ސިޔާސީ ވަކި މަންފާއެއް ހާސިލް ކުރުމަށް އެއްވެސް މުއްލިމަކީ ކާފަރެއްކަމުގައި ހަދައި ހިންގާ ޢަމަލުތަކަކީ ޤައުމަށް އޮތް ބޮޑު ނުރައްކަލެއް ކަމުގައި ދީނީ އިލްމުވެރިޔާ އަދި އަދާލަތު ޕާޓީގެ ޢިލްމުވެރިންގެ މަޖިލީހުގެ މެމްބަރު ޝައިޚު އިލްޔާސް ހުސެއިން ވިދާޅުވެއްޖެއެވެ.

އިލްޔާސް ވިދާޅުވީ ފަހަކަށް އައިސް އަދާލަތުގެ އިލްމުވެރިންނާއި ދެކޮޅަށް ވަރަށް ނުރަނގަޅު ތަސައްވަރެއް އުފައްދަމުންދާ ކަމަށެވެ. މިއީ އެއްވެސް ހާލެއްގައި ބަލައި ގަނެވޭނެ ކަމެއް ނޫންކަމަށާއި، ދީނުގެ ނަމުގައި ހަރުކަށި ފިކުރު ފަތުރައި، މުސްލިމުން ކާފަރުންނަނަށް ހެދުމުގެ ފުރުސަތު ދީގެން ނުވާނެކަމަށް ޝައިޚު އިލްޔާސް ވިދާޅުވިއެވެ.

ފަހަކަށް އައިސް ޢަދާލަތު ޕާޓީއާ ސަރުކާރާ ދެކޮޅަށް ތަކްފީރީ ވިސްނުންތަކުގެ ފަރުދުން އެބަ ކުރިއަށްނެރޭ. ސިޔާސީ މަންފާއަށް ހަރުކަށި ފިކުރަށް ހިތްވަރުދީ މުސްލިމުން ކާފަރުކުރަމުން ދިއުމަކީ ޤައުމަށް އޮތް ނުރައްކަލެއް. މިކަން ހުއްޓައިލުމަށް އެންމެހައި ފަރާތްތަކަށް އިލްތިމާސްކުރަން.

– ޝައިޚު އިލްޔާސް ހުސެއިން ވިދާޅުވިއެވެ.

އިލްޔާސް މިހެން ވިދާޅުވެފައިވަނީ އަދާލަތުގެ އިލްމުވެރިންނާއި ދެކޮޅަށް ބައެއް ދީނީ އިލްމުވެރިން ފާޅު ކުރައްވަމުންދާ ޝުއޫރުތަކާއި ގުޅިގެންނެވެ. މިގޮތުން ޔޯގާ މައްސަލާގައި ހައްޔަރުކުރި ދީނީ އިލްމުވެރިޔާ އައްޝައިހް ފަޒުލޫން މުހައްމަދު ވަނީ ޢަދާލަތުގެ އިލްމުވެރިއެއް ސޫރަތުލް ފާތިހާ ކިޔަވާ ތަނެއްގަިއވެސް އިނުމަކީ ރަނގަޅު ނޫންކަމެެއްކަމަށް ވިދާޅުވެފައެވެ.

ޢަދާލަތު ޕާޓީގެ ޢިލްމުވެރިންނަކީ އެބައިމީހުންގެ ވެރިޔަކީ އިލާހެއްކަމަށް ގަބޫލުކޮށްގެން ތިބި ފާސިޤު ބައެއްކަމަށް ޝައިކު ފަޒުލޫން ވަނީ ވިދާޅުވެފައެވެ.

ޙަޤީޤަތް ބެލުމެއްނެތި، އިވޭހާ އަޑަކަށް ނުވަތަ ހީވާހާ ގޮތަކަށް ހެއްލިގެން، ތިމާގެ ޙަޔާތުގައި ދިމާވި ހިތްދަތިކަމެއްގެ ޛާތީ ތަޢައްޞުބު ކުރިޔަށް ނެރިގެން، ކަންކަމުގައި ޙުކުމް ކަނޑަޅުމަކީ އިސްލާމީ އުޞޫލުތަކާއި ޚިލާފުކަމެއް. މީސްތަކުންނަށް ޙައްޤު ބަޔާންކޮށްދިނުމުގައި… https://t.co/mUPAdiMNPa

— Dr.Mohamed Iyaz (@dr_iyaz) July 19, 2023

ޢަދަލާތު ޕާޓީއާއި ބައެއް ދީނީ އިލްމުވެރިންނާއި ދެކޮޅުވެރިވާން ޖެހުނު އެއް ސަބަބަކީ، ރާއްޖޭގައި އިސްލާމް ދީނާއި ޚިލާފް ބައެއް ކަންކަން ވަރަށް ހާމަކަން ބޮޑުކޮށް ކުރަމުންދާއިރުވެސް އެކަންކަން ހުއްޓުވުމުގައި އެކަށީގެންވާ މަސައްކަތްތަކެއް ނުކުރާތީއެވެ. ޚާއްސަކޮށް މާސާޖް ޕާލާތައް ހިންގުމާއި، ޔޯގާގެ މައްސަލައާއި، އިސްލާމް ދީނަށް ފުރައްސާރަކޮށް، ހަޖޫޖަހާ ފަރާތްތަކާއިމެދު އެކަށީގެންވާ ފިޔަވަޅު ނޭޅޭ މައްސަލައަކީ ބައެއް އިލްމުވެރިން ފާހަގަކުރާ މައްސަލަތަކެވެ.