ސަރުކާރުން އިއުލާން ކޮށްފައިވާ މާލޭ ސަރަހައްދުން ހިލޭ ގޯއްޗަށް ޝަރުތު ހަމަވާ މީހުންގެ ލިސްޓަށް 600 އެއްހާ ޝަކުވާ ހުށަހަޅާފައިވާކަމަށް ޕްލޭނިން މިނިސްޓްރީން ބުނެފިއެވެ.
ފާއިތުވި ޖޫންމަހުގެ 26 ގައި މާލެ ސަރަހައްދުން ގޯތި ލިބޭ މީހުންގެ ލިސްޓު އާންމުކުރިއިރު، ގޯއްޗަށް އެދި 23،088 މީހުން ކުރިމަތިލާފައި ވެއެވެ. އޭގެ ތެރެއިން 19،955 މީހުން ގޯއްޗަށް ޝަރުތު ހަމަވިއިރު އޭގެތެރެއިން މިފަހަރު ގޯތި ދޭން ނިންމާފައިވަނީ 10،314 މީހުންނަށް ކަމަށް ސަރުކާރުން ވަނީ ބުނެފައެވެ.
ގޯއްޗަށް ޝަރުތު ހަމަވާ މީހުންގެ ލިސްޓަށް ޝަކުވާ ހުށަހެޅުމަށް ހުޅުވާލެވިފައިވަނީ މިމަހުގެ 15 ވަނަ ދުވަހާއި ހަމައަށެވެ.
ޕްލޭނިން މިނިސްޓްރީގެ ސްޓޭޓް މިނިސްޓަރ އަކުރަމް ކަމާލުއްދީން ވިދާޅުވީ ގޯތި ލިސްޓަށް 600 އެއްހާ ޝަކުވާ ހުޅާފައިވާއިރު ގިނައީ ކުދިކުދި ޝަކުވާތައް ކަމުގައެވެ.
މާލޭ ސަރަހައްދުން ގޯތި ލިބޭ މީހުންގެ ލިސްޓު އާންމު ކުރިއިރު އޭގެ ތެރޭގައި މުއްސަދި މަހުޖަނުންގެ ދަރިންނާއި އާއިލީ ބޭފުޅުންވެސް ހިމެނެއެވެ. އަދި އޭގެ އިތުރުން އެމްއެމްޕީއާރުސީގެ ޚިޔާނާތުގައި ހިމެނޭ ބައެއް ފަރާތްތައްވެސް އެލިސްޓުގައި ހިމަނާފައިވެއެވެ.
ގޯތި ބޭނުންވެފައިތިބި އެތައް ބަޔަކު ތިބިއިރު އަމިއްލަ ޚަރަދުގައި ގޯތި ގަނެވޭނެ މާލީ ތަނަވަސްކަން ހުރި ފަރާތްތަކަށްވެސް ހިލޭ ގޯތި ލިބޭގޮތަށް ހަމެޖެހިގެން ދިއުމުން ގިނަ ބައެއްގެ ޝަކުވާވަނީ ބިންވެރިޔާ ޕްރޮގްރާމަށް އަމާޒު ވެފައެވެ.
