ރިޔާސީ އިންތިޚާބުގައި ވާދަކުރުމަށް އިދިކޮޅު ކޯލިޝަނުން ކަނޑައަޅުއްވާފައިވާ ރައީސް ޔާމީންގެ ކެނޑިޑެސީ އާއި ގުޅޭގޮތުން ޕީޕީއެމްއިން ސްޕްރީމް ކޯޓަށް ހުށަހަޅުއްވާފައިވާ މައްސަލައިގައި އެމަނިކުފާނަށް އިންތިޚާބުގައި ވާދަނުކުރެވޭ ކަމަށް ނިންމައިފިނަމަ، ޕީޕީއެމުން ކެނޑިޑޭޓަކު ނެރުމަށް އިތުރު ވަގުތުދިނުމަށް އެދިފައިވާކަމަށް މައުލޫމާތު ލިބިއްޖެއެވެ.

އަންނަމަހުގެ 9 ވަނަ ދުވަހު ބާއްވާ ރިޔާސީ އިންތިޚާބުގައި ވާދަކުރެއްވުމަށް ރައީސް ޔާމީންގެ ކެނޑިޑެސީ އިލެކްޝަންސް ކޮމިޝަނަށް ހުށައެޅުއްވުމުން ރައީސުލްޖުމްހޫރިއްޔާކަމަށް ވާދަކުރުމަށް ގާނޫނޫ އަސާސީގައި ބުނާ ޝަރަތު ރައީސް ޔާމީންގެ ކިބައިގައި މިވަގުތު ފުރިހަމަ ނުވާތީ ކެނޑިޑެސީ ބަލައި ނުގަތުމަށް ވަނީ ނިންމަވާފައެވެ.

އިލެކްޝަންގެ ނިންމެވުން ޕީޕީއެމްއިން ވަނީ ބުދަ ދުވަހުގެ ފަތިހުގެ ވަގުތެއްގައި ސްޕްރީމް ކޯޓަށް ހުށަހަޅުއްވާފައެވެ. މިމައްސަލައިގެ ފުރަތަމަ އަޑު އެހުން ތާވަލް ކުރައްވާފައިވަނީ މާދަމާ މެންދުރުފަހު 14:30 އަށެވެ. ކޯޓުންވަނީ މި މައްސަލައިގެ އަޑުއެހުމަށް ރައީސް ޔާމީންގެ ވަކީލުންގެ ޓީމަށާއި، އިލެކްޝަންސް ކޮމިޝަނަށް ޗިޓުވެސް ފޮނުއްވާފައެވެ.

ރައީސް ޔާމީންގެ ފަރާތްޕުޅުން ސްޕްރީމް ކޯޓުގައި މިމައްސަލާގައި އެދިފައިވަނީ މައިގަނޑު ދެ ކަމަކަށް ކަމަށް މައުލޫމާތު ލިބިފައިވެއެވެ. ފުރަތަމަ ކަމަކީ ރައީސް ޔާމީންގެ ކެންޑިޑެސީ ބަލައިނުގަތުމަށް އީސީން ނިންމި ނިންމުން ބާތިލުކޮށް، ކެންޑިޑެސީ ސައްހަކަން ކަށަވަރުކޮށްދިނުމެވެ. އަނެއްކަމަކީ ރިޔާސީ އިންތިޚާބުގައި ރައީސް ޔާމީނަށް ކުރިމަތި ނުލެއްވޭ ހާލަތެއްގައި، މުއްދަތު ހަމަވިޔަސް ޕީޕީއެމްގެ ކެންޑިޑޭޓެއްގެ ފޯމު އިލެކްޝަންސް ކޮމިޝަނަށް ހުށަހަޅަން ވަގުތު އިތުރުކޮށްދިނުމެވެ.

އިދިކޮޅު ޕީޕީއެމްގެ ފަރާތުން ރައީސް ޔާމީނަށް ނުލެވޭ ހާލަތުގައި އިތުރު ކެނޑިޑޭޓަކު ނެރުމަށް މަސައްކަތް ކުރާއިރު، މިއަދު ވަނީ ޕީއެންސީގެ ފަރާތުން ވާދަކުރާނެ ކެނޑިޑޭޓެއްގެ ގޮތުގައި މާލެ ސިޓީގެ މޭޔަރު ޑރ.މުއިއްޒު އިންތިޚާބު ކުރައްވާފައެވެ. މުއިއްޒު މިއިންތިޚާބު ކާމިޔާބު ކުރެއްވީ ވަރަށް ވާދަވެރިކޮށް، 2 ވޯޓުގެ ތަފާތުންނެވެ.

އިންތިޚާބު ކާމިޔާބު ކުރެއްވުމަށްފަހު ދެއްވި ފުރަތަމަ ޕްރެސްގައި މުއިއްޒު ވިދާޅުވީ ފުރަތަމަ ދުވަހުން ފެށިގެންވެސް މަސައްކަތް ކުރާނީ ރައީސް ޔާމީން މިނިވަން ކުރުމަށް ކަމަށެވެ. އިންތިޚާބުގައި ވާދަކުރުމަށް މުއިއްޒުއަށް ޕީއެންސީ ޓިކެޓް ލިބުނު ނަމަވެސް އަދި އިންތިޚާބުގައި ވާދަކުރަން ފޯމު ހުށަހަޅާނެ ދުވަހެއް ނިންމާފައި ނުވެއެވެ. އަދި ރަނިން މޭޓަކަށް ކަނޑައަޅާނެ ބޭފުޅަކުވެސް ކަނޑައަޅާފައި ނުވެއެވެ.

ޕީޕީއެމްގެ އިސްބޭފުޅަކު ވިދާޅުވީ ޑރ.މުއިއްޒަކީ ރައީސް ރައީސް ޔާމީނަށް ނުލެވޭ ހާލަތެއްގައި ކުރިމަތިލާން ނިންމާ ތިންވަނަ ޗޮއިސް ކަމަށެވެ. ރައީސް ޔާމީނަށް ނުލެވޭ ހާލަތެއްގައި ކުރިމަތިލާނީ އެމަނިކުފާނު ދައްކާ މީހެއްކަމަށް އޭނާ ވަނީ ބުނެފައެވެ. އަދި އެކަންވެސް ނުވެއްޖެ ހާލަތެއްގައި ކުރިމަތިލާ ކެނޑިޑޭޓަކީ މުއިއްޒުކަމަށް އޭނާ ވިދާޅުވިއެވެ.

ރިޔާސީ އިންތިޚާބުގައި ވާދަކުރުމުގެ މުއްދަތު ހޯމަ ދުވަހަށް ހަމަވާނެއެވެ. މިހާތަނަށް އިލެކްޝަނަށް ހުށަހެޅި ހަމައެކަނި ފޯމަކީވެސް ޕީޕީއެމްގެ ކެނޑިޑޭޓް ރައީސް ޔާމީންގެ ފޯމެވެ. އެމްއެމްޕީއާރުސީގެ ބޮޑު ހިޔާނާތުގައި ވ. އާރަށް ކުއްޔަށް ދޫކުރުމުގައި ރިޝްވަތު ނެގުމާއި މަނީ ލޯންޑަރކުރުމުގެ ކުށް ސާބިތުވެ ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒުކުރައްވަމުންނެވެ.

ޤާނޫނު އަސާސީ ބުނާގޮތުން ރައީސުލްޖުމްހޫރިއްޔާއަށްވުމުގެ ޝަރުތުތަކުގެ ތެރޭގައި ޖިނާއި ކުށެއް ސާބިތުވެގެން އެއް އަހަރަށްވުރެ ދިގު މުއްދަތެއްގެ ހުކުމެއް އޮތްނަމަ އެ ހުކުމެއް ތަންފީޒުކޮށް ނިމުމުނުތާ ނުވަތަ ކަނޑައެޅުނު އަދަބު މައާފުކުރިތާ 3 އަހަރުވެފައިވާ މީހަކަށް ވާންޖެހެއެވެ.

އިންތިޚާބުތަކާއި ބެހޭ އާއްމު ޤާނޫނު ބުނާގޮތުން ކެނޑިޑެސީއާއި މެދު ސުވާލު އުފެއްދިއްޖެ ނަމަ އެ މައްސަލަ ހުށައެޅޭނީ ހަމައެކަނި ސުޕްރީމް ކޯޓަށެވެ. އަދި މިގޮތަށް ހުށައަޅާ މައްސަލައެއް އެ ކޯޓަށް ހުށައަޅާތާ ގިނަވަގެން 7 ދުވަހުގެ ތެރޭގައި ނިންމަވަންޖެހެއެވެ. އަދި މި ފަދަ މައްސަލަތައް ނިންމަންވާނީ ސުޕްރީމްކޯޓުގެ ހުރިހާ ފަނޑިޔާރުން ހިމެނޭ ބެންޗަކުންކަމަށާއި ސުޕްރީމްކޯޓުގެ އެ ނިންމެވުމަކީ އެންމެ ފަހުގެ ނިންމެވުންކަމަށްވެސް ޤާނޫނު އަސާސީގައިވަނީ ބަޔާންކޮށްފައެވެ.