ދައުލަތާއި ސަރުކާރަށް ހުތުރުވާ ޢަމަލުތައް ހިންގަވާ މީހުން ދުރުވެ، ސަރުކާރާއި ފެޔަށް ޖެހުމަކީ ލިބޭ ބޮޑު ހިންހަމަ ޖެހުމެއް ކަމުގައި ހޯމް މިނިސްޓަރ އިމްރާން ވިދާޅުވެއްޖެއެވެ.

ރިޔާސީ އިންތިޚާބު ގާތްވަމުންދާ ވަރަކަށް މިނިސްޓަރ އިމްރާނާއި ޢަދަލާތު ޕާޓީގެ ހަރަކާތްތައް ވަނީ އިތުރުވާން ފަށާފައެވެ. އަދި އަދާލަތުން ވަނީ ކުރިއަށް އޮތް ރިޔާސީ އިންތިޚާބުގައި މިހާރުގެ ރައީސް އިބްރާހިމް މުހައްމަދު ޞާލިހު ރިޔާސީ ދެވަނަ ދައުރަކަށް އިންތިޚާބު ކުރުމަށް ބައިތު ހިފާފައެވެ.

ސަރުކާރު ގެންނަން މަސައްކަތްކުރި މީހުންގެ ތެރެއިން ރައީސް ޞާލިހަށް ދެވަނަ ދައުރެއް ދޭން ތާއީދުކުރި ހަމައެކަނި ބޭފުޅަކީ މިނިސްޓަރ އިމްރާނެވެ. ޖުމްހޫރީ ޕާޓީއާއި، އެމްއާރުއެމްއާއި، ކާނާލް ނާޒިމް އަދި ރައީސް ނަަޝީދު ހުންނެވީ ރައީސް ޞާލިހާއި ދެކޮޅަށެވެ. ރައީސް ޞާލިހަށް އޮތް އެންމެ ބޮޑު ގޮންޖެހުމަކީ ވެރިކަމުގެ ދައުރު ހަމަވުމާއުި ހަމައަށް ކޯލިޝަން ހިފެހެއްޓުނަސް، އެމަނިކުފާނު ވެރިކަމަށް ގެނައި ގިނަ މީހުން ފެޔަށް ޖެހުމެވެ.

މިނިސްޓަރ އިމްރާން ވިދާޅުވީ ސަރުކާރާއި، ދައުލަތަށް ހުތުވާފަދަ ޢަމަލުތައް ހިންގަވާ ބޭފުޅުން ދައުލަތުގެ މަޤާމުތަކުން ވަކިވެ ސަރުކާރާއި ފެޔަށް ޖެހުމަކީ ލިބޭ ބޮޑު މޮޅަކާއި ހެވެއް ކަމަށެވެ. އިމްރާން މިހެން ވިދާޅުވީ ކޮން ބަޔަކާއި ދިމާލަށް ކަމެއް ސާފު ނުވިނަމަވެސް، އިމްރާނާއި ޢަދަލާތު ޕާޓީގެ ގިނަ ބޭފުޅުންނަކީ އެމްޑީޕީގެ ކުރީގެ ރައީސް އަދި މިހާރު ޑިމޮކްރަޓިކް އުފެއްދުމުގައި އިސްކޮށް ހަރަކާތްރިވާ ބޭފުޅުންނާއި ވަރަށް ދެބަސްވާ ބޭފުޅުންނެވެ.

ސަރުކާރާއި ދަޢުލަތުގެ މަޤާމުތަކުގައި ތިބި ދައުލަތާއުި ސަރުކާރަށް ހުތުރުވާފަދަ ހުތުރު ޢަމަލުތައް ހިންގާ މީހުން ފޭވެ، ވަކިވެ، ސާފުވުމީ ދައުލަތާއި ސަރުކާރަށް އޮތް ހާދަހާ ބޮޑު މޮޅަކާއި، ހެވެކެވެ.

– އިމްރާން ވިދާޅުވިއެވެ.

ރިޔާސީ އިންތިޚާބުގައި ރައީސް ޞާލިހަށް ދެވަނަ ދައުރެއް ދިނުމަށް ބައިއަތު ހިފާފައިވަނީ އެމްޑީއޭއާއި، އަދާލަތުންނެވެ. ދެންތިބި ގިނަ ޕާޓީތަކުން ރިޔާސީ އިންތިޚާބުގައި ވާދަ ކުރުމަށް ވަނީ ނިންމާފައެވެ. އަދި އިންތިޚާބުގެ އިދިކޮޅު ފަރާތްތަކުން އެންމެ ބޮޑު އަމާޒަކީ ރައީސް ޞާލިހު ބަލިކުރުމެވެ.