އަވައްޓެރި ޕޮލޭންޑުން ބެލަރޫސްގެ ބިންތަކަށް ޝައުގުވެރިކަން ހުރިކަމަަށް ތުހުމަތުކޮށް، ބެލަރޫސްގެ އިމަށް އިހުތިރާމް ނުކޮށް، އެގައުމާ ދެކޮޅަށް ހިންގާ ކޮންމެ އަމަލަކީވެސް ރަޝިއާއަށް އަމާޒުކުރާ ހަމަލާއެއް ކަމުގައި ވިދާޅުވެ، ރަޝިއާގެ ރައީސް ޕޮލޭންޑަށް އިންޒާރު ދީފިއެވެ.
ރަޝިއާގެ ޓީވީ މެދުވެރިކޮށް ވާހަކަ ދައްކަވަމުން ޕުޓިން ވިދާޅުވެފައިވަނީ ބެލަރޫސްގެ ބިން ހިމާޔަތް ކުރުމަށް ރަޝިއާއިން އެގައުމަށް ލިބިފައިވާ ހުރިހާ ވަސީލަތެއްގެ ބޭނުން ކުރާނެ ކަމުގައެވެ.
ޕުޓިން ވިދާޅުވެފައިވަނީ މީގެ ކުރިން ޕޮލޭންޑަށް ނިސްބަތްވި، އެހެންނަމަވެސް މިހާރު ވެސްޓަން ޔޫކުރެއިންގައި ހިމެނޭ ބިންތަކުގައި ޕޮލޭންޑާއި ލިތުއޭނިއާގެ ޔުނިޓްތަކުން ހަރަކާތްތެރި ވުމަށް ތައްޔާރުވަމުންދާ ކަމުގެ މައުލޫމާތު ލިބިފައިވާކަމުގައެވެ. އަދި ޕޮލެންޑުގެ މަގްސަދަކީ އެންމެ ފަހުން މި ސަރަހައްދު ހިފުންކަމަށްވެސް ޕުޓިން ތުހުމަތު ކުރައްވާފައި ވެއެވެ.
އަހަރުމެންގެ އަތުގައި ހުރި ހުރިހާ ވަސީލަތެއްގެ ބޭނުން ކޮށްގެން ރައްދު ދޭނަން.
ރަޝިއާގެ ޓީވީގައި ވާހަކަ ދައްކަވަމުން ޕުޓިން ވިދާޅުވެފައި ވެއެވެ.
އެމީހުން ބެލަރޫސްގެ ބިމަށް ޝައުގުވެރިވާކަން އެއީ ސަފުކޮށް ފެންނާން އޮތް ހަގީގަތެއް.
އިތުރު ތަފްސީލު ހާމަކުރުމަކާ ނުލާ ޕުޓިން ވިދާޅުވިއެވެ.
ނޭޓޯގެ މެމްބަރު ގައުމެއްގެ ގޮތުގައި އޮތް، އަދި މިހާރު ހިގަމުންދާ ޔޫކުރެއިން ހަނގުރާމާގައި ޔޫކުރެއިންގެ އެންމެ ބޮޑު އެއް އެހީތެރިއެއްގެ ގޮތުގައި އޮތް ޕޮލެންޑުންވަނީ ޕުޓިންގެ ތުހުމަތުތަކަށް އިންކާރު ކޮށްފައެވެ.
