް އިދިކޮޅު ކޯލިޝަނުން ދަނީ ބުނަމުންނެވެ. އަދި ރައީސް ޔާމީންގެ މައުސޫމްކަން ހާމަކުރުމަށް އެމަނިކުފާނަށް އިންސާފުވެރި ޝަރީއަތެއް ލިބިފައި ނުވާކަމަށް އެކޯލިޝަނުން ދަނީ ތަކުރާރުކޮށް ބުނަމުންނެވެ.

އަންނަ ރިޔާސީ އިންތިޚާބުގައި ވާދަކުރެއްވުމަށް ރައީސް ޔާމީން ޝަރުތު ފުރިހަމަނުވާކަމަށް ސުޕްރީމްކޯޓުން ނިންމަވާފައިވަނީ، ރައީސް ޔާމީންގެ ކެންޑިޑަސީ ފޯމް އިލެކްޝަންސް ކޮމިޝަނުން ބަލައި ނުގަތުމުން އެމަނިކުފާނު ހުށައެޅި މައްސަލާގައި އިއްޔެ އިއްވެވި ޙުކުމުގައެވެ. އެ މައްސަލަ ބެއްލެވި ހަތް ފަނޑިޔާރުންގެ އިއްތިފާގުން ނިންމެވި، ރައީސް ޔާމީންގެ ކެންޑިޑެސީ ބަލައިނުގަންނަން އީސީން ނިންމީ ރަނގަޅަށް ކަމަށެވެ.