ޤާނޫނު އަސާސީން ދިވެހި ރައްޔިތުންނަށް ކަށަވަރުކޮށްދޭ ތިން ހައްގެއް ފުލުހުންނަށް ހަނިކުރުމަށް ފުލުހުންގެ ޚިދުމަތުގެ ބިލު ކޮމިޓީން ފާސްކުރިއިރު ހިމަނައިފިއެވެ. ފުލުހުންގެ ޚިދުމަތުގެ ބިލު ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން މިހާރު ވަނީ ފާސްކޮށްފައެވެ.
ކޮމިޓީން ފާސްކުރި ދިވެހި ފުލުހުންގެ ޚިދުމަތުގެ ބިލުގެ ރިޕޯޓްގައި ވަނީ ދިމިގްރާތީ މުޖްތަމަޢުތަކުގައި ފުލުހުންގެ ޚިދުމަތް ފަދަ ޚިދުމަތެއްގައި އެހައްގުތައް ހަނިކުރާ ހާލަތްތަކާއި މިންވަރަށް، ހަނިކުރެވިދާނެ ކަމަށާއި، އެހައްގުތައް ހަނިކުރެވޭނެ ހާލަތްތަކާއި، ދާއިރާތައް ގާނޫނުގެ ދަށުން ހަދާ ގަވައިދުގައި ކަނޑައެޅިގެން ބަޔާންކޮށްފައި އޮންނަންވާނެކަމަށެވެ.
ފުލުހުންގެ ޚިދުމަތުގެ ބިލުން ފުލުހުންނަށް ހަނިކުރުމަށް ކޮމިޓީން ފާސްކުރި ތިން ހައްޤަކީ:
1- ގާނޫނުއަސާސީގެ 27 ވަނަ މާއްދާއިން ލިބިދޭ ހިޔާލު ފާޅުކުރުމުގެ ހައްގާއި،
2- ގާނޫނުއަސާސީގެ 31 ވަނަ މާއްދާއިން ލިބިދޭ އިހްތިޖާޖް ކުުރުމުގެ ގޮތުން މަސައްކަތް ހުއްޓާލައި، ހަޅުތާލުކުރުމުގެ ހައްޤާއި،
3- ގާނޫނުއަސާސީގެ 32 މާއްދާއިން ލިބިދޭ އެއްވެއުޅުމުގެ މިނިވަންކަމުގެ ހައްގު
މި ތިން ހައްގު ފުލުހުންނަށް ހަނިކުރުމަށް ކޮމިޓީން ފާސްކޮށްފައިވާއިރު މިއީ ޤާނޫނު އަސާސީން ކޮންމެ ދިވެހި ރައްޔިތަކަށްވެސް ކަށަވަރުކޮށްދޭ ހައްގުތަކެކެވެ.
ޤާނޫނު އަސާސީގެ 27 ވަނަ މާއްދާގައި ބަޔާންކޮށްފައިވަނީ މިނިވަންކަމާއެކު ފިކުރުކުރުމާއި، އިސްލާމްދީނުގެ އަޞްލަކާ ޚިލާފުނުވާ ގޮތެއްގެ މަތީން އެމީހެއްގެ ބުއްދިއަށް ފެންނަ ގޮތްތަކާއި ޚިޔާލުތައް ދުލާއި ޤަލަމުން އަދި މިނޫންވެސް ގޮތްގޮތަށް ފާޅުކުރުމުގެ މިނިވަންކަން ކޮންމެ މީހަކަށްމެ ލިބިގެންވާނެކަމަށެވެ. އަދި 31 ވަނަ މާއްދާގައި ބަޔާންކޮށްފައިވަނީ އިޙްތިޖާޖުކުރުމަށްޓަކައި ހަޅުތާލުކުރުމުގެގޮތުން މަސައްކަތް ހުއްޓައިލައިގެން ތިބުމުގެ ޙައްޤު ދިވެހިރާއްޖޭގައި ވަޒީފާ އަދާކުރާ މީހުންނާއި އެނޫންވެސް
މަސައްކަތްތެރީންނަށް ލިބިގެންވާކަމަށެވެ. އަދި ޤާނޫނު އަސާސީގެ 32 ވަނަ މާއްދާއިން ކޮންމެ ރައްޔިތަކަށް ކަށަވަރުކޮށްދެނީ ދައުލަތުގެ ހުއްދައެއް ކުރީން ހޯދުމަކާނުލައި ސުލްޙަވެރިކަމާއެކު މިނިވަންކަން ކޮންމެ މީހަކަށްމެ ލިބިގެލިބިގެންވާކަމަށެވެ.
މި ހައްގުތަކަކީ ހަމަހަމަކަމާއެކު ކޮންމެ ރައްޔިތަކަށްވެސް ލިބިގެންވާ އަސާސީ ހައްގުތަކެއްކަމަށް އެންމެ ބޮޑަށް ވަކާލާތުކުރި ޕާޓީއަކީ ވެރިކަން ހިންގާ މައި ޕާޓީ އެމްޑީޕީއެވެ. ނަމަވެސް އެޕާޓީގެ މެޖޯރިޓީ އޮވެ ކޮމިޓީން މިވަނީ އެހައްގުތައް ފުލުހުންނަށް ހަނިކުރުމަށް ފާސްކޮށްފައެވެ. ނަމަވެސް މި ބިލު ކޮމިޓީން ފާސްކޮށްފައިވުމާއެކު އެމްޑީޕީން ނެރުނު ބަޔާނެއްގައިވަނީ ފުލުހުންގެ ޤާނޫނަކީ ފުލުހުންނަށާއި ފުލުހުންގެ މުއައްސަސާއަށް މީގެކުރިން ދުވަހަކުވެސް އައިސްފައި ނުވާފަދަ ހެޔޮ ރަނގަޅު ކުރިއެރުންތަކެއް ހޯދައިދޭނޭ ޤާނޫނެއްކަމަށެވެ.
އެމްޑީޕީގެ ތެރޭގައި ޚިޔާލު ތަފާތު އުފެދިފައިވާ ފުލުހުންގެ ބިލާއި ގުޅޭގޮތުން އެމްޑީޕީން ނެރުނު ބަޔާނެއްގައިވަނީ، ދިވެހި ފުލުހުންގެ ޚިދުމަތުގެ ބިލަކީ، އެ ބިލު ފާސްކޮށް ޤާނޫނަކަށްވެ ތަންފީޒުކުރެވުމުން، ފުލުހުންނާއި ފުލުހުންގެ މުވައްސަސާގެ ތަޞައްވަރަށާއި ކުރިއެރުމަށް ބޮޑެތި ހެޔޮ ބަދަލުތަކެއް އަންނާނެ ޤާނޫނެއްކަމަށެވެ.
ފުލުހުންގެ ޚިދުމަތުގެ ބިލު ކޮމިޓީން ފާސްކޮށްފައިވާ ރިޕޯޓްގައި ވަނީ ގާނޫނުއަސާސީން ދިވެހި ރައްޔިތަކަށް ލިބިދޭ ވޯޓު ދިނުމުގެ ހައްގު މިހާރެކޭވެސް އެއްގޮތަށް ދިނުމަށެވެ. ޕާޓީގެ މެމްބަރަކަށް ވުމާއި ސިޔާސީ ހަރަކާތްތަކުގައި ބައިވެރި ނުވޭވޭނެ ކަމަށް މިހާރުވެސް އޮންނަ މާއްދާ އެގޮތުގައި ވަނީ ހިމަނާފައެވެ.
ފުލުހުންނަށް ބައެއް ހައްގުތައް ހަނިކުރުމަށް ކޮމިޓީން ފާސްކޮށްފައިވާއިރު އެހައްގުތައް ދިނުމަށް އެންމެ ބޮޑަށް ވާހަކަދެއްކި ފަރާތްތަކުގެ ޢަމަލާއި ބަސް ދިމާނުވާކަން ބައެއް ފަރާތްތަކުން އަންނަނީ ފާހަގަކުރަމުންނެވެ.
އެމްޑީޕީން ފުލުހުންގެ ބިލާއި ގުޅޭގޮތުން ބަޔާނެއް ނެރެފައިވާއިރު، ބިލުގެ ކޮމިޓީ މަރުހަލާގައި މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ބިލަށް ހުށަހެޅުއްވި އެއްވެސް އިސްލާހެއް ކޮމިޓީން ބަލައި ގެންފައި ނުވެއެވެ. އަދި ފުލުހުންނަށް ހަތިޔާރު ދިނުމަށް ރައީސް ނަޝީދާއި އެމްޑީޕީގެ ލީޑަރޝިޕްގެ ބައެއް ބޭފުޅުން ދެކޮޅު ހެއްދެވި ނަމަވެސް ކޮމެޓީން ބިލު ފާސްކޮށްފައިވަނީ އެބާރު ފުލުހުންނަށް ދިނުމަށެވެ. މަޖިލީހުގެ މިދައުރުގެ އެންމެ ފަހު ޖަލްސާގައި މިބިލު މަޖިލީހުން ފާސްކުރާނެކަމަށް މަޖިލިސް ރައީސް ވަނީ ވިދާޅުވެފައެވެ.
