އަލަށް އުފެއްދި ދަ ޑިމޮކްރެޓްސް ޕާޓީގެ ފައުންޑަރ، އެމްޑީޕީގެ ކުރީގެ ރައީސް މުހައްމަދު ނަޝީދުއާއި، ދަ ޑިމޮކްރެޓްސް ޕާޓީގެ ރިޔާސީ ކެނޑިޑޭޓް މިރޭ އައްޑުއަށް ވަޑައިގެންފިއެވެ.
ނަޝީދުއާއި އިލްޔާސް އައްޑުއަށް ވަޑައިގަތުމުން އެ ދެބޭފުޅުންނަށް މަރުހަބާ ކިޔާފައިވަނީ ދަ ޑިމޮކްރެޓްސް ޕާޓީއަށް ތާއީދުކުރާ ފަރާތްތަކެވެ. ނަޝީދުއަށް މަރުހަބާ ކިޔުމަށް ހާޒިރުވި މީހުންގެ އަދަދު މީގެ ކުރިން ނަޝީދު އައްޑުއަށް ވަޑައިގަތުމުން މަރުހަބާ ކިޔާ މީހުންނަށްވުރު ތަފާތު ބޮޑުކޮށް މަދުކަން ފާހަގަ ކޮށްލެވެ.
ނަޝީދުއާއި އިލްޔާސް މިރޭ އައްޑުއަށް ވަޑައިގެންފައިވަނީ ދަ ޑިމޮކްރެޓްސްގެ ރިޔާސީ ކެމްޕޭން ރަސްމީކޮށް ފެށުމަށެވެ.
މި ދަތުރުފުޅުގެ ތެރެއިން އިލްޔާސްގެ ކެމްޕެއިން ޖަލްސާއެއް އައްޑޫސިޓީ ހުޅުދޫގައި މާދަމާ ރޭ ބޭއްވުމަށް ވެސް ވަނީ ހަމަޖެހިފަ އެވެ. އޭގެ އިތުރުން ކެމްޕޭނަށް އައްޑޫގައި ޑޯ-ޓު-ޑޯ ހަރަކާތްތަކެއް ކުރިއަށް ގެންދިއުމަށްވެސް ވަނީ ހަމަޖެހިފަ އެވެ.
ދަ ޑިމޮކްރެޓްސް އިން މައުލޫމާތު ދީފައިވާގޮތުގައި ނަޝީދާއި އިލްޔާސް އައްޑޫއަށް ކުރައްވަނީ ތިން ދުވަހުގެ ދަތުރުފުޅެކެވެ.
އައްޑޫ ސިޓީއަށް ދަ ޑިމޮކްރެޓްސްއިން ކުރާ މި ދަތުރަކީ ރަސްމީކޮށް ޕާޓީގެ ރިޔާސީ ކެންޑިޑޭޓާއި އެކު ކުރާ ފުރަތަމަ ދަތުރުކަން ފާހަގަކޮށްލެވެއެވެ.
އިލްޔާސް ލަބީބު ދަ ޑިމޮކްރެޓްސްގެ ރިޔާސީ ޓިކެޓު ކަށަވަރުކުރެއްވީ އިއްޔެ ކުރިޔަށް ގެންދިޔަ ޕްރައިމެރީން ނެވެ.
ޕްރައިމެރީއަށް ކުރިމަތިލެއްވި އިލްުޔާސް ލަބީބު އެކަނި ކަމުން ވޯޓު ކުރިޔަށް ގެންގޮސްފައިވަނީ ފެންނަ ނުފެންނަ ވޯޓެއްގެ ގޮތުގައި އެވެ. މި ވޯޓު އިލްޔާސް ކާމިޔާބު ކުރެއްވީ 94 ޕަސެންޓު ވޯޓާއި އެކުގައި އެވެ.
