ރާއްޖޭގެ ކޮންމެ ރިޔާސީ އިންތިޚާބެއްވެސް ގާތްވެގެން އަންނައިރު، އެންމެ އަޑުހަރުކޮށް އިވޭ ވާހަކަތަކަކީ ކޮރަޕްޝަނާއި ފަސާދައިގެ ވާހަކަތަކެވެ. އޭރަކު އޮންނަ ސަރުކާރަކުން ދައުލަތުގެ މާލިއްޔަތު ލޫޓުވާލާ ވާހަކަތަކެވެ. ސަރުކާރުގެ އިސްވެރިންގެ ގޮތުގައި ތިއްބަވާ ފަރާތްތަކުން ނާޖާއިޒު މަންފާތައް ނަގާ ވާހަކަތަކެވެ. އެ ސަރުކާރުގަވެސް، މި ސަރުކާރުގަވެސް އިންތިޚާބަށް ބެރުޖަހަން ފެށުމުން އިވެމުންދަނީ މި ވާހަކަތަކެވެ.

އެހެންނަމަވެސް ރައީސް ޔާމިންގެ ސަރުކާރުގައި އޭރުގެ އިދިކޮޅު ފަރާތްތަކުން އޭރުގެ ސަރުކާރުގެ މައްޗަށް ކޮރަޕްޝަންގެ ބޮޑެތި ތުހުމަތުކޮށް އެވާހަކަަތައް މީޑިއާގެ ވަސީލަތްތައް މެދުވެރިކޮށް، އެންމެ އަޑުހަރުކޮށް ދައްކަމުން ގޮސްފައިވަނީ މި ސަރުކާރާ ޚިޔާލުތަފާތުވެގެން އެމްޑީޕީ ދޫކޮށް، ވަކި ސިޔާސީ ޕާޓީއެއް އުފެއްދުމުގެ މަސައްކަތް މިހާރު ކުރައްވަމުން ގެންދަވާ، ކުރީގެ ރައީސް މުހައްމަދު ނަޝީދުގެ އަރިސް ފަރާތްތަކުންކަންވެސް މި ފުރުސަތުގައި ފާހަގަ ކޮށްލަން ޖެހެއެވެ.

އޭރު އެންމެ އަޑުހަރުކޮށް އެބޭފުޅުން ދެއްކެވީ ރައީސް ޔާމިންގެ ސަރުކާރުގައި ހިންގި އެމްއެމްއާރުސީގެ ކޮރަޕްޝަންގެ ވާހަކަތަކެވެ. އޭރު އެމްޑީޕީގެ ރައީސްކަމުގެ މަގާމުގައިވެސް ހުންނެވި، ކުރީގެ ރައީސް މުހައްމަދު ނަޝީދަކީ، އެމްއެމްޕީއާރުސީގެ ކޮރަޕްޝަންގެ ޚިޔާނާތުގެ މޭސްތިރިއަކީ ޚުދު ރައީސް ޔާމިންކަމުގައި ވިދާޅުވެ، ހަރުއަޑުން ވާހަކަ ދެއްކެވި އެއް ސިޔާސީ ލީޑަރުކަންވެސް އެއީ ވަންހަނާވާން އޮތް ކަމެއް ނޫނެވެ.

އޭގެ އިތުރުންވެސް، ކުރީގެ ރައީސް ޔާމިންގެ ވެރިކަމުގައި ރައްޔިތުންގެ މަޖިލިސް ހިސޯރުކޮށް، ދައުލަތުގެ މުވައްސަސާތައް މުށުތެރެއަށްލާ، ރައީސް ޔާމިން އޭރު ކުރެއްވި "ޚުދުމުޚްތާރު" ވެރިކަމާ ދެކޮޅަށްވެސް އޭރު އެންމެ ހަރުކޮށް އަޑު އުފުއްލެވި ބޭފުޅުން އޭރުވެސް މިއަދުވެސް ތިއްބެވީ ނަޝީދުގެ އަރިހުގައިކަންވެސް މިފުރުސަތުގައި ފާހަގަކޮށްލާން ޖެހެއެވެ.

އެހެންނަމަވެސް މިއަދު އެބޭފުޅުން ތިއްބެވީ މުޅިން އާ ސިޔާސީ ޕާޓީއެއް އުފައްދަވައިގެން، އެހެން ޕްލެޓްފޯމެއްގައެވެ. ރައީސް ސާލިހު ކަމުނުގޮސްގެން، އެހެން ސިޔާސީ ލީޑަރުންނާ ޑީލް ހައްދަވައިގެންނެވެ.

އެމްއެމްޕީއާރުސީގެ ޚިޔާނާތުގެ ތުހުމަތުކުރެވޭ ގިނަބަޔަކާ ނަޝީދު ސިޔާސީ ޑީލް ހައްދަވައިގެން!

ރާއްޖޭގެ ތާރީޚުގައި މިހާތަނަށް ހިންގާފައިވާ އެންމެ ބޮޑު އެއް ޚިޔާނާތް ކަމަށްވާ "އެމްއެމްޕީއާރުސީގެ ޚިޔާނާތު"ގެ މޭސްތިރިންގެ ގޮތުގައި ގިނަބަޔަކު އޭރުވެސް މިހާރުވެސް ސިފަކުރަމުން ދަނީ ރައީސް ޔާމިންގެ ސަރުކާރުގެ އިސްވެރިންގެ ގޮތުގައި ތިއްބެވި ބައެއް ފަރާތްތަކެވެ. އޭގެ ތެރޭގައި ހިމެނޭ ބައެއް ފަރާތްތަކުގެ މައްޗަށް ރާއްޖޭގެ ކޯޓުތަކުގައި ދައުވާތައް އުފުލި މިހާރުވެސް ޝަރީއަތްތައް ދަނީ ކުރިއަށެވެ.

އެގޮތުން، އެމްއެމްޕީއާރުސީ މެދުވެރިކޮށް ވިއްކި ބައެއް ރަށްތަކުގެ މުއާމަލާތުތަކުގައި ރިޝްވަތުގެ ފައިސާ ނަގާ، އަދި އެފައިސާ ލޯންޑަރ ކޮށްފައިވާކަމުގެ ކުށް ސާބިތުވެ، ކުރީގެ ރައީސް ޔާމިން މިހާރުވެސް ގެންދަވަނީ 11 އަހަރުގެ ޖަލުހުކުމެއް ތަންފީޒު ކުރައްވަމުންނެވެ. އަދި އެމްއެމްޕީއާރުސީގެ ޚިޔާނާތުގެ ތަހުގީގަށްފަހު، ޚިޔާނާތުގެ ފައިސާ ލިބުނު ކަމަށް ތަހުގީގީ ރިޕޯޓުގައި ފާހަގަކޮށްފައިވާ ގިނަ ފަރާތްތައް މިހާރުވެސް އިދިކޮޅު ޕީޕީއެމްގެ ލީޑަރޝިޕްގައި ތިބިކަންވެސް މި ފުރުސަތުގައި ފާހަގަ ކޮށްލާން ޖެހެއެވެ.

ހަމައެއާއެކު ފާހަގަކޮށްލާންޖެހޭ އަނެއް ނުކުތާއަކީ، އިސްވެ ދެންނެވުނު ފަރާތްތަކުގެ މައްޗަށް އިންސާފު ގާއިމުކުރުމަށް ގޮވާލަމުން އައި ގިނަފަރާތްތައް މިވަގުތުތިބީ ކުރީގެ ރައީސް މުހައްމަދު ނަޝީދު އިސްވެ، މިހާރު އުފައްދާފައިވާ "ދަ ޑިމޮކްރެޓްސް" ޕާޓީގައި ކަމެވެ. އަދި ނަޝީދު އިސްވެ ހުންނަވާ، މި ސަރުކާރާ ދެކޮޅަށް ހިންގަމުންދާ ގިނަ ސިޔާސީ ހަރަކާތްތަކުގައި "ބޯ ހަމަކޮށްދިނުމަށް" "ދަ ޑިމޮކްރެޓްސް"ގެ އެއްވުންތަކުގެ އެންމެ ކުރީ ސަފުގައި ތިބޭތަން ފެންނަމުން ދަނީވެސް، ހަމަ އިސްވެ ދެންނެވުނު، އެމްއެމްޕީއާރުސީގެ ޚިޔާނާތުގެ ތުހުމަތު ކުރެވިފައިވާ އިސް ފަރާތްތަކެވެ.

ކުރު ގޮތަކަށް ދަންނަވަނީނަމަ، ސިޔާސީ ގޮތުން މިއަދު، ނަޝީދުގެ  އެންމެ ގާތް ބޭފުޅުންގެ ގޮތުގައި ތިއްބެވީ، އެމްއެމްޕީއާރުސީގެ ޚިޔާނާތުގު ތުހުމަތު ކުރެވިފައިވާ، އިދިކޮޅު ޕީޕީއެމްގެ ލީޑަރޝިޕްގައި ތިއްބެވި ގިނަ ބެފުޅުންނެވެ. އޭގެ އިތުރަށް އެމްއެމްޕީއާރުސީގެ ބޮޑު ޚިޔާނާތުގެ ތުހުމަތު ކުރެވޭ، ރައްޔިތުންގެ މަޖިލިހުގެ ބައެއް މެމްބަރުންވެސް ނަޝީދު އުފައްދަވާ "ދަ ޑިމޮކްރެޓްސް"ޕާޓީގެ އިސް ބޭފުޅުންގެ ގޮތުގައި ތިއްބެވިކަމީވެސް ސާފުކޮށް ފެންނާން އޮތް ހަގީގަތެކެވެ.

މިގޮތުން، އެމްއެމްޕީއާރްސީ މެދުވެރިކޮށް ރ. ފުއްގިރި ކުއްޔަށް ދިނުމުގެ މުއާމަލާތުގެ މަޝްވަރާގައި މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ބައިވެރިވެވަޑައިގެންނެވި ކަމަށް ކުރީގެ ނައިބު ރައީސް އަހްމަދު އަދީބު ވަނީ، ރައީސް ޔާމިންގެ މައްޗަށް މިހާރު ކުރިޔަށްދާ ފުއްގިރި މައްސަލާގެ ޝަރީއަތުގައި ހެކިބަސް ދީފައެވެ. ބޮންޑޭއަކީ ނަޝީދު އުފައްދަވާ "ދަ ޑިމިކްރެޓްސް" ޕާޓީގެ އެންމެ އިސް އެއްފަރާތެވެ.

ނަޝީދުގެ "ޗަރުކޭސްތައް" ބާވެއްޖެ!

އެމްޑީޕީން އަމިއްލަފުޅަށް ވަކިވެ، "ދަ ޑިމޮކްރެޓްސް"ގެ ނަމުގައި މިހާރު އާ ޕާޓީއެއް އުފައްދާފައިވާ ކުރީގެ ރައީސް މުހައްމަދު ނަޝީދު އެމަނިކުފާނުގެ ސިޔާސީ ހަރަކާތްތައް ޒީނަތްތެރި ކުރުމަށް އެންމެ ގިނައިން ދައްކަވާ ވާހަކައަކީ ކޮރަޕްޝަންއާއި ޑިމޮކްރަސީގެ ވާހަކަތަކެވެ. އެމަނިކުފާނަކީ ދުވަހުކުވެސް ކޮރަޕްޝަނާއި ފަސާދައަށް ތާއީދު ކުރައްވާނޭ ބޭފުޅެއް ނޫންކަމުގައި ދައްކަވަމުންނެވެ.

އެހެންނަމަވެސް، އަމިއްލަފުޅު ޕާޓީގެ އެތެރޭގައި ބޭއްވުނު އިންތިޚާބުގެ ނަތީޖާ ހަޖަމު ނުކުރެވި، ޚުދު ނަޝީދު މިހާތަނަށް އަމަލު ކުރައްވާފައިވާގޮތުން، އެމަނިކުފާނަކީ ޑިމޮކްރަސީގެ ކަންފުޅެއްވެސް އަމިއްލަފުޅު ތަބީއަތުގައި ނެތްބޭފުޅެއްކަން ސާފުކޮށް ފެންނާ މިއަދު އެބަހުއްޓެވެ.

އަދި އޭގެ އިތުރަށް ނަޝީދުގެ އަމަލުތަކުން މިހާރު އެމަނިކުފާނު ސާބިތުކޮށް ދެއްވަމުން ގެންދަވަނީ، ނަޝީދަކީ، އަމިއްލަފުޅަށް ވިދާޅުވަމުން ގެންދަވާ ފަދައިން ކޮރަޕްޝަނާއި ފަސާދައާއި ދުރު ބޭފުޅެއްވެސް ނުމެނޫން ކަމެވެ.

މިގޮތުން، އެމްއެމްޕީއާރުސީގެ ޚިޔާނާތުގެ ފައިސާ ޚުދު ނަޝީދު އަމިއްލަފުޅު ސިޔާސީ ހަރަކާތްތަކަށް ބޭނުން ކުރެއްވި ކަމުގެ ތުހުމަތު ކުރެވިފައިވާއިރު، ސިޔާސީގޮތުން މިއަދު ހުންނެވީ އެޚިޔާނާތުގެ އެންމެ ބޮޑެތި މޭސްތިރިންނާއި ބައިއަތު ހިތްޕަވައިގެންނެވެ. ނަޝީދު ގެންދަވަނީ، މިސަރުކާރު ބަދަލު ކުރުމުގެ ނަމުގައި، ކޮރަޕްޝަނާއި ފަސާދައިގެ ކުށުގައި ހުކުމް ތަންފީޒު ކުރައްވަމުން ގެންދަވާ ކުރީގެ ރައީސް ޔާމިންއާއި ސިޔާސީ މަޝްވަރާތައް ކުރައްވަމުންނެވެ.

އަދި އެމަޝްވަރާކުގެ އެންމެ ކުރީ ސަފުގައި، ނަޝީދުގެ ފަރާތުން ތަމްސީލުކުރައްވަމުން ގެންދަވަނީ، ރައީސް ޔާމިނަށް ނިސްބަތްކޮށް، ޚިޔާނާތުގެ ތުހުމަތު އެންމެ ގިނައިން ކުރެއްވި، ނަޝީދުގެ އެންމެ އަރިސް ބޭފުޅުންވެސްމެއެވެ. ކޮރަޕްޝަނާއި އެންމެ ބީރައްޓެހިކަމަށް ވިދާޅުވެ، ޑިމޮކްރަސީގެ ލަގަބުން މެޑަލް ޖައްސަވަމުން ގެންދަވާ ބޭފުޅުންގެ ހާލަތަކީ މިއީއެވެ.

އެހެންނަމަވެސް މިއަދުގެ ހަގީގަތަކީ، ޑިމޮކްރަސީގެ ވާހަކަތަކުން ޒީނަތްތެރިކޮށް، ކޮރަޕްޝަނާއި ދެކޮޅަށް އަޑު އުފުއްލަވަން ނަޝީދަށް މިހާރަކު ވާހަކަ ދެއްކެވެން ނެތްކަމެވެ. ފެތެމުންދާ އަމިއްލަފުޅު ސިޔާސީ ހަޔާތް ސަލާމްތަކުރެވޭތޯ، ނަޝީދު މިއަދު އަރުއްވައިގެން ހުނެވި އޮޑީގެ ގިނަ ފަޅުވެރިންނަކީ ޚިޔާނާތުގެ އަހުލުވެރިންކަމީ ވަންހަނާވެވެން ނެތް ހަގީގަތެކެވެ. އަމިއްލަފުޅު މަންފާއާއި މަސްލަހަތު ކުރިއަރުވަން ޖެހުނީމާ ނަޝީދަށް އެގޮތްވެސް ވަރިހަމަވީއެވެ.