ކުރިއަށް އޮތް ރިޔާސީ އިންތިޚާބުގައި ރައީސް ޔާމީނާއި އެމަނިކުފާނުވެސް މަސައްކަތް ކުރައްވަންވީ ވެރިކަމަށް ކުރިމަތި ނުލައްވައި މިވެރިކަން ބަދަލު ކުރުމަށް އެކީގައި ކުރަންޖެހޭ މަސައްކަތް ކުރުމަށް ކަމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ މިރޭ ދަ ޑިމޮކްރެޓްސް އުފެއްދުމަށް ބޭއްވި ޖަލްސާގައި ވާހަކަ ދައްކަވަމުންނެވެ. ރައީސް ނަޝީދު ވިދާޅުވީ ރާއްޖޭގެ ގިނަ ބަޔަކު ތާއީދުކުރާ އިދިކޮޅު ލީދަރު ޖަލުގައި އޮތުމަކީ ތާއީދު ކުރާކަމެއް ނޫންކަމަށެވެ. ރައީސް ނަޝީދު ވިދާޅުވީ ރައީސް ޔާމީން ވިޔަސް އަދި އެހެން މީހަކުވިޔަސް ޖަލުގައި ހިފަހައްޓައި އޮބަހައްޓައިގެން ކަންކަން ކުރުމަކީ އެއްވެސް އިރެއްގައި ތާއީދު ކުރި ކަމެއް ނޫންކަމަށެވެ.
ރައީސް ނަޝީދު ވިދާޅުވީ ކުރިއަށް އޮތް އިންތިޚާބުމުގައި މިސަރުކާރު ބަލި ކުމުގެ އެންމެ މުހިންމު އަދާކުރެވޭނީ ރައީސް ޔާމީނާއި، އެމަނިކުފާނަަށް ކަމަށެވެ. އެކަން ކުރެވޭނީ ދެބޭފުޅުންވެސް ފަހަތަށް ޖެހި އެކީގައި މަސައްކަތް ކޮށްގެން ކަމަށެވެ.
އެއްވެސް އިރެއްގައި ރުހުނު ކަމެއްނޫން އެއްވެސް މީހަކު ޖަލުގައި އޮތުމަކީ. ރައީސް ޔާމީނަކީ މިދިޔަ 5 އަހަރު ރާއްޖޭގެ ރައީސްކަމާއި، މަޖިލިސް މެމްބަރުކަމާއި، ވަޒީރުކަން ކުރައްވާފައިވާ ޚިދުމްތެރިއެއް. އަޅުގަނޑަށް ފެންނަ ފެނުމުގައި އަޅުގަނޑުމެން ދެމީހުން ކުރިމަތި ނުލައި އަޅުގަނޑުމެން ދެމީހުން އެކީގައި މަސައްކަތް ކޮށް ދިވެހިން އެދޭނެ ގޮތެއް ހޯދައިދޭންވީ.
– ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ރާއްޖޭގެ ރައްޔިތުން ބޭނުންވަނީ ސިޔާސީ ވާދަވެރި ފަރާތްތަކާއި، އެކީ މަސައްކަތް ކުރަން ކަމަށެވެ. އެކަން ކުރުމަށްޓަކައި އިދިކޮޅު ފަރާތްތަކުން ގޮތް ދޫކޮށް އެކީގައި މަސައްކަތް ކުރަންޖެހޭކަމަށެވެ.
ހަމައެކަނި އިވެނީ އެމްޑީޕީ ކެނޑިޑޭޓެއްގެ ނަން. އެއީ ސިޔާސީ މަސައްކަތަށް އޮތް ހުރަހެއް. ރައްޔިތުން ވެރިންގެ ކިބައި އެދޭ އެދުން ފުއްދައި ދޭންޖެހޭނެ. ރައްޔިތުންނަށްޓަކައި މެނުވީ އެއްވެސް ކަމެއް ހިންގައިގެން ނުވާނެ. ރާއްޖޭގެ ރައްޔިތުން އެދި ގޮވާ ފާހަގަވާ ކަންތައްތަކެއްވޭ. ރައްޔިތުން އެބަބުނޭ މިގޮތް ކަމުނުދާކަށް. ރައީސް އިބްރާހިމް މުހައްމަދު ޞާލިހުގެ ވެރިކަން ކަމު ނުދާކަން. އަޅުގަނޑުމެން އެދެން އެގޮތް ހޯދާނީ. އަޅުގަނޑުމެންގެ މަސްއޫލިއްޔަތެއް އަޅުގަނޑުމެންވެސް، އަދި ޕީޕީއެމް، ޕީއެންސީ އެހެން ޕާޓީތަކުންވެސް ގޮްދޫކުރުން އިސްކުރަންޖެހޭ.
– ރައީސް ނަޝީދު ވިދާޅުވިއެވެ.
ރައީސް ނަޝީދު ވާހަކަފުޅު ދެއްކެވިއިރު، ކުރިމަތީގައި އިދިކޮޅު ގިނަ ޕާޓީތަކުގެ ވެރިކަން ބައިވެރިވިއެވެ. މިޖަލްސާގައި ރައީސް ނަޝީދު ވަނީ ޑިމޮކްރެޓްސް އާއި ގުޅޭނެކަމުގެ ޔަގީންކަން ދެއްވާފައެވެ.
