ރައީސް ޔާމީން ރިޔާސީ އިންތިޚާބު ބޮއިކޮޓްކުރައްވަން އެންގެވީ ޕާޓީ ގެއްލި އެމަނިކުފާނުގެ ސިޔާސީ ޙަޔާތް ނިމި ދާނެތީ ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.

އަންނަ މަހު އޮންނަ ރިޔާސީ އިންތިޚާބުގައި، ކުރީގެ ރައީސް ޔާމީނަށް ވާދަނުކުރެވޭނެކަމަށް ސުޕްރީމް ކޯޓުން ނިންމެވި ނިންމެވުމާއި ގުޅިގެން، އެމަނިކުފާނު ވަނީ އިންތިޚާބު ބޮއިކޮޓްކުރެއްވުމަށް ޕީޕީއެމް ލީޑަރޝިޕްގައި އެދިވަޑައިގެންފައެވެ. އެގޮތުން ރައީސް ޔާމީން އެދިވަޑައިގަތީ އެމަނިކުފާނުގެ އިންތިޚާބީ ހައްޤު ނިގުޅައިގަނެފައިވާކަމަށް ސެނެޓަށް ޤަބޫލުކުރެވޭނަމަ އިންތިޚާބު ބޮއިކޮޓްކުރުމަށެވެ.

ޕީޕީއެމް ޕީއެންސީގެ ސެނެޓުން ބޭއްވި ކުއްލި ބައްދަލުވުމުގައި ވަނީ އިންތިޚާބު ބޮއިކޮޓް ކުރުމަށް ފެންނަ ނުފެންނަ ވޯޓެއް ނަގާފައެވެ. އެ ބައްދަލުވުމުގައި 126 ސެންޓަރުން ބައިވެރިވެވަޑައިގެންނެވިއެވެ. އިންތިޚާބު ބޮއިކޯޓްކުރަން ނުފެންނަކަމަށް 67 މެންބަރަކު ވޯޓު ދިނެވެ. ބޮއިކޮޓްކުރަން ފެންނަކަމަށް ވޯޓު ދެއްވީ 46 މެންބަރުންނެވެ. އިންތިޚާބު ބޮއިކޮޓް ނުކުރުމަށް ގޮވާލާ ވޯޓު ދެއްވި ބޭފުޅުންގެ ތެރޭގައި ރައީސް ޔާމީންގެ ވަރަށް އަރިސް ބޭފުޅުންވެސް ހިމެނިވަޑައިގަންނަވައެވެ.

ސެނެޓުގެ މިނިންމެވުން ޔާމީން ވަނީ ބަލައި ނުގަނެފައެވެ. ޔާމީންގެ މިނިމެވުމާއި ގުޅިގެން ޒައިދު ވިދާޅުވީ ރައީސް ޔާމީން މަސައްކަތް ކުރައްވަނީ އެމަނިކުފާނުގެ ސިޔާސީ ހަޔާތް ނިމިދާނެތީ އެކަން ވިޔަ ނުދޭންކަމަށެވެ.

ރައީސް ޔާމީން އިންތިޚާބް ބޮއިކޮޓްކުރައްވަން އެންގެވީ ޕާޓީ ގެއްލި އެމަނިކްފާނުގެ ސިޔާސީ ޙަޔާތް ނިމި ދާނެތީ! އެކަން ވަރަށް ސާފު ނަމަވެސް އޮއެވަރެއްގައި ޖެހިއްޖެއްޔާ ދެކޮޅަށްފެތުމަކީ އެއްވެސް މީހަކަށް ކުރެވޭނޭ ކަމެެއްނޫން! އޮއެވަރާ ދެކޮޅަށް ގަދަ ދައްކައި ފަތަން އުޅޭމީހަކު ވާނީ ހަލާކު!

– ޒައިދު ވިދާޅުވިއެވެ.

Dr.Muizzu, PPM fathaha kurehvi kurehvumah Marhabaa!

Alhugandu dhekey gothugai RY aa RN ge era nimijje! Dhen ebeyfulhun retire kurehvumakee enme maslahathu bodu goi! Lafaa kurevey gothun PPM ah bodu badhaleh Muizzu gennavaane!

— Ali Zaid (@alizaid1000) August 6, 2023

އިންތިޚާބު ބޮއިކޮޓްކުރުމަށް ރައީސް ޔާމީން އެދިވަޑައިގަތުމާއި ގުޅިގެން، ބޭއްވި ސެނެޓުގެ ބައްދަލުވުމުގައި ޚިޔާލުތަފާތުވެ އެ ބައްދަލުވުން ހޫނުވެގެންދިޔައެވެ. އެ ބައްދަލުވުމުގައި ސެނެޓަރުންގެ މެދުގައި ހޫނު ޒުވާބެއްވެސް ހިނގާފައިވެއެވެ. އެ ބައްދަލުވުން ޚިޔާތަފާތުވެ ހޫނުވީ، އިންތިޚާބުގައި ވާދަކުރުމަށް "ބެކަޕް" ކެނޑިޑޭޓެއްގެ ގޮތުގައި މާލޭގެ މޭޔަރު ޑރ.މުޙައްމަދު މުޢިއްޒު ކަނޑައަޅާފައިވަނީ ރައީސް ޔާމީންގެ އެދިވަޑައިގަތުމަށްކަމަށް ކަނޑައަޅުއްވާފައިވާކަމަށް ވިދާޅުވެއެވެ.

މުޢިއްޒުގެ ރަނިންމޭޓަކަށް ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފް ވަނީ ހަމަޖައްސަވާފައެވެ. ނަމަވެސް އިންތިޚާބުގައި ވާދަކުރުމަށް ބޭނުންވާ ފޯމު މިހާތަނަށް އިލެކްޝަންސް ކޮމިޝަނަށް ހުށައަޅުއްވާފައެއް ނުވެއެވެ.