ޕީއެންސީގެ ރިޔާސީ ކެންޑިޑޭޓު އަދި މާލެ ސިޓީގެ މޭޔަރު ޑރ. މުހައްމަދު މުއިއްޒަކީ "ޕްލޭން" ބީގެ ގޮތުގައި ނިންމާފައި ނުވާނެ ކަމަށް ޕީޕީއެމުން ބުނެފިއެވެ.
އަންނަ މަހު ބާއްވާ ރިޔާސީ އިންތިހާބުގައި އިދިކޮޅު ޕީޕީއެމްގެ ރިޔާސީ ކެންޑިޑޭޓު، ކުރީގެ ރައީސް އަބްދުﷲ ޔާމީނަށް ވާދަނުކުރެއްވޭނެ ހާލަތެއް މެދުވެރިވެދާނެތީ ޕީޕީއެމާއި ޔާމީންގެ ވަކީލުން ސުޕްރީމް ކޯޓުގައި އެދިވަޑައިގެންފައި ވަނީ ޕީޕީއެމްގެ ފަރާތުން އެހެން ކެންޑިޑޭޓަކަށް ވާދަކުރުމުގެ ފުރުސަތު ލިބޭ ގޮތް ހަދައި ދިނުމަށެވެ.
އެކަމަކު، އޭގެ ކުރިން ޕީއެންސީން ވަނީ އެ ޕާޓީގެ ރިޔާސީ ކެންޑިޑޭޓަކަށް މުއިއްޒު ހަމަޖައްސައިފައެވެ. އަދި މުއިއްޒުގެ ރަނިންމޭޓަކަށް ރައްޔިތުންގެ މަޖިލިހުގެ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފް ވަނީ ހަމަޖައްސައިފައެވެ.
ޕީޕީއެމްގެ ލީޑަޝިޕްގެ ބޭފުޅުން ވިދާޅުވީ ޕީޕީއެމްގެ ޕްލޭން އޭ އަކީ ރައީސް ޔާމީން ކަމަށެވެ. އަދި ޕްލޭން ބީއަކީ ޔާމީނަށް ކުރިމަތިނުލެއްވޭ ހާލަތުގައި ޕީޕީއެމުން ކަނޑައަޅާނެ ކެންޑިޑޭޓު ކަމަށާއި ޕްލޭން ސީއަކީ ޕީއެންސީގެ ކެންޑިޑޭޓު މުއިއްޒު ކަމަށް ވެސް އެ ބޭފުޅުން ގެންދަވަނީ ވިދާޅުވަމުންނެވެ.
ޕީޕީއެމުން މިއަދު ނެރުނު ބަޔާނެއްގައި ބުނީ ޕްލޭން ބީއެއް ވުޖޫދުކޮށް ޕީއެންސީން ނެރޭ ކެންޑިޑޭޓަކީ ޕީޕީއެމްގެ ކެންޑިޑޭޓެއް ކަމަށް ނިންމައިފި ކަމަށް ބުނެ ފަތުރާ ހަބަރަކީ ދޮގު ހަބަރެއް ކަމަށެވެ. އަދި ޒިންމާދާރު ނޫސްވެރިކަން ކުރާ އިރު، ކަމުގެ ހަގީގީ މައުލޫމާތު ހޯދާފައި ނޫނީ ނޫސްތަކުގައި ނުލިއުމަށް ޕީޕީއެމުން އެދިފައިވެއެވެ.
"ޕީޕީއެމްގެ ފަރާތުން ޕީއެންސީގެ ރިޔާސީ ކެންޑިޑޭޓް އެންޑޯޒް ކުރަން ނިންމައި ޕީޕީއެމްގެ ޕްލޭން ބީއެއްގެ ގޮތުގައި ވުޖޫދުކޮށްފައި ނުވާނެ ވާހަކަ ދެންނެވީމެވެ. ޕީޕީއެމުން ޕްލޭން ބީ ނުވަތަ ސީ އަކާމެދު ވިސްނާނީ، ރައީސް އަބްދުﷲ ޔާމީން އަބްދުލްގައްޔޫމަށް ވާދަ ނުކުރެއްވޭނެ ހާލަތެއް މެދުވެރިވުމުން އެކަންޏެވެ." ބަޔާނުގައިވެއެވެ.
ޕީޕީއެމުން ބުނި ގޮތުގައި އެ ޕާޓީގެ ފަރާތުން ސުޕްރީމް ކޯޓުގައި ތަދައްހުލުވެ ވަކާލާތު ކުރަމުން ދަނީ ޕީޕީއެމްގެ ރިޔާސީ ކެންޑިޑެސީ ބަލައިނުގަންނަން އިލެކްޝަންސް ކޮމިޝަނުން ނިންމާފައިވަނީ ގާނޫނުއަސާސީ ނުބައިކޮށް ތަތުބީގުކޮށްގެން ކަމެވެ. އެހެންވެ، ޕީޕީއެމުން ވެސް އެދިފައި ވަނީ ޔާމީންގެ ކެންޑިޑެސީ ބަލައިގަތުމަށް ސުޕްރީމް ކޯޓުން އިލެކްޝަންސް ކޮމިޝަންގެ މައްޗަށް އަމުރުކޮށް ދިނުމަށް ކަމަށް ވެސް އެ ބަޔާނުގައިވެއެވެ.
"ހަމައެއާއެކު، ޕީޕީއެމްގެ ކެންޑިޑޭޓަށް ރިޔާސީ އިންތިހާބުގައި ވާދަ ކުރުމުގެ ފުރުސަތު ގެއްލޭނަމަ، ޕީޕީއެމަށް ކެންޑިޑޭޓަކު ނެރުމުގެ ފުރުސަތު ލިބިދިނުމަށެވެ." އެ ބަޔާނުގައިވެއެވެ.
