ރާއްޖޭގައި މިހާތަނަށް އުފެދުނު އެންމެ ބޮޑު އަދި އެންމެ ކާމިޔާބު ސިޔާސީ ޕާޓީއަށް ވެރިކަން ކުރަން ލިބިނު ރިޔާސީ ދެވަނަ ދައުރުގައި އެޕާޓީއަށް ކުރިމަތިލާން ޖެހުނީ ފާއިތުވެދިޔަ ތަނުގައި އެޕާޓީއަށް ކުރިމަތި ލާން ޖެހިދާނެކަމަށް ގިނަބަޔަކު ގަބޫލުކުރި، އަދި ހީވެސް ކޮށްފައިވާ ހާލަތެއް ނޫނެވެ.

އޭގެ އެއް ސަބަބަކީ، އެމްޑީޕީގެ އެތެރޭގައި ޒަމާނުއްސުރެ އޮންނަމުން އައިސްފައިވާ ޑިމޮކްރަސީގެ ވަރުގަދަ އަސާސްތަކެވެ. ޚިޔާލު ފާޅުކޮށް، ބަހުސް ކޮށްގެން އެޕާޓީން ފާއިތުވި ދިގު ޒަމާންތަކުގައި، ކުރިމަތިވި ކޮންމެ ގޮންޖެހުމެއްވެސް ގިރާކޮށްފައި ވުމެވެ. އޭގެ އިތުރަށް ޕާޓީގެ އިސް ލީޑަރޝިޕުން ފާއިތުވެދިޔަ ތަނުގައި ފެނިގެން ގޮސްފައިވާ އެއްބައިވަންތަކަމާއި، ޕާޓީގެ މަސްލަހަތާއި އަރާ ހަމަވުމުން، ގޮތްދޫކޮށް، އެންމެ އެކުވެގެން ކޮށްފައިވާ މަސައްކަތްތަކެވެ.

އެހެންނަމަވެސް، ކުރީގެ ރައީސް ނަޝީދުއާއި މިހާރުގެ ރައީސް ސާލިހުގެ ލީޑަރޝިޕްގައި، ދެވަނަ ފަހަރަށް ޕާޓީއަށް ވެރިކަމަށް އާދެވި، ކުރަން ޖެހުން ދަތުރު ވެގެން ދިޔައީ އެހާ އަމާން ދަތުރަކަށް ނޫނެވެ. ގަދަ ކަނޑުގައި އެއް އޮޑިއެއްގައި ދެބޭފުޅުންނަށް ހިފަހައްޓާ ނުލެވި، އޮޑި އަރި އަޅާލީއެވެ.

އާދެ! އެމްޑީޕީ ބައިބައިވެ، އެތައް އަހަރެއް ވަންދެން އެމްޑީޕީގެ ރައީސްކަމާއި، ހުރިހާ ބާރެއް މުށުތެރެއަށް ލައްވައިގެން ހުންނެވި، ޕާޓީގެ ރައީސް އޮޑިން ފުންމަވާ ލެއްވީއެވެ. ބައެއް ފަރާތްތަކުން މިއަދު ގަބޫލު ކުރާގޮތުގައި އެމްޑީޕީގެ އޮޑިން ނަޝީދު ސިޔާސީ ގަދަ ކަނޑުގެ ބިޔަ ރާޅުތަކުގެ ތެރެއަށް ފުންމަވާލެއްވީ ލައިފް ޖެކެޓް އަޅުއްވައިގެނެއް ނޫނެވެ.

އޭގެ ނަތީޖާއަކަށް ވެގެން ދިޔައީ، މިއަދު ނަޝީދަށް ފަތަން ޖެހިފައިވަނީ "ކަރުތާ ފެނުގައި"، އެކީގައި ތިއްބެވި މަދު ބައެއްގެ އެހީތެރިކަމުގައެވެ. ސަލާމަތުގެ އައްސޭރިއަކަށް ދަތުރު ކުރެއްވޭތޯ މަސައްކަތް ކުރެއްވަމުން ގެންދަވަނީ، ސިޔާސީ ގޮތުން އެތައް ބަޔަކު ގުރުބާން ކުރައްވައިގެންވެސް މެއެވެ.

މިގޮތުން، އެމްޑީޕީ ބައިބައިވެ، އެޕާޓީ ރޫޅި، ޕާޓީ ދޫކޮށް ދިޔަ މަދު ބަޔަކާއެކު ނަޝީދު އުފެއްދި "ދަ ޑިމޮކްރެޓްސް" ޕާޓީގެ އެންމެ އިސް ލީޑަރެއްގެ ގޮތުގައި ނަޝީދު ހުންނެވި ނަމަވެސް، އެޕާޓީގެ ފަރާތުން ކުރިޔަށް އޮތް ރިޔާސީ އިންތިޚާބުގައި ވާދަކުރައްވާކަށް ނަޝީދު ބޭނުންފުޅެއް ނުވިއެވެ.

ރާއްޖޭގައި މިވަގުތު އޮތް އެންމެ ކުޑަ ޕާޓީގެ ގޮތުގައި ނަޝީދުގެ ދަ ޑިމޮކްރެޓްސް ޕާޓީ އޮވެ، އެހެންނަމަވެސް ސަފުން ބާކީވެގެން ދިޔަ ނުދިނުމަށްޓަކާ ޕާޓީގެ ފަރާތުން ކުރިޔަށް އޮތް ރިޔާސީ އިންތިޚާބަށް ނެރުއްވުމަށް ނަޝީދު އެންމެ ފަހުން ނިންމެވީ ރައްޔިތުންގެ މަޖިލިހުގެ އައްޑޫ ހުޅުދޫ ދާއިރާގެ މެމްބަރު އިލްޔާސް ލަބީބެވެ.

ނަޝީދުގެ ސިޔާސީ ގުރުބާނަކަށް އިލްޔާސް!

ނަޝީދާއި ރައީސް ސާލިހާ ދެބޭފުޅުންގެ މެދުގައި އުފެދުނު ސިޔާސީ ޚިޔާލު ތަފާތުވުންތަކާއެކު، އެމްޑީޕީ ބައިބައިވެ، އެޕާޓީގެ ބަނޑުން އާޕާޓީއެއް ވިހެއިއިރު، އާ ޕާޓީ އުފެއްދުމަށްވެސް އެންމެ އިސްކޮށް ހަރަކާތްތެރިވި އެއް ބޭފުޅަކަށް ވެގެން ދިޔައީ އައްޑޫ ހުޅުދޫ ދާއިރާގެ މެމްބަރު އިލްޔާސް ލަބީބެވެ.

އެއީވެސް އެމްޑީޕީ ފަތަހަ ކުރެވޭތޯ، ޕާޓީގައި ހުންނަވައިގެން ނަޝީދު ކުރެއްވި މަސައްކަތުގައި، އެމްޑީޕީގެ އެތެރޭގައި ނަޝީދު ފެކްޝަންގެވެސް އިސް މެމްބަރެއްގެ ގޮތުގައި ހުންނެވުމަށްފަހުއެވެ. އެއަށްފަހު އިލްޔާސް ލަބީބު ހިމެނިގެން ދިޔައީ، ނަޝީދު އުފެއްދެވި އާ ޕާޓީ އުފެއްދުމަށްޓަކާ، އެންމެ ފުރަތަމަ އެމްޑީޕީ ދޫކޮށް ދިޔަ މެމްބަރުންގެ ތެރޭގައި ވެސްމެއެވެ.

އެހެންކަމުން ހުރިހާ ގޮތަކުން ބެލި ކަމުގައިވި ނަމަވެސް، އިލްޔާސް ލަބީބު މިއަދާއި ހަމައަށް ފެންނާން ހުރީ، އެމްޑީޕީގެ އެތެރޭގައި ތިބި، ނަޝީދަށް އެންމެ އިޚްލާސްތެރި ނަޝީދަށް "މަރުދޭ" އެއް މެމްބަރުގެ ގޮތުގައެވެ.

އަދި އެކަން މިއަދުވެސް އިލްޔާސް ލަބީބު ގެންދަވަނީ އަމަލީ ގޮތުން ސާބިތު ކޮށްދެއްވަމުންވެސް މެއެވެ. އޭގެ އެންމެ އަލިގަދަ ހެއްކެއްގެ ގޮތުގައި މިއަދު ފެންނާން އޮތީ ނަޝީދުގެ "ދަ ޑިމޮކްރެޓްސް" ޕާޓީގެ ފަރާތުން ކުރިޔަށް އޮތް ރިޔާސީ އިންތިޚާބުގައި ވާދަ ކުރެއްވުމަށް އިލްޔާސް ލަބީބު ނިންމެވި ހިސާބުންނެވެ.

ސަބަބަކީ، "ދަ ޑިމޮކްރެޓްސް" ޕާޓީ ރަޖިސްޓްރީ ކުރެނު ނަމަވެސް އެޕާޓީ އަދި އޮތީ ހަމަ ކިރިޔާ 3،000 މެމްބަރުން ހަމަވާ ޕާޓީއެއްގެ ގޮތުގައެވެ. ރަށްރަށުގައި ޕާޓީގެ އެކްޓިވިސްޓުންނެއް ނެތެވެ. ޕާޓީގައި ސިޔާސީ ހަކަތައެއް ނެތެވެ. ބޮޑު ރިޔާސީ އިންތިޚާބަކާއި ކުރިމަތިލާން ޖެހިފައިވާއިރު، ވަރުގަދަ ރިޔާސީ ކެމްޕޭނެއް ކުރެވޭވަރުގެ މާލީ ތަނަވަސްކަމެއްވެސް ޕާޓީއަކު ނެތެވެ.

ގިނަބަޔަކު ގަބޫކުރާ ގޮތުގައި، ފާއިތުވެދިޔަ އެމްޑީޕީގެ ރިޔާސީ ޕްރައިމަރީގައި ވާދަ ކުރައްވައިގެން ނަޝީދަށް 15،000 ވޯޓު ލިބުނު ނަމަވެސް، ރިޔާސީ އިންތިޚާބުގައި ވާދަކޮށްގެން ނަޝީދަށް މިހާރު 10،000 ވޯޓު ހަމަ ކުރެވިދާނެކަމާމެދުވެސް ޝައްކެވެ. އެހެންކަމަށް ވާނަމަ، އަމިއްލަފުޅަށް ރިޔާސީ އިންތިޚާބެއްގައި ވާދަކޮށް، ބޮޑު ބައްޔަކުން ބަލިވެގެން، އެ ލަދުވެތިކަމާ ކުރިމަތުލުން ވެގެންދާނީ ނަޝީދަށް ތަހައްމަލް ކުރަން އުދަގޫ ކަމަކަށެވެ.

ހައްލެއްގެ ގޮތުގައި ނަޝީދަށް ފެނިވަޑައިގެންނެނީ، މިހާތަނަށް އިޚްލާސްތެރިކަން ދައްކަވަމުން ގެންދެވި، ގާތް ބޭފުޅަކު ގުރުބާންކޮށް، "ފޭސް ސޭވިން" ފޯމިއުލާއަކަށް ވަޑައިގެންނެވުމެވެ.

އެހެންކަމުން، ކުރިޔަށް އޮތް ރިޔާސީ އިންތިޚާބު ކާމިޔާބުކޮށް، ވެރިކަމަށް އާދެވިދާނެކަމުގެ އެއްވެސް އުއްމީދެއް ނެތް ނަމަވެސް، "ސަފުން ބާކީވެ" ނުދިއުމަށް މަރުފަލި ޖައްސަވަމުން ގެންދަވާ ނަޝީދަށްޓަކާ އިލްޔާސް ލަބީބު ވެވަޑައިގެންނެވީ އޭގެ ޒާތުގައި ހަގީގަތުގައިވެސް ބޮޑު ގުރުބާނީއެއް ކަމުގައި މިއަދު މިވަނީ ގަބޫކުރަން މަޖުބޫރު ވެފައެވެ.

އިލްޔާސް ލަބީބު ނެރުއްވީ އެހެން ގޮތެއް ނެތިގެން!

ވެރިކަންކުރާ އެމްޑީޕީގެ އެތެރޭގައި އުފެދިގެންދިޔަ ހަމަނުޖެހުންތަކާއެކު، އެޕާޓީގެ އެތެރެއިން ބާރުވެރިކަން ހޯދުމަށް ނަޝީދު ކުރެއްވި ހުރިހާ މަސައްކަތެއްވެސް ނާކާމިޔާބު ވެދިއުމަށްފަހު، އެނޫން އެތައް ހައްލެއް ހޯދުމަށްވެސް ނަޝީދުވަނީ ފާއިތުވެދިޔަ ތަނުގައި މަސައްކަތް ކޮށްފައެވެ.

މިގޮތުން، އެންމެ ފުރަތަމަ ނަޝީދު މަސައްކަތް ކުރެއްވީ އެމްޑީޕީގެ ޗެއަރޕާސަން އިންތިޚާބު ކާމިޔާބުކޮށް، ޕާޓީގެ އެތެރެ ފަތަހަ ކުރެއްވުމަށެވެ. އެއިންތިޚާބު ނާކާމިޔާބުވެ ދިއުމަށްފަހު ދެން މަސައްކަތް ކުރެއްވީ ރިޔާސީ ޕްރައިމަރީގައި ރައީސް ސާލިހު ބަލިކޮށް ޕާޓީގެ ރިޔާސީ ޓިކެޓް ކަށަވަރު ކުރެއްވުމަށެވެ. އެހެންނަމަވެސް އެ އިންތިޚާބުގައިވެސް ބޮޑު ބައްޔަކުން ނަޝީދު ބަލިވިއެވެ.

އެއަށްފަހު އެމްޑީޕީގެ އެތެރޭގައި ހުންނަވައިގެން، ގާސިމް އިބުރާހިމްއާއެކު "ޑީލް ކަޓް" ކުރައްވައިގެން، ގާސިމް އޮންބޯޑުކޮށް، ރައީސް ސާލިހާ ޖެލެންޖު ކުރެއްވުމަށް މަސައްކަތް ކުރެއްވިއެވެ. އެހެންނަމަވެސް، ބަރުލަމާނީގެ ވާހަކަ ނަޝީދު ދައްކަވަން ފެއްޓެވުމުން ގާސިމް ކޯފާ އިސްކުރެއްވީއެވެ.

އެއަށްފަހު ފާއިތުވެދިޔަ ހަފްތާގައި އިދިކޮޅު ހުރިހާ ޕާޓީތަކުން އެއް ކެނޑިޑޭޓަކު ނެރުމަށް ނަޝީދުވެސް ހިމެނޭގޮތުން، ތިން ޕާޓީއަކުން އެއްބަސް ވިއެވެ. އެހެންނަމަވެސް އެވާހަކަތައްވެސް ވެގެން ދިޔައީ ހަމައެކަނި މީޑިއާ ހެޑްލައިންއަކަށެވެ.

ކޮންމެއަކަސް ފާއިތުވެދިޔަ ކުރު މުއްދަތުގައި ނަޝީދުގެ ޕާޓީން، ސިޔާސީ ވާހަކަތައް އިދިކޮޅު ހުރިހާ ޕާޓީއަކާއެކުވެސް ކުރިޔަށް ގެންގޮސްފައިވެއެވެ. މި ވާހަކަތަކާއި ސިޔާސީ މަޝްވަރާތައް ގިނަބަޔަކު ސިފަކޮށްފައިވަނީ، "ގޮތް ހުސްވެ"، އަމިއްލަފުޅު ސިޔާސީ ތަރި އޮއްސިގެން ދިޔަ ނުދިނުމަށް، އެހެން ޕާޓީތަކުގެ ކިބައިން އާދޭސްކޮށް، ނަޝީދު "މަރުފަލި ޖައްސަވާ" ޖެއްސެވުމެއްގެ ގޮތުގައެވެ.

ހަގީގަތުގައިވެސް ފެންނާން އޮތް މަންޒަރަކީ، ގޮތް ހުސްވެގެން، އެންމެ ފަހުން، ނަޝީދުގެ ސިޔާސީ ހަޔާތުގެ ދިރި ދެމި އޮތުމަށްޓަކާ އިލްޔާސް ލަބީބު ގުރުބާން ކުރައްވާ މަންޒަރެވެ.