މި ދައުރުގެ ތެރޭގައި އިސްކަން ދިނީ ކުރިމަތިވި ގޮންޖެހުންތަކަށް ރައްދު ނުދީ ތަރައްގީގެ މަޝްރޫއުތައް ކުރިއަށްގެންދިއުމަށް ކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެ އެވެ.
ހއ. މޮޅަދޫގައި މިއަދު ހަވީރު ބޭއްވި "އުފާވެރި އަމާން ރާއްޖެ" ކެމްޕެއިން ޖަލްސާގައި ވާހަކަދައްކަވަމުން ރައީސް ވިދާޅުވީ ތަރައްގީގެ މަޝްރޫއުތައް ބާރު ސްޕީޑެއްގައި ކުރެވުނީ ވިސްނުންތެރިކަމާއެކު ކަންތައްތަކެއް ކޮށްގެން ކަމަށާއި އެންމެ މުހިއްމު ކަމަކީ ރާއްޖޭގައި ހަމަޖެހުމާއި އަމާންކަން ގާއިމުކުރުން ކަމަށެވެ. އެއީ ހަމަ އޮވެފައިވީ ކަމެއް ނޫން ކަމަށާއި އެކަން ކުރެވުނީ ކަންތައްތަކެއް ކޮށްގެން ކަމަށް ރައީސް ވިދާޅުވި އެވެ.
"ތަފާތު ވިސްނުމުގެ މީހުންގެ ހިޔާލު އަޑުއެހުން، ކުރިމަތިވާ ގޮންޖެހުންތަކަށް ރައްދު ނުދީ ވިސްނުންތެރިކަމާއެކީގައި އެއަށް ހައްލު ހޯދުމަށް މަސައްކަތް ކުރުން. ވެރިކަމުގައި ތިބޭއިރު ކުރިމަތިވާނެ ގޮންޖެހުންތައް. އެހެން ނަމަވެސް އެ ހުރިހާ ކަމެއް އެއްފަރާތްކޮށްފައި ސަރުކާރުގެ އަމާޒަކަށްވީ، ވިސްނުމަކަށްވީ ކުރިއަށްދާނީ ތަރައްގީގެ މަޝްރޫއުތަކާ އެކުގައޭ. އޭގެ ނަތީޖާ މި ފެންނަނީ،" ރައީސް ވިދާޅުވި އެވެ.
ރައީސް ވިދާޅުވީ ހއ. އަތޮޅުގެ ކޮންމެ ރަށަކަށް އެރި ނަމަވެސް މިއަދު ފެންނަނީ ތަރައްގީގެ މަޝްރޫއުތައް ކަމަށާއި މި މަޝްރޫއުތަކާއެކު ބޮޑުތިލަދުންމައްޗަށް ބޮޑު ބަދަލެއް އަންނާނެ ކަމަށެވެ. އެގޮތުން ހދ. ހަނިމާދޫގެ އެއާޕޯޓު އިންޓަނޭޝަނަލް އެއާޕޯޓަކަށް ބަދަލުވެގެން ދިޔުމުން ކައިރީގައި ހުރި ރަށްތަކުގެ ބިމުގެ އަގު އުފުލޭނެ ކަމަށާއި ކުރިއަށް އޮތް ފަސް އަހަރު ފެނިގެންދަނީ މުޅިން އެހެން ތިލަދުންމައްޗެއް ކަމަށްވެސް ރައީސް ވިދާޅުވި އެވެ.
