ޗަންދީގަރްގައި މީގެ މަހެއްހާ ދުވަސް ކުރިން ޝޫޓިންގފެށި ފިލްމު "ޖުގް ޖުގް ޖީއޯ" ޓީމުގެ މުހިންމު ބައެއް މެމްބަރުން ކޯވިޑަށް ޕޮޒިޓިވް ވުމުން ޝޫޓިންގ ހުއްޓާލަން ޖެހިއްޖެއެވެ.
ފިލްމުގައި ލީޑް ރޯލު އަދާކުރާ ވަރުން ދަވަން އާއި އެކްޓްރެސް ނީތޫ ކަޕޫރުގެ އިތުރުން ޑައިރެކްޓަރ ރާޖް މެހެތާ ވެސް ވަނީ ކޯވިޑް 19 އަށް ޕޮޒިޓިވް ވެފައެވެ. މީގެ އިތުރުން އެކްޓަރ އަނިލް ކަޕޫރުވެސް ކޯވިޑަށް ޕޮޒިޓިވް ވީކަމަށް އިއްޔެ އިންޑިއާގެ ބައެއް މީޑިއާ ތަކުން ޚަބަރު ފެތުރިއެވެ. ނަމަވެސް އަނިލް ވަނީ އޭނާ ކޮވިޑަށް ޓެސްޓުކޮށް ނަތީޖާ ނެގެޓިވް ވެފައި ވާކަން ސޯޝަލް މީޑިއާގައި ހާމަކޮށްފައެވެ.
ނަމަވެސް ޑައިރެކްޓަރާއި މުހިންމު ދެ އެކަޓަރުން ކޯވިޑަށް ޕޮޒިޓިވް ވުމުން ފިލްމުގެ ޝޫޓިންގ މެދުކަނޑާލާފައި ވާތީ އަނިލް ވަނީ މިހާރު ޗަންދީގަރުން އެނބުރި މުމްބާއީއަށް އައިސްފައެވެ. އެގޮތުން އޭނާ މުމްބާއީގެ އެއަރޕޯޓުން ނުކުންނަ ފޮޓޯތަކެއް މީޑިއާގައި ވަނީ ދައުރުވެފައެވެ. މީގެ އިތުރުން އަނިލްގެ ދަރިފުޅު ސޯނަމް ކަޕޫރުވެސް ވަނީ އޭނަގެ ބައްޕަގެ ސިއްހީ ހާލަތާގުޅޭގޮތުން މީޑިއާތަކުން ރަނގަޅަށް ޔަގީންނުކޮށް ދޮގުހަބަރު ފަތުރާފައި ވާކަމަށް ބުނެ މީޑިއާތަކަށް ފާޑުކިޔާފައެވެ.
އަނެއްކޮޅުން ކޯވިޑަށް ޕޮޒިޓިވްވި ނީތޫ ކަޕޫރު ޗަންދީގަރްގައި އައިސޮލޭޓްވުމަށް ފަހު މިހާރުވަނީ އެއަރ އެމްބިއުލާންސެއްގައި މުމްބާއީއަށް ދަތުރުކޮށްފައެވެ. ރިޕޯޓުތައް ބުނާގޮތުން އޭނާ މުމްބާއީއަށް އަނބުރާ ގެނައުމުގެ ހުރިހާކަމެއް ހަމަޖެއްސީ ދަރިފުޅު ރަންބީރް ކަޕޫރެވެ.
މި ފިލްމަކީ 7 އަހަރުގެ މެދުކެނޑުމަކަށްފަހު ނީތޫ ކަޕޫރު އަނބުރާ ފިލްމީ ދާއިރާއަށް ނުކުންނަ ފިލްމެވެ. ނީތޫ އެންމެ ފަހުން ފެނިގެންދިޔައީ 2013 ވަނަ އަހަރުގެ ފިލުމް "ބޭޝަރަމް" އިންނެވެ.
ކަރަން ޖޯހަރްގެ ދަރްމާ ޕްރޮޑަކްޝަނުން ގެނެސްދޭ މިފިލްމަކީ ބޮޑު ސްޓާ ކާސްޓަކާއެކު ގެނެސްދޭ ފިލްމެކެވެ. އެގޮތުން ވަރުން ދަވަން، ކިއާރާ އަދްވާނީ، އަނިލްކަޕޫރު، ނީތޫ ކަޕޫރު، ޕްރަޖަކްތާ ކޯލީގެ އިތުރުން މަނީޝް ޕައުލް ވެސް މި ފިލްމުން ފެނިގެންދާނެއެވެ. ފިލްމުގެ ޝޫތިންގ އަލުން ފެށޭނެކަމަށް ލަފާކުރަނީ މިމަހުގެ މެދުތެރޭގައެވެ.
