2004 ވަނަ އަހަރުގެ ސުނާމީ ހާދިސާގައި މުޅި ރާއްޖެއަށް ލިބިދިން ގެއްލުމުން އަރައިގަނެވި، ހިންދެމިލެވިފައިވަނީ މިސަރުކާރުން ވެރިކަަމަށް އައިސް ރައީސް ޞާލިހު ކުރެއްވި މަސައްކަތުން ކަމުގައި ހޯމް މިނިސްޓަރ އިމްރާން ވިދާޅުވެއްޖެއެވެެ.
ކޮޅުފުށީގައި ބޭއްވި ކެމްޕޭން ޖަލްސާގައި ވާހަކަ ދައްކަވަމުން މިނިސްޓަރ ވިދާޅުވީ، ކޮޅުފުއްޓަކީ ސުނާމީގައި ރާއްޖެއިން އެންމެ ބޮޑު ގެއްލުމެއްވި އެއް ރަށް ކަމަށެވެ. އެރަށަށް ލިބުނު ގެއްލުން ފޫބެއްދޭވަރުގެ ނަތީޖާއެއް ނެރެވޭ މަސައްކަތެއް ކުރެވިގެން ދިޔައީ މި ސަރުކާރުގައިކަމަށް އިމްރާން ވިދާޅުވިއެވެ.
އިމްރާން ވިދާޅުވީ 2004 ވަނަ އަހަރަށްފަހު މިހާތަނަށް ކަން ހިނގި ގޮތް ރަށުގެ ގިނަ ރައްޔިތުންނަށް އެނގޭނެ ކަމަށެވެ. އެގޮތުން ސުނާމީގައި ލިބުނު ގެއްލުންތަކުން އަރައިގަތުމަށް އޭރުގެ ސަރުކާރުން ފެށި މަސައްކަތުން ކިރިޔާ މަސައްކަތެއް ފަށައިގަނެވުނީ 2008 ވަނަ އަހަރު އުފެދުނު އެމްޑީޕީގެ ފުރަތަމަ ސަރުކާރުގައި ކަމަށް އިމްރާން ވިދާޅުވިއެވެ.
މަސައްކަތުގެ ނަތީޖާއެއް ރައްޔިތުންނަށް އިހުސާސްކުރެވޭ ވަރަށް މި ގެންދެވުނީ މި ދައުރުގައި. ގާތްގަނޑަކަށް 20 އަހަރުން.
– އިމްރާން ވިދާޅުވިއެވެ.
އިމްރާން ވިދާޅުވީ ސުނާމީގައި ލިބުނު ގެއްލުމުން އަރައިގަނެވުނު ކަމުގެ އިހުސާސް މިއަދު ރަށުގެ ރައްޔިތުންނަށް ކުރެވޭނެ ކަމަށާއި އެ އިހުސާސު ހަގީގަތަކަށް ހައްދަވާ ދެއްވީ ރައީސް ސޯލިހު ކަމަށެވެ. މިނިސްޓަރ ވިދާޅުވީ، ރައީސް ވެވަޑައިގެންނެވި ވައުދުތަކަކީ ފުއްދަވާ ވައުދުތަކެއްކަން އެ ރަށުންވެސް އެނގިގެން ގޮސްފައިވާ ކަމަށާއި، ހަމައެކަނި އެ ރަށުންވެސް މަދުވެގެން 65 އިންސައްތައަށްވުރެ ގިނަ ވޯޓު ހޯދުމަށް މަސައްކަތް ކުރައްވަންޖެހޭ ކަމަށެވެ.
އިމްރާން ވަނީ ކެމްޕޭން އިތުރު ގިޔަރަކަށް ލައިގެން، ރައީސް ޞާލިޙަށް އިންތިޚާބު ކާމިޔާބު ކޮށްދެއްވުމަށް ހުރިހާ ފަރާތްތަކުންވެސް މަސައްކަތް ކޮށްދެއްވުމަށް އެދިވަޑައިގެންފައެވެ.
