ކުރިއަށް އޮތް ރިޔާސީ އިންތިޚާބުގައި ދަ ޑިމޮކްރެޓްސްގެ ފަރާތުން ވާދަކުރައްވާ ރިޔާސީ ކެނޑިޑެޓް އިލްޔާސް ލަބީބް އިންތިޚާބުގެ ދެވަނަ ބުރަށް ދާނެކަމުގެ ފުރިހަމަ ޔަގީންކަން އެބައޮތްކަމުގައި ރައީސް ނަޝީދު ވިދާޅުވެއްޖެއެވެ.
މިރޭ ހައުސް އޮފް ޑިމޮކްރެޓްސްގައި ބޭއްވި ޖަލްސާގައި ވާހަކަ ދައްކަވަމުން ރައީސް ނަޝީދު ވަނީ ރައީސް ޞާލިހަށް ވަރަށް ބޮޑަށް ފާޑު ވިދާޅުވެފައެވެ. ޚާއްސަކޮށް ރައީސް ޞާލިހުގެ އުމުރާއި ސިއްޚީ ހާލަތާއި ގުޅޭގޮތުން ނަޝީދު ވަނީ ވާހަކަ ދައްކަވާފައެވެ. ރައީސް ނަޝީދު ވިދާޅުވީ ރާއްޖޭގެ ރައްޔިތުން މިއަދު ބޭނުންވަނީ ޒުވާން ވެރިއެއް ކަމަށެވެ. އެވެރިއަކީ ތަންދޮރު ދަންނަ، ސިއްޚީ ހާލަތުވެސް ރަނގަޅު ހާލަތެއްގައި ހުރި ބޭފުޅަކަށް ވާންޖެހޭކަމަށެވެ.
ރައީސް ޞާލިހަށް ފާޑު ވިދާޅުވަމުން ރައީސް ނަޝީދު ވިދާޅުވީ ރައީސް ޞާލުހު ރަށްރަށް އަރައި އިންތިޚާބު ކާމިޔާބު ކުރެއްވުމަށް ވަމުންދާ ވައުދުތަކަކީ އިންތިޚާބު ކާމިޔާބު ކުރެއްވުމަށް އޮތް އެއްވެސް ފުރުސަތެއް ނޫންކަމަށެވެ. ވާ ވައުދުތަކާއި ކޮށްދީފައިވާ ކަންކަމަކީ މާޒީ ކަމަށާއި ދެން ރައްޔިތުން ބޭނުންވަނީ މުސްތަގުބަލުގައި ވާން އޮތް އުންމީދު ކަމަށެވެ. އިލްޔާސް ލަބީބް ރައްޔިތުންނަށް ހުށަހަޅުއްވަމުންދަނީ އެކަންތައްތައް ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ސިޔާސީ މަސްރަހުގައި މިވަތު އޮތް މަންޒަރަށް ބަލާއިރު ޑިމޮކްރެޓްސްގެ ކެނޑިޑޭޓް އިލްޔާސް ލަބީބް ދެވަނަ ބުރަށް ދާނެކަން ޔަގީންކަމަށެވެ. އިލްޔާސް ލަބީބު ނޫނީ އިޤްތިޞާދީ ކަންކަން ރަނގަޅަށް ދެނެވަޑައި ގަންނަވާ، ދިވެހިންގެ އުންމީދުތަކާއި ހުރި މައްސަލަތައް ހައްލު ކޮށްދެވޭނެ ކެނޑިޑޭޓެއް ނުފެންނަކަމަށް ރައީސް ނަޝީދު ވިދާޅުވިއެވެ.
އިލްޔާސް ލަބީބް ދެވަނަ ބުރަށް ނުދާނެ އެއްވެސް ގޮތެއް އަޅުގަނޑަށް ނުފެނޭ. އެމްޑީޕީގެ ބޮޑުބައި އަޅުގަނޑުމެން ނަގާނަ. އެމްޑީޕީގެ މެމްބަރުންދެކެ އަޅުގަނޑު ވަރަށް ލޯބިވަން. އަބަދުވެސް އިޚްތިރާމް ކުރާނަން. އަޅުގަނޑުމެން ދެވަނަ ބުރަށް ގެންދިއުމުގައި ތިޔަބޭފުޅުންގެ ހިއްސާ ބޮޑު.
– ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ދިވެހިން މިއަދު ބޭނުންވަނީ ޒުވާން ވެރިކަމެއް ކަމަށެވެ. ރައީސް ޞާލިހުގެ އުމުރުފުޅުން 60 އަހަރު ވެފައިވާއިރު ދެން ރައީސް ޞާލިހަށް އޮތް އެންމެ ރަނގަޅު ގޮތަކީ ވެރިކަމާއި ނޫޅުއްވާ ފުރަށް ޖެހިވަޑައިގަތުންކަމަށެވެ.
އިބްރާހިމް މުހައްމަދު ޞާލިހުވެސް މުސްކުޅިވެއްޖެ. ދިއްދޫ މީހުން ބުނީ ޑިލޭ ސްޕްރޭ ޖަހާފަ. ފާސް ސްޕްރޭ އަކީ ޒުވާންކަން.
– ރައީސް ނަޝީދު ވިދާޅުވިއެވެ.
ރައީސް ނަޝީދު ވަނީ ވެރިކަން ކުރަމުންދާ ގޮތަށްވެސް ރައީސް ޞާލިހަށް ވަރަށް ބޮޑަށް ފާޑު ވިދާޅުވެފައެވެ. ޚާއްސަކޮށް ރައްޔިތުންނަށް ވީ ވައުދުތައް ދޫކޮށް ވައްކަމާއި ޚިޔާނާތަށް މުޅި ދައުލަތުގެ ތެރޭގައި އޮތްކަމުގެ ކަންބޮޑުވުން ރައީސް ނަޝީދު ވަނީ ފާޅު ކުރައްވާފައެވެ.
