ކޮންމެ މީހެއްވެސް އެމީހެއްގެ ހަޔާތުގެ ބައިވެރިއެއް އިހްތިޔާރު ކުރާއިރު އެމީހަކާ އެންމެ އުޅުމާއި ގުޅުން އެއްގޮތް މީހެއް ލިބޭތޯ ބަލަން އިސްކަންދެއެވެ. މިހެން މިކަން ހިނގާތީ އެމީހަކު ކުރިއަށްދާ ފީލްޑެއް ނުވަތަ ކުރާ މަސައްކަތެއް ނުވަތަ އެއް އޮފީހަކުން ހަޔާތުގެ ބައިވެރިން ގިނަފަހަރު ހޯދެއެވެ.
އެގޮތުން ފާހަގަވާ އެއް ދާއިރާއަކީ މުނިފޫހި ފިލުވުމުގެ ދާއިރާއެވެ. މި ދާއިރާގައި މަސައްކަތްކުރާ މީހުން ގިނަ ފަހަރަށް ހަޔާތުގެ ބައިވެރިއަކަށް ހޯދަނީ ހަމަ މިދާއިރާގެ ފަންނާނެކެވެ. ދުނިޔޭގެ މަޝްހޫރު ހޮލީވުޑާއި ބޮލީވުޑްގައިވެސް މިކަން ގާތްގަނޑަކަށް އޮތީ މިހެންނެވެ. މިހެން ގިނަފަހަރަށް ވަނީ ދާއިރާގެ ކަންކަން ހުންނަގޮތާ އެހުރިހާކަމެއްގެ އަންޑަސްޓޭންޑިން ދާއިރާގެ މީހަކަށް އޮނާތީކަމަށް ވުން އެކަށީގެން ވެއެވެ.
މިފަހަރު މި ބަލާލަނީ ބޮލީވުޑްގެ މަޝްހޫރު ބައެއް ޖޯޑުތަކަށެވެ. ނަމަވެސް މީހުންނަށް އެނގި ގިނަބައެއް އެ ޖޯޑުތައް ބަލައިގަނެ، އެންގޭޖްމެންޓާއި ހަމައަށް ގޮސް ކައިވެންޏަކާއި ހަމައަށް ނުދެވުނު ޖޯޑުތަކަކަށެވެ.
1 – ސަލްމާނާއި ސަންގީތާ ބިޖްލާނީ
އަދި އަދަށްވެސް ހުސްކޮށް ހުރި ބޮލީވުޑްގެ ރަސްގެފާން ސަލްމާން ޚާނާއި އޭނާގެ ކުރީގެ ލޯބިވެރިޔާ ސަންގީތާ ބިޖްލާނީގެ ޖޯޑަކީ 90ގެ އަހަރުތަކުގައި އެންމެ ގަދައަށް އެވާހަކަ ދެއްކުނު ބޮލީވުޑްގެ ޖޯޑެކެވެ. އެންގޭޖް ވުމަށް ފަހު ކައިވެނީގެ ތާރީހުވެސް ކަނޑައަޅައި ވެޑިންގ ކާޑުވެސް ޕްރިންޓް ކުރި ފަހުން މި ދެމީހުންގެ ގުޅުން ނިމުމަކަށް ގެނެސް ޖެހުނީ ސަލްމާން، ލޯބިވެރިޔާއަށް ބޭވަފާތެރި ވުމުން ކަމަށް ޚަބަރު ލިބެއެވެ. ނަމަވެސް ކައިވެނީގެ ތައްޔާރީތައް ދައުވަތު ކާޑު ޕްރިންޓު ކުރުމާ ހަމައަށް ދިޔަކަން ހާމަކުރީ ކޮފީ ވިތު ކަރަން ޝޯގެ އެޕިސޯޑެއްގައި ސްލްމާނެވެ. މިދިޔަ އަހަރު ސަލްމާނު ވަނީ ސަންގީތާގެ އުފަންދުވަސް ފާހަގަކުރުމަށް ޕާޓީއެއްވެސް އިންތިޒާމް ކޮށްފައެވެ.
ސަލްމާން އަދިއަދަށްވެސް ހުސްކޮށް ހުރި ނަމަވެސް ސަންގީތާ ވަނީ ކްރިކެޓް ތަރި މުޙައްމަދު އަޒްހަރުއްދީނާއި 1996 ވަނަ އަހަރު ކައިވެނި ކޮށްފައެވެ. ނަމަވެސް އެކައިވެނި 2010 ވަނަ އަހަރު ވަނީ ރޫޅިފައެވެ.
2 – އަކްޝޭ ކުމާރާއި ރަވީނާ
90 އަހަރުތަކުގައި އެކުގައި ގިނަ ފިލްމުތަކެއް ކުޅުނު އަކްޝޭ އާއި ރަވީނާ ޓަންޑަން އަކީވެސް އެންގޭޖްމެންޓާ ހަމައަށް ގޮސް ކައިވެނި ނުކުރެވި ދުރުވާންޖެހުނު ޖޯޑެކެވެ. މި ޖޯޑު އެންގޭޖްވީވެސް ވަރަށް ސިއްރުންނެވެ. އަދި ހަމަ ބްރޭކަޕްގެ ޚަބަރުވެސް އަކްޝޭ ގިނަދުވަސްތަކަކު ސިއްރުކޮށްފައި ބޭއްވިއެވެ. ނަމަވެސް އަހަރުތަކެއް ފަހުން އެދެމީހުން ދުރުވެފައި ވާކަން އަކްޝޭވަނީ ހާމަކޮށްފައެވެ. އަދި މިއާއެކު އަކްޝޭއަށް ވަނީ އެދެމީހުން ހަމައެކަނި އެންގޭޖްވީކަމާއި ކައިވެންޏެއް ނުކުރާކަންވެސް އާންމުންނަށް އޮޅުންފިލުވައިދޭން ޖެހިފައެވެ.
މިގުޅުން ނިމުމަށްފަހު މި ދެތަރިން މިހާރު އަމިއްލަ ދިރިއުޅުން ފަށައިގެން އުފާވެރި ހަޔާތެއް ގެންދަނީ ވޭތުކުރަމުން ނެވެ. އެގޮތުން އަކްޝޭ ވަނީ ޓްވިންކަލް ކަންނާއާ 2001 ވަނަ އަހަރު ކައިވެނި ކޮށްފައެވެ. އަދި 2004 ވަނަ އަހަރު ރަވީނާ ޓަންޑަން ކައިވެނި ކުރީ އަނިލް ތަޑާނީ އާއެވެ.
3 – އަބީޝެކް ބައްޗަންއާއި ކަރިޝްމާ
އަބީޝެކް ބައްޗަންއާއި ކަރިޝްމާ ކަޕޫރަކީވެސް 90ގެ ފަހުކޮޅުގެ ޖޯޑެކެވެ. 2002 ވަނަ އަހަރު މި ދެތަރިންގެ އެންގޭޖްމެންޓް އިއުލާނުކުރީވެސް ރައްޓެހިވެހެން އުޅޭތާ 5 އަހަރު ފަހުންނެވެ. ބައްޕަ އަމީތާބްގެ އުފަންދުވަހު މި ޖޯޑުގެ އެންގޭޖްމެންޓް އިއުލާން ކުރުމަށްފަހު މާގިނަ ދުވަހެއްނުވެ އެގުޅުން ނިމުމަކަށް ގެނައެވެ. އެ ދުވަސްވަރު ރިޕޯޓުތައް އައި ގޮތުން މި ގުޅުން ނިންމާލަން ޖެހުމުގެ ސަބަބަކަށް ވީ ކަރިޝްމާގެ މަންމަ ބަބީތާއެވެ. ނަމަވެސް ކަރިޝްމާ ބައްޗަން އާއިލާ އާމެދު ހިތްހަމަ ނުޖެހުމެއް އުފެދުނީ ކައިވެނީގެ ފަހުގައި ފިލްމު ކުޅުން ހުއްޓާލުމަށް އާއިލާއިން ބާރު އަޅާތީ ކަމަށްވެސް ބައެއް ޚަބަރުތައް އައެވެ.
މި ގުޅުން ނިމުމަކަށް ގެނެސް އަބީޝެކް ކައިވެނި ކުރީ އެކްޓަރ އަދި ރީތީގެ ރާނީ އައިޝްވާރިއާ ރާއީ އާއެވެ. އަބީޝެކް މި ކައިވެނީގެ މަތީގައި ދެމިހުރި އިރު، ކަރިޝްމާ 2003 ވަނަ އަހަރު ސަންޖޭ ކަޕޫރާއި ކުރި ކައިވެނި 2016 ވަނަ އަހަރު ވަނީ ރޫޅިފައެވެ.
4 – ވިވެކް އޮބެރޯއި އާއި ގުރްޕްރީތު ގިލް
މިއީ ވިވެކް ފިލްމު އިންޑަސްޓްރީއަށް ތައާރަފް ވުމުގެ ވެސް ކުރިން ވެފައިވާ ކަމެކެވެ. މޮޑެލް ގުރްޕްރީތާއި އޭނާ އެންގޭޖްވީ ދުވަސްކޮޅަކީ އޭނާއަށްވެސް ދާއިރާއިން މަސައްކަތްތައް ލިބެން ފެށި ދުވަސްކޮޅެވެ. އެހެންކަމުން ވިވެކްގެ ޝެޑިއުލްތައް ހުންނަގޮތުން ދެމީހުންގެ ދެމެދުގައި ގުޅުން ކުޑަވެ އެންގޭޖްމެންޓް ކެންސަލްކުރާ ހިސާބަށް ދިޔައީއެވެ. ޓައިމްސް އޮފް އިންޑިއާއަށް ގުރްޕްރީތު ދިން އިންޓަރވިއުއެއްގައި ބުނީ އޭނާ ގަބޫލުކުރާ ގަބޫލުކުރުންތަކެއް ބަދަލުކުރަން މަޖުބޫރު ވާންފެށުމުން ވިވެކްގެ ބައެއް ކަންކަން ބަދަލުކުރަން ނޫނީ ދޫކޮށް ދިދުމަށް އެދުނިން ކަމަށެވެ. ނަމަވެސް މިހެން ކަންކަން ނިމިގެން ދާނެކަމަށް އުންމީދު ނުކުރާކަމަށް ގުރްޕްރީތު ބުންޏެވެ.
ފަހުން 2006 ވަނަ އަހަރު ގުރްޕްރީތު ވަނީ ސްވިސް ބޭންކާ އަކާ ކައިވެނި ކޮށްފައެވެ. އަދި ވިވެކް ކައިވެންޏާ ހަމައަށް އައީ 2010 ވަނަ އަހަރުއެވެ. އޭނާގެ ކައިވެނި ކުރީ ކަރްނާޓަކާގެ މިނިސްޓަރެއްގެ ދަރިއެއް ކަމަށްވާ ޕްރިޔަންކާ އަލްވާ އާއެވެ.
