ކުރިޔަށް އޮތް ރިޔާސީ އިންތިޚާބުގައި ވާދަކުރުމަށް ކުރީގެ ރައީސް ޔާމިންއަށް ފުރުސަތު ނުލިބިއްޖެ ހާލަތެއްގައި ޕީޕީއެމްގެ އެހެން ބޭފުޅަކަށް ޕްރައިމަރީއަކަށް ނުގޮސް ރިޔާސީ ޓިކެޓް ދޭން ތަން ނުދޭކަމަށް ޕީޕީއެމްގެ ލީޑަރޝިޕްގެ ގިނަ ބޭފުޅުން ވިދާޅުވެއްޖެއެވެ.
"ޚަބަރު އޮންލައިން" އާއި މައުލޫމާތު ހިއްސާ ކުރެއްވި ލީޑަރޝިޕްގެ ބައެއް ބޭފުޅުން ވިދާޅުވި ގޮތުގައި، ފާއިތުވެދިޔަ އަހަރު، ރިޔާސީ ޕްރައިމަރީއަކަށް ނުގޮސް އިދިކޮޅު ޕީޕީއެމްގެ ރިޔާސީ ޓިކެޓް ޕްރައިމަރީއަކާ ނުލާ ރައީސް ޔާމިންއަށް އަރުވާފައިވަނީ އަސާސީ ގަވާއިދުން ތަން ދީގެންނެވެ.
ޕީޕީއެމްގެ އަސާސީ ގަވާއިދުގައިވާ ގޮތުން ރައީސް ޔާމިން ނޫން ބޭފުޅަކު ދެން ރިޔާސީ އިންތިޚާބުގައި ވާދަ ކުރާނަމަ ޖެހޭނީ ޕްރައިމަރީއެއް ބާއްވަން. އަސާސީ ގަވާއިދުގައި ބުނެފައިވަނީ، ރައީސުލްޖުމޫރިއްޔާކަމުގެ މަގާމުގައި 5 އަހަރުގެ ދައުރެއް ފުރިހަމަ ކޮށްފައިވާނަމަ، ޕްރައިމަރީއަކަށް ނުގޮސް ޕީޕީއެމްގެ ރިޔާސީ ޓިކެޓް އެބޭފުޅަކަށް އެރުވިދާނެ ކަމަށް. ރައީސް ޔާމިނަށް ޕާޓީގެ ރިޔާސީ ޓިކެޓް އަރުވާފައިވަނީ އެ އުސޫލުގެ މަތިން.
"ޚަބަރު އޮންލައިން"އާއި ވާހަކަ ދެއްކެވި، އިދިކޮޅު ޕީޕީއެމްގެ ލީޑަރޝިޕްގެ ބޭފުޅަކު ވިދާޅުވިއެވެ.
އޭނާ އިތުރަށް ވިދާޅުވި ގޮތުގައި، ޕްރައިމަރީއަކަށް ނުގޮސް ދެން ޕީޕީއެމްގެ ޓިކެޓް އެޕާޓީގެ އެހެން ބޭފުޅަކަށް އެރުވެން އޮތް ހަމަ އެކަނި ގޮތަކީ ސެނެޓްގެ ބައްދަލުވުމެއް ބާއްވާ، އަސާސީ ގަވާއިދަށް ބަދަލު ގެނައުމެވެ. ރައީސް ޔާމިން ނޫން އެހެން ބޭފުޅަކަށް، އެނޫން އެހެން އެއްވެސް ގޮތަކުން އެޕާޓީގެ ރިޔާސީ ޓިކެޓް މިހާރު އެރުވޭނެ ގާނޫނީ އެއްވެސް ހަމައެއް ނެތްކަމަށް ޕީޕީއެމްގެ އިސް ބޭފުޅުން ވިދާޅުވެއެވެ.
ރައީސް ޔާމިނަށް ވާދަ ނުކުރެއްވޭ ހާލަތުގައި ޕީޕީއެމްގެ ކެނޑިޑޭޓަކު ރިޔާސީ އިންތިޚާބުގައި ވާދަކުރައްވާނޭ ކަމަށް ޕީޕީއެމްގެ ލީޑަރޝިޕްގެ ބޭފުޅުން ވިދާޅުވަމުން ގެންދަވަނިކޮށް، ކުރީގެ ރައީސް ޑރ. ވަހީދު ކުށުގެ ރެކޯޑު ސާފުކުރުމަށް ހުށަހެޅުއްވުމުން، ޕީޕީއެމްގެ ސެނެޓްގެ ގިނަ މެމްބަރުން ވަނީ ނުރުހުން ފާޅު ކޮށްފައެވެ.
ޕީޕީއެމްގެ ސެނެޓްގެ ގިނަ މެމްބަރުން ނުރުހުން ފާޅުކޮށްފައިވަނީ، ރައީސް ޔާމިންއަށް ވާދަ ނުކުރެވޭ ހާލަތުގައިވެސް ޕީޕީއެމްގެ އަސާސީ ގަވާއިދުގައިވާ ގޮތުގެ މަތިން، ޕްރިމަރީއަކަށް ނުގޮސް ކުރިޔަށް އޮތް ރިޔާސީ އިންތިޚާބުގައި ޕީޕީއެމްގެ ޓިކެޓްގައި ވާދަ ކުރުމުގެ ފުރުސަތު ޑރ. ވަހީދަށް ނޯންނާނެކަމަށް ވާތީއެވެ.
އެހެންނަމަވެސް، ޕީޕީއެމްގެ ލީޑަރޝިޕްގެ ބައެއް ބޭފުޅުން ވިދާޅުވަމުން ގެންދަވަނީ، ރައީސް ޔާމިނަށް ކުރިމަތި ނުލެއްވޭ ހާލަތުގައި، "ބެކް އަޕް" ކެނޑިޑޭޓެއްގެ ގޮތުގައި ޑރ. މުއިއްޒުއަށް ޕީއެންސީގެ ރިޔާސީ ޓިކެޓް ހަވާލު ކޮށްފައިވީ ނަމަވެސް، ޕީޕީއެމްގެ ކެނޑިޑޭޓަކު ރިޔާސީ އިންތިޚާބުގައި ވާދަކުރައްވާނޭ ކަމުގައެވެ.
ޑރ. މުއިއްޒު މިއަދުވަނީ އޭނާގެ ރަނިންމޭޓަކަށް، ރައްޔިތުންގެ މަޖިލިހުގެ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފް ހަމަޖައްސަވާފައެވެ. މައުލޫމާތުގެ މަތިން ޑރ. މުއިއްޒުގެ ރަނިންމޭޓަކަށް ހުސެއިން މުހައްމަދު ލަތީފް ހަމަޖެއްސެވީވެސް ރައީސް ޔާމިންގެ އިރުޝާދުގެ މަތިންނެވެ.
