ބަންގަދޭޝްގެ ބޮޑުވަޒީރު ޝޭޚް ހަސީނާގެ އިސްތިއުފާއަށް ގޮވާ، މަގުތައް ބަންދުކޮށް އިދިކޮޅު ޕާޓީތަކުން ހިންގި ހަމަނުހެޖެހުންތައް ހުއްޓުވުމަށް ބަންގްލަދޭޝްގެ ފުލުހުން ރަބަރު ވަޒަނާއި ކަރުނަގޭސް ބޭނުން ކޮށްފިއެވެ.
ބަންގްލަދޭޝްގެ އިދިކޮޅު ޕާޓީ، ބަންގްލަދޭޝް ނޭޝަނަލް ޕާޓީ (BNP) އިން ހޮނިހިރު ދުވަހު ކުރިޔަށް ގެންދިޔަ މުޒާހިރާތަކުގައި ވަނީ، ޕެޓްރޯލް ބޮންތައް ގޮއްވާ، އަދި އެއްގަމު އުޅަނދުތަކުގައި ރޯވެސް ކޮށްފައެވެ.
ބާންގްލަދޭޝްގެ އިދިކޮޅު ޕާޓީތަކުން ޑިމާންޑް ކުރަމުންދަނީ، މިހާރުގެ ބޮޑުވަޒީރު ޝޭޚު ހަސީނާ މަގާމުން އިސްތިއުފާ ދެއްވާ، އަންނަ އަހަރު ކުރީކޮޅު ބޭއްވުމަށް ހަމަޖެހިފައިވާ އާންމު އިންތިޚާބު، ވަކިފަރާތަކަށް ނުޖެހޭ އެއްބައިވަންތަ ސަރުކާރެއްގެ ބެލުމުގެ ދަށުން ބޭވުމަށެވެ.
2018 ވަނަ އަހަރުންފެށިގެން ޖަލަށްލާފައިވާ، ކުރީގެ ބޮޑުވަޒީރު ޚާލިދާ ޒިޔާގެ، ބީއެންޕީން ވަނީ ފާއިތުވެދިޔަ މަސްތަކުގައި ބަންގްލަދޭޝްގައި ބޮޑެތި މުޒާހިރާތަކެއް ބާއްވާފައެވެ.
މިގޮތުން ފާއިތުވެދިޔަ ހުކުރު ދުވަހު ބޭއްވި މުޒާހިރާއަކީ މިހާތަނަށް އެޕާޓީން މިގޮތުން ބޭއްވި އެންމެ ބޮޑު މުޒާހިރާއެވެ. މި މުޒާހިރާގައި އަޑު އުފުލާފައިވަނީ ބަންގްލަދޭޝްގައި އާންމު ތަކެތީގެ އަގު އުފުލެމުން ދިއުމާ ދެކޮޅަށެވެ.
ބީއެންޕީން ބުނެފައިވަނީ ހޮނިހިރު ދުވަހު ހިނގި ހަމަނުޖެހުންތަކުގައި އެޕާޓީގެ ގިނަ އަދަދެއްގެ ސަޕޯޓަރުންނަށް އަނިޔާ ވެފައިވާކަމުގައެވެ. ފުލުހުން ބުނެފައިވަނީ މި ހަމަނުޖެހުންތަކައި މަދުވެސް 20 ފުލުސް އޮފިސަރުންނަށް އަނިޔާ ވެފައިވާކަމުގައެވެ.
ހަމަނުޖެހުންތަކަށްފަހު 90 މީހަކު ފުލުހުން ހައްޔަރު ކޮށްފައި ވެއެވެ. އޭގެ ތެރޭގައި ބީއެންޕީގެ އިސް ދެބޭފުޅަކު ހިމެނުނު ނަމަވެސް، ފަހުން އެބޭފުޅުން ވަނީ ދޫކޮށްލާފައެވެ.
