އަންނަ މަހުގެ 9 ގައި އޮންނަ ރިޔާސީ އިންތިހާބުގައި އަމިއްލަ ގޮތުން ވާދަކުރައްވަން ނިންމެވި ކަން މޯލްޑިވްސް ރިފޯމް މޫވްމަންޓް (އެމްއާރްއެމް) ގެ ރައީސް އަދި ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫން ނިންމަވައިފިއެވެ.
ފާރިސް އެގޮތަށް ވިދާޅުވީ މިއަދު އޭނާގެ ޓުވިޓާގައި އާންމު ކުރެއްވި ވީޑިއޯއެއްގައެވެ. އެ ވީޑިއޯގައި ފާރިސް ވިދާޅުވީ އޭނާ ވެރިކަމަށް ކުރިމަތިލައްވަން ނިންމެވީ ރާއްޖޭގައި ހުރި ކަންކަން އިސްލާހު ކުރުމުގެ މާތް މަގްސަދުގައި ކަމަށެވެ.
2023 ވަނަ އަހަރުގެ ރިޔާސީ އިންތިޚާބުގައި އަމިއްލަގޮތުން ވާދަކުރަން ނިންމިވާހަކަ ލޮބުވެތި ރައްޔިތުންގެ މައުލޫމާތައްޓަކައި ދެންނެވިން https://t.co/S5490dCwSO pic.twitter.com/TdtoiiK6KC
— faris 🇲🇻 🇵🇸 (@afarismaumoon) August 6, 2023
"އެކުވެރި، ލޮބުވެތި ދިވެހި ރައްޔިތުން އެދިވަޑައިގަންނަވާ ގޮތެއްގެ މަތިން ދިވެހި ރާއްޖޭގެ ކަންކަން އިސްލާހު ކުރުމުގެ މާތް މަގްސަދުގައި މާތް ﷲ ގެ ވާގިފުޅާ އެކުގައި މި އަހަރުގެ ރިޔާސީ އިންތިހާބުގައި އަޅުގަނޑު އަމިއްލަ ގޮތުން ވާދަކުރަން ނިންމި ވާހަކަ ތި ބޭފުޅުންގެ މައުލޫމާތަށްޓަކައި ދަންނަވަން،" ފާރިސް ވިދާޅުވިއެވެ.
އެމްއާރުއެމްގެ ރިޔާސީ ޓިކެޓު ކަށަވަރު ކުރެއްވި ފާރިސް، ވަނީ އިލެކްޝަންސް ކޮމިޝަން (އީސީ) އިން ކެންޑިޑެސީ ގަބޫލުނުކޮށްފާނެ ކަމަށް ވިސްނަވައި 1،500 ސޮއި ވެސް ހޯއްދަވައިފައެވެ. ރިޔާސީ ކެންޑިޑޭޓުންގެ ތެރެއިން 1،500 މީހުންގެ ސޮއި ހޯދަން ޖެހެނީ އިންތިހާބުގައި އަމިއްލަ ގޮތުން ވާދަކުރައްވާ ކެންޑިޑޭޓުންނެވެ.
އެމްއާރްއެމް އުވާލުމަށް އިލެކްޝަންސް ކޮމިޝަނުން ނިންމި ނިންމުމަށް އަމަލުކުރުން ސިވިލް ކޯޓުން ވަނީ ހުއްޓުވާފައެވެ. ރިޔާސީ އިންތިހާބުގައި އަމިއްލަ ގޮތުން ވާދަކުރެއްވުމަށް މިހާތަނަށް ސޮއި ހޯދާފައިވަނީ ފާރިސްގެ އިތުރުން ކުރީގެ ހޯމް މިނިސްޓަރު އުމަރު ނަސީރެވެ.
ފާރިސްގެ އިންތިހާބީ އެޖެންޓަކަށް ހަމަޖައްސާފައި ވަނީ ހަޔާ އެޑިއުކޭޝަން މިނިސްޓްރީގެ ކުރީގެ ޑެޕިއުޓީ މިނިސްޓަރު އިސްމާއިލް ޒަބީހެވެ. ފާރިސްގެ ރަނިންމޭޓް މިހާތަނަށް އައިއިރު އިއުލާންކޮށްފައެއް ނުވެއެވެ.
