އަދުގެ ދުނިޔޭގައި މިނިވަން ގައުމެއްގެ ގޮތުގައި ދެމިއޮތުމަށްޓަކާ ކޮންމެ ގައުމަކަށްވެސް ބޭނުންވަނީ ވަރުގަދަ އިގްތިސާދެއްކަމުގައި، ޖުމުހޫރީ ޕާޓީގެ ލީޑަރު ގާސިމް އިބުރާހިމްގެ ތަރުޖަމާ އަމީން ވިދާޅުވެއްޖެއެވެ.

އަމީން މިހެން ވިދާޅުވީ މިއަދު ފާހަގަ ކުރަމުންދާ ދިވެހިރާއްޖޭގެ 59ވަނަ މިނިވަން ދުވަހުގެ މުނާސަބަތުގައި، ޖުމުހޫރީ ޕާޓީގެ ހަރުގެ މ، ކުނޫޒުގައި ރޭ ބޭއްވި ޖުމުހޫރީ ޕާޓީގެ ރަސްމީ ޖަލްސާގައި ވާހަކަ ދައްކަވަމުންނެވެ.

ރޭގެ ޖަލްސާގައި ވާހަކަ ދައްކަވަމުން އަމީން ވިދާޅުވީ ގައުމެއްގެ މިނިވަންކަން ދެމެހެއްޓުމަށް އަދުގެ ދުނިޔޭގައި ގައުމެއްގެ ވެރިކަމުގައި ބެހެއްޓުމަށް ބޭނުންވަނީ އެންމެ މޮޅަށް ބަޑިޖަހަން ދަންނަ މީހާ ނޫންކަމަށާއި، އަދި އެމީހަކު ވާންޖެހެނީ އެންމެ ގިނަދުވަހު ސިފައިންގެ ޔުނިފޯމުގައި ޚިދުމަތް ކޮށްފައި ހުންނަ މީހާ ނޫންކަމަށާއި، އެހެންނަމަވެސް އެމީހަކު ވާންޖެހެނީ އެންމެ ވިސްނުން ތޫނު މީހާކަމުގައެވެ.

ދިވެހިރާއްޖޭގެ ރައީސުލްޖުމުހުރިއްޔާކަމުގެ މަގާމަށް މީހަކު ގެންނައިރު އެމީހަކަށް އަޅުގަޑުމެންގެ މިނިވަންކަން ހިމާޔަތް ކުރެވިދާނެތޯ ދިފާއު ކުރެވިދާނެތޯ، މި ސުވާލު އުފެއްދީމާ މި ސުވާލުގެ ޖަވާބަކީ، އެންމެ އަމާޒަށް ބަޑިޖަހަން އެނގޭމީހާތޯ؟ އެންމެ ޔުނީފޯމުގަ ގިނަ ދުވަހު ޚިދުމަތް ކުރި މީހާތޯ؟ ނުވަތަ އެމީހާއަކީ ކިހާ މިންވަރަކަށް ހަތިޔާރުގެ ބޭނުންކުރަން އެނގޭ މީހާތޯ؟ މި ސުވާލެއް އަޅުގަޑުމެން ނުއުފައްދަން.

އަމީން ވިދާޅުވިއެވެ.

އަމީން ވިދާޅުވީ، އިގްތިސާދީގޮތުން ބާރުވެރި ގައުމަކަށް ވުމަށް ގައުމުގެ ފައިސާގެ އަގު ހުންނަންޖެހޭ ކަމަށާއީ، ސިންގަޕޯރފަދަ ކުދި ގައުމުތައް އެރޮގުން ކުރިއަރައިގެން ދިޔައީ، އެގައުމުތަކުގެ ވެރީން އިގްތިސާދު ކޮޅަށްޖަހާ، ގައުމުގެ ފައިސާއަކީ ބާރުގަދަ ފައިސާގެ ގޮތުގައި އިގްތިސާދު ބައްޓަން ކޮށްގެން ކަމަށެވެ. އަދި އެވިސްނުމާއި ފިކުރު، ރާއްޖޭގެ ސިޔާސީ ލީޑަރުންގެ ތެރެއިން އެންމެ ފުރިހަމައަށް ތަންފިޒު ކުރައްވާފައިވަނީ ޖުމުހޫރީ ޕާޓީގެ ލީޑަރުކަން ފާހަގަ ކުރައްވަމުން އަމީން ވިދާޅުވީ، ގާސިމްގެ ވެރިކަމެއްގައި ދިވެހިރާއްޖޭގެ އިގްތުސާދު ކުރިއަރައިގެންދާނެ ކަމާމެދު އެއްވެސް ޝައްކެއް ނެތްކަމުގައެވެ.

އަމީންގެ ވާހަފުޅުގައި އިތުރަށް ވިދާޅުވީ މި ޒަމާނުގަ މިނިވަން ދެމެހެއްޓުމަށްޓަކާ، ނުވަތަ މިނިވަންކަން ދިފާއު ކުރުމަށްޓަކާ ބޭނުންވަނީ އިލްމީ ޖީލެއް ކަމުގައެވެ.

ހަގީގަތުގެ މި ޒަމާނުގަ ގައުމެއްގެ މިނިވަންކަން ދިފާއު ކުރުމަށްޓަކާ، މިނިވަންކަން ދެމެހެއްޓުމަށްޓަކާ، މިނިވަން ގައުމެއްގެ ގޮތުގައި އޮތުމަށްޓަކާ އެބަޖެހޭ ވަަރަށް އިލްމީ ޖީލެއް ބިނާކުރަން. ކީއްވެގެންތޯ؟ އިލްމީ ޖީލަކާ ނުލާ ވާދަވެރި ދުނިޔޭގަ އެގައުމެއް ސާބިތުކަމާއެކީގަ ދެމެހެއްޓުމުގެ ގާބިލްކަމެއް ނުލިބޭނެ. ރާއްޖޭގެ އެއް ފަރުދަކު އިލްމީ ޖީލެއް ބިނާކުރުމަށް ޚިދުމަތް، މަސައްކަތްތަކެއް ކޮށްފައިވާނަމަ އެބޭފުޅަކު ވާނީ ގާސިމް އިބުރާހިމަށް.

އަމީން ވިދާޅުވީ އެހެންކަމުން ގައުމުގެ ހުންގާނު ގާސިމްއާ ހަވާލުކުރުމަށް ބިރެއް ނެތްކަމަށާއި، ގާސިމް ގައުމުގެ މިނިވަންކަން ދަމަަހައްޓަވާ ދެއްވާނޭކަމުގެ އެއްވެސް ޝައްކެއް ނެތްކަމުގައެވެ. އަމީން ވިދާޅުވީ ގައުމުގެ އިލްމީ ޖީލެއް ބިނާކުރުމުގެ މަސައްކަތް ގާސިމް ކުރެއްވީ، އެފަދަ މަސައްކަތްތަކެއް ކުރުމުގެ ގާބިލްކަން ދައުލަތުގަވެސް ނެތްއިރު ކަމަށާއި، އެހެންކަމުން އެމަނިކުފާނުގެ ޒައާމަތެއްގައި ގައުމުގެ މިނިވަންކަން ހިމާޔަތް ކުރުމަށް ބޭނުންވާ އިލްމީ ޖީލެއް ބިނާކޮށްދެއްވާނެކަމުގަ ޔަގީންކަން އޮތް ކަމުގައެވެ.